RAJA KERAMPUT




Anang Gabau ni disuruh jadi Ketua Peringatan 17 Agustus di Kampung Liur. Pina merasa mulai baagak am Anang Gabau dengan kawanannya. Gin kaya itu jua pas tedapat dengan Ongol. ”Hau nang apa kabar nih, pabila ikam baulah acara 17-an ,” ujar Ongol.
“Kena Ngol ae, Bupati jar langsung mambuka acaranya. Iyaam ni bulang bulik Jakarta jua maurus lawan presiden soalnya itu koordinasi tarus pang lawan keluarga jua presiden kita ni,” ujar Anang Gabau pina mamasang muha nahap.
“Akui Nang lah ngali jua lah tu sekalinya sampai presiden segala, beaarti ikam ni pembakal yang baurusan panglawan presiden lah,” ujar Ongol.
“Hiih Ngol ae saban hari aku ditelpon Presiden manakon persiapan kaya apa segala pengamanannya, kujawab sudah siap semua, keamanannya bebuhan hansip Utuh Lengkor ku suruh sudah,” ujarnya lagi.
Mandengar kesah kaya itu manggeleng ae Ongol lawan kepala takjub lawan hebatnya Anang Gabau. Pas itu bakesah pulang Ongol ni dengan Haji Untat. “Akui Ji hebat sudah calon pembakal kita ni kada main lagi inya baurusan ke sini hari hari inya batilipunan dengan presiden jarnya,” ujar Ongol sambil maambung jua.
“Bujurlah Ngol, percaya lah ikam lawan Anang Gabau tu, amun aku ni kada percaya penderannya tu, amun ditimbang bisa sapikul sahari karamputnya tu,” ujar Haji Untat membantah Ongol.
Mandengar kaya itu pina masuk pikiran Ongol jua kesahan Haji Untat, lalu buhannya badua ni barencana handak maitihi katulakan Anang Gabau baisukan harinya. “Ngol, Ntat, handak tulak ke Jakarta aku dahulu lah, sekiranya buhan sini bulik memantat kena bulik jua aku nah,” ujar Anang Gabau.
“Oooo ayu ja Nang hati hati ikam lah, hati hati kalo pina pesawat ikam ditembak kada jadi balantik kena uyuh am kita kedida kemanakan presiden di kampung,” ujar Haji Untat sambil maisap ruku.
Malihat kaya itu Ongol wan Haji Untat ni menjalankan strategi ae melihat bujur kadanya tulak ke Jakarta, pina bajalan malenggang sampai batang banyu babaju selawar seraba hirang sampai di pinggiran banyu naik jukung menyubarang ke kampung lain, rupanya Ongol dengan Anang ni pina penasaran.
Diumpati tarus ae, sekalinya sekira 1 kiloan dari kampung pina stop Anang Gabau bajalan   sekalinya kepala baputar putar maitihi urang kalo ada yang malihat. Sekalinya pas pina aman, Anang Gabau rupanya masuk ke pondokan halus lalau baganti baju besapto both mebawa pahat pakai memantat gatah. Iih jua jakanya gatahnya sorang, gatah urang jua dipalarnya. Malihat pina kada kaya itu memoto ae Ongol pas anang Gabau baganti baju, lawan tulak mencuntan gatah urang.
Singkat kesah, sekira jam 2-an datangam Anang Gabau mambawa plastik hirang ganal. “Hau apa dibawa Nang pina banyak banar amun kawa dibagi pang pakai kita,” ujar Haji Untat.
“Iyaam ji ni ngaranya roti Jepang kedida bajual di sini  mahal ji ae kada bolah dibuka kana angin jar makanya babungkus balalpis kaya ni,” ujar Anang.
Padahal sudah tahu am keramput Anang Gabau ni Ongol dengan Haji Untat, lalu pina handak menyupani Anang yang baagak tu ae bedua ni, dibawanya buhannya  hansip mengaku intel dari kampung sebrang, yang ngaranya Utuh Puntal.
“Mohon barang bawaan bapak diperiksa dulu soalnya ada penertiban dari petugas karena diduga barang bawan bapak berbahaya,” ujar Utuh. “Hau apan ni bebuhan ikam kada tahu kah aku ni macan kampung sini, ujar Anang sambil gugup muha. Rupanya takutan jua Anang ni malihat tagas Utuh yang beisi gagada sekira ganal batis gajah tu.
Pas dibuka sekalinya apa yang didapat kepala gatah yang habis dipantatnya di lahan urang. “Naaahhh iyaaam Ngol ae ini ni lain roti ngarannya, kepala gatah, kita suruh inya memakannya kaya rasanya, pina ganal banar keramput bepadah ke Jakarta segala sekalinya menyuntan gatah urang gawian,” ujar Haji Untat.
“Ampun ji jangan dilapur lah aku lawan polisi purun banar pian sampai malapornya,” ujar Anang sambil tatangis tuha

Sumber Berita: http://www.radarsampit.net/berita-raja-keramput-.html#ixzz3GxfQmGli