Baisukan tu imbah beolahraga keliling Taman Kampung Liur bebuhan Ongol kada langsung bulik paan tapi bedudukan di jembatan wadah biasa santai sambil barokoan cap pekat. Awak rahatan bepaluh tu am tiba-tiba datang Haji Untat. “Bebuhan ikam wayah ne am datangi aku diterminal lah,” pesan sidin.  Apada, bingung ai bebuhannya neh apa nang dipanderi sidin kada tapi jelas. “Ya oke Ji aaaaai,” kuriak Ongol karena Haji Untat neh imbah bepadah tadi langsung menjoor ja bulik.
Handap kisah, sampai di terminal ne bebuhannya bingung karena sidin nang dihadang-hadang kada mencongol jua. “Kemanalah sidin neh. Jar tadi menyuruh kita ke terminal ne,” ujar Ongol sambil geleng-geleng kepala. “Tunggu ai Ngolai sambil bedudukan diwarung sana nah,” sahut Anang Gabau. “Mun beduduk ja coy ai kada asik banget deh. Nang mantap tu mengopi tapi ditraktir. Hahaha,” ujar Dangdut.
Rahatan handak menuju ke warung ada Utuh Lantui mengiyau. “Buhan ikam ne kalo nang disuruh sidin meangkatkan baras di pikap sana tu,” ujar Lantui pina nahap banaran wan pander. Apada, betambah bingung ai buhannya neh karena kada tahu apa nang cagaran disuruh Haji Untat tadi. “Iyalah coy. Mun aku ne tesarah ja. Tahu am kawanan aku neh,” sahut Ongol. “Aku sudah tumatan tadi handak mengopi jadi habis mengopi ja kesana,” ujar Anang Gabau.
Dengan senang hati lalu Ongol ne mendangani Utuh Lantui memindahkan baras dari pikap ke toko nang ada diparak pikap tadi. “Ada juakah upahnya ne lah,” ujar Ongol menyindir. “Gampang ja Ngolai, biasanya sidin tu pasti am meupah apalagi nang kita hangkut ne baras baratnya bekilu-kilu,” sahut Utuh Lantui pina nahap banaran.
Baras nang diangkat Ongol tumatan pikap menuju toko ne sudah handak habis alias tetinggal 3 karung ja lagi. Kada berapa menit datang Haji Untat. “Hau, kenapa ikam meangkat baras Ngol. Aku kedida menyuruh ikam paan,” ujar sidin pina nyaring banaran bepander. “Aku ne menyuruh buhan ikam tu handak minta angkatkan lemari nang ada di toko sebelah sana dinaikan ke pikap. Kedida menyuruh meangkati baras ne pang,” ujar sidin menambahi.
Harau langsung habang muha Ongol mendangar pander sidin t adi. “Nah iya am, sudah tepaluh-paluh Ji ai nah ulun neh. Lun kira ne tadi nang ini am nang dihangkut. Eh sekalinya tesalah hangkut am nah,” ujar Ongol pina sangkal bebanaran. Utuh Lantui ne gin nganga-nganga ja muntungnya. “Astahlah, aku minta maaf ai. Aku kira tadi buhan ikam ne disuruh Amang Bular minta angkatkan baras. Sekalinya buhan ikam ne disuruh Haji Untat,” ujar Utuh Lantui pina santai ja menyambati.
Tumatan jauh Anang Gabau wan Dangdut ne kurihing-kurihing ja melihat kelakuan si Ongol nang tesalah hangkut tadi. “Kaya itu am mun begawi tu asal gawi ja. Kada tahu nang cagaran digawi tu eh. Ya nang ini ne pang hasilnya. Uyuhnya ja nang didapat untungnya kedida ya si Ongol ne am. Hahahaha,” ujar Anang Gabau pina mengangkang sorangan

Sumber Berita: http://www.radarsampit.net/berita-tesalah-hangkut.html#ixzz3GxVLDftw