kisah kesuksesan ongol limbah sma

Ada 3 orang siswa sekolah nang hanyar lulus pas waktu pengumuman SMA hari semalam lalu. Tedapat kesahnya malam harinya. Lalu am bakesah di pos jaga di muara gang Kampung Liur, yaitu si Ongol, si Untat, lawan si Dangdut. Katiga siswa ini handak mamilih tujuan kuliah  masing-masing. ”Uy Ntat, uy Ndut, ikam limbah lulus dari sini handak kuliah kamana?” ujar Ongol batakun.

“Kalu aku handak ka Nipon (Jepang) haja Ngol ’ai. Urang tuha sudah manjual kabun pekat ni gasan persiapan,”  ujar Untat.

”Amunnya aku handak ka Amirika Ngol’ai, handak balajar teknologi di sana. Mantap kalu? Ku suruh abahku manjual jukungnya pakai ku tulakan. Haha. Ikam pang kamana Ngol?” ujar Dangdut lawan Ongol.

“Nah, kalu aku kada handak kamana-mana pang nah. Aku handak batahan di Indunisia sini haja.
Hayoo ae amun ikam di sini tunggui indunesia pakai kita lah. Jagai, jangan dicuntan maling kena, apalagi wayah ini banyak maling badasi, nang ini yang paling bahaya,” ujar Untat dan Dangdut.

10 tahun kamudian. Si Dangdut dan Si Untat bulik ka kampung halaman manamui si kawan bahari, si Ongol, sakalian bareonian sarjana sukses kesahnya neh. “Nah, sudah datangan kakawalanku bahari lih, nang kaya apa di Japang sana Ntat, wan apa nang ikam ciptakan di sana? Kawa jua kah maulah senjata kaya di filem tu?” ujar Ongol betakon.

“Uuuhhh jangan ditakun, ciptaan aku di sana kada sing mudah. Aku manciptakan karita api kaya kilat lui’ai lajunya, kada kawa talihat mata ikam pang gawi lajunnya liwat,” ujar Untat.

“Umaaa…harat banar ciptaan ikam lah Ntat. Kada sing mudah ngarannya amun kaya  itu. Sama kaya kilat jua kalo karamput ikam neh,” ujar Ongol.

”Yaaa…Kada jua kalo Ngol kaya kilat, karamput sadikit ja. Hehehehehe…” ujar Untat.

Lalu ongol manakon lagi lawan Dangdut yang hanyar datang dari Amerika. “Ikam pang Ndut? Apa nang ikam cipta akan di Amirika sana?” Ongol betakon lagi neh.

“Haha…Kada tahu kah kabarnya bahwa aku ni mancipta akan gedung pancakar langit Ngol ae , yang tinggi kawa manjapai awan di langit to nah,” ujar Dangdut.

”Bahhh, harat banar ikam sekalinya Ndut ae, kaada sing mudah amun mancipta akan gadung sampai ka langit.  Kaya tinggi langit tu jua pander ikam yang mengeramput tu,” ujar Ongol lagi.

”Jangan jua dengan kawanan kaya itu nah Ngol. Yaaa…kababawah lah sadikit dari langit karamputnya,” ujar Dangdut.

“Ikam pang Ngol, pina harat muha di kampung ni, kaya ikam ja yang jadi pambakal di sini. Apa nang dicipta akan di Indunisia sini haja? ” tanya Dangdut dan Untat.

”Oooooo…Jangan salah bebuhan ikam. Amunnya aku manciptakan  yang luar biasa, kada kawa diulah di mesin  buatan Japang atau Amirika sana segala. Aku wayah ni gawian mamproduksi anak paling banyak di Indunesia ni, nyaman buhan ikam tahu,” ujar Ongol sambil bukah lawan sepeda motornya bemerek Taro nang bunyinya kaya mesin jahit jaman panjajahan. (ang)

Sumber Berita: http://www.radarsampit.net/berita-kesah-kesuksesan-ongol-limbah-lulus-sma-.html#ixzz3SdP5W2T5

pondok betihang tinggi

Sekalinya Haji Untat ne hinip-hinip bisi rumah tihang tinggi wadahnya ada di kebun alias rumah pondok. Amun kada tinggi pondoknya bisa di masuki binatang ada nang ada di hutan Kampung Liur. “Ikam guring sini ja Ngolah. Hadangi aku handak menyubarang menukar hantalu gasan kita makan siang,” pesan Haji Untat. “Inggih Ji, jangan tapi lawas lah. Masalahnya ulun kada wani jua sorangan eh. Hehehe,” sahut Ongol. “Okelah kalo begitu, hadang ja lah  dipondok neh. Oke,” ujar Haji Untat.
Handap kisah, rupanya Haji Untat ne memang lawas meninggalkan Ongol di kebun karena mencari hantalu itik ngalih di Kampung Liur neh maklum kedida nang ketujunya beternak ayam ras. “Dasar jua sidin neh. Tapi bepadah setumat sekalinya lawas jua ai. Guring dulu aaaahhhh,” ujar Ongol sambil merabahkan awaknya diatas tikar purun.
Kada terasa teguring jua akhirnya Ongol neh, pas kada berapa menit datang Anang Gabau wan Dangdut, lalu bedua neh duduk dibawah berumahan pondok nang betihang tinggi tadi. “Ujar Haji Untat tadi kita disuruh meantar hantalu itik ne kepondok sidin. Tapi, kedida siapa-siapa di pondok neh. Iya am,” ujar Anang Gabau. “Kita tunggu sidin ai datang, iya kalo,” sahut Dangdut. “Ya am, mun menunggu sidin datang cagaran bebial-bial jua awak ne coy ai. Maklum benyamuk rangit dikebun sidin neh,” ujar Anang Gabau.
Merasa benyamuk tadi, lalu buhannya membakar rumput karing pas dibawah pondok betihang tinggi. Sekalinya asapnya tu naik pas tecium si Ongol nang lagi hayal guring siang didalam pondok. “Kebakaraaaan, kebakaraaaan,” kuriak Ongol bahancap beluncat tumatan atas pondok betihang tinggi tadi. Mendangar ada nang gugur mendabuk tumatan atas harau takelipik buhan Anang Gabau wan Dangdut. “Ada nang gugur mendabuk tumatan atas pondok,” ujar Anang Gabau. “Jangan-jangan buah durian coy ai. Ayo kita cari,” sahut Dangdut.
Sekalinya, nang didangar buhannya tadi gugur mendabuk tu sekalinya si Ongol. “Astah, ikam kah Ngol,” takon Anang Gabau. “Kenapa ikam eh Ngol berabah diatas licak,” ujar Dangdut. “Aku tadi melihat ada asap didalam pondok tu wal ai. Aku kira tadi ada kebakaran makanya aku behancap beluncat tumatan pondok tu am,” ujar Ongol mengisahkan.
Mendangar kisah Ongol ne tadi, harau mengangkang buhannya. “Hua hahahaha, asap tu lainan kebakaran Ngol ai. Kami membakar rumput karena dikebun Haji Untat neh benyamuk rangit. Makanya kami asapi,” ujar Anang Gabau. “Ya am, guring hayal eh kada menjanguk lagi am kebawah asal beluncat ja. Sekalinya beluncatnya dipadang licak. Hahahahaa,” ujar Dangdung menambahi. “Kami kesini Ngolai disuruh Haji Untat meunjuk hantalu itik gasan di pondok jar. Eh sekalinya bedapat wan durian gugur mendabut tumatan pondok betihang tinggi. Hahahaha,” ujar Anang Gabau. Harau masam muha Ongol disambati bebuhannya, kelimbahannya sakit pinggang jua si Ongol. Maklum beluncat dipondok betihang tinggi. (*/fin)

Sumber Berita: http://www.radarsampit.net/berita-pondok-betihang-tinggi.html#ixzz3JzLtodCo

tagih hutang

HARI semalam Ongol terlihat pina siap-siap handak bejalan menuju jembatan wadah biasa bebuhannya bedudukan. Belum tulak inya melihat ada Haji Untat lewat dihadapan rumah inya. “Handak kemana pian Ji,” takon Ongol. “Handak ke pasar Ngolai, handak menukar bola lampu. Maklum, kerancakan mati lampu neh banyak bola lampu dirumah ku yang pagat,” sahut sidin. “Bujur tu Ji ai, diwadah ulun gin hanyar semalam ja mengganti. Sama nasibnya wadah pian,” ujar Ongol.
Tuntung bepanderan wan sidin lalu Ongol siap-siap tulak. “Santai disana gin ai, soalnya banyak kekawalan disana sambil barokoan cap pekat, hehehe,” garunum Ongol sambil mengujak sepeda ontelnya. Sekalinya dalam perjalan inya ne bepadat wan Anang Gabau. “Kejembatankah Ngol,” takon Anang Gabau. “Ya am wal ai, handak kesana nah. Mun ikam pang kemana,” sahut Ongol sambil betakon jua. “Lebih baik kita makan gorengan di warung Acil Jablay daripada di jembatan kedida nang dimakan kecuali roko tu am nang disikat,” ujar Anang Gabau. “Oke wal, kita ke warung sidin ja,” sahut Ongol.
Akhirnya niat handak bedudukan di jembatan kada jadi karena ada kawan Ongol nang membawai makan gorengan di warung Acil Jablay. Baya sampai diwarung wan imbah memarkir sepeda ontelnya lalu Ongol memesan gorengan nang biasa inya makan diwarung Acil Jablay neh. “Pisang goreng bagumpal Cil ai,” ujar Ongol. “Tenang Ngol, sudah aku siapkan gasan bebuhan ikam,” sahut sidin.
Rahatan memakan pisang goreng bagumpal kada berapa menit datang Haji Untat. “Asiiieeek, sesepuh Kampung Liur datang kesini wal ai. Biasanya sidin pang nang membayari neh mun sidin ada diwarung, hehehe,” ujar Ongol. “Kada harapan Ngol ai. Sidin semalam tekor menjual pekat,” sahut Anang Gabau. “Kita lihat ai kena. Aku yakin ja sidin nang membayari gorenga kita neh,” ujar Ongol pina semangat bebanaran.
Kada berapa menit imbah membungkus gorengan didalam plastik, lalu Haji Untat ne bulik am sampai tenganga muntung Ongol. “Hari semalam ada angsulan menukar gula rahatan ikam ku suruh ke warung. Nah  angsulannya tu ikam unjuk wan Jablay. Artinya ikam nang membayari gorengan nang aku bawa neh. Oke Ngol,” ujar sidin. “Jablay, nang membayari ne Ongol lah,” kuriak sidin. “Inggih Ji,” sahut Acil Jablay.
Mendangar pander Haji Untat tadi, harau masam muha Ongol sampai handak kada kawa bepander lagi am. “Hua hahahaha, rupanya Haji Untat datang ke warung Acil Jablay ne handak menagih hutang Ongol wan sidin,” ujar Anang Gabau pina mehulu-hulu banaran. Harau kada bunyi lagi am Ongol karena supan muha disambati Haji Untat. “Makanya jangan pina musti paan tadi. Kehandak sidin nang membayarkan ternyata sidin nang menyuruh ikam Ngolai, hahahaha,” ujar Anang Gabau pina behimat banaran menyambati.
Akhirnya, kada jadi makan gorengan Ongol ne karena duit nang dibawanya tumatan rumah tadi habis gasan membayari gorengan nang dibawa Haji Untat tadi. “Berapa butingkah nang dibawa Haji Untat tadilah,” takon Anang Gabau. “Dua puluh buting coy ai. Maka aku hanya membawa Rp20 ribu ja nah. Habis am gasan membayari sidin ja duit nang ada neh,” sahut Ongol pina masam muha. (*/fin)

Sumber Berita: http://www.radarsampit.net/berita-tagih-hutang.html#ixzz3JzLAx57E

tanggal habang

Sore tu Haji Untat mendatangi bebuhan Ongol nang lagi asik bedudukan di jembatan karena memang jadwalnya kedida nang begawinya maklum hari libur nasional. Kedatangan sesepuh Kampung Liur tu menyarui bebuhannya bada magrib kerumah sidin. “Bada magriblah kerumah ku,” ujar sidin. “Okey Ji,” sahut Ongol pina semangat bebanaran. “Nang hadir dapat HP seikung-ikung,” ujar sidin sambil meninggalkan bebuhannya nang masih bedudukan dijembatan.
Karena dijanjikan cagaran dibari HP oleh sesepuh Kampung Liur apada bebuhannya baya habis berdoa di masjid Jami Kampung Liur langsung bukah menuju kerumah Haji Untat. Binggung Haji Walet melihat kelakukan bebuhan Ongol neh.
Hitungan menit ja sampai am bebuhan Ongol kerumah Haji Untat nang memang jaraknya kada jauh tumatan masjid Jami Kampung Liur. “Ooohh, baselamatan coy ai. Apa maksud sidin ne lah,” takon Ongol pina bingung sorangan. “Mungkin tuntung baselamatan ne kalo Ngol kita dapat HP sesuai wan janji sidin tadi sore,” ujar Anang Gabau. “Mungkin ai, kita tunggu ai kena,” sahut Ongol.
Handap kisah, tuntung doa selamat diteruskan wan makanan, imbah kanyang lalu bebuhan kampung ne bulikan kerumah masing-masing. Tapi, bebuhan Ongol ne baluman bulik jua karena handak menagih janji nang pernah diucapkan sesepuh Kampung Liur. “Mana janji pian tadi sore tadi Ji,” takon Ongol pina penasaran banaran. “Sabar ja tu lagi diikatkan dibelakang. Hadanglah,” sahut Haji Untat.
Menunggu ai bebuhannya sambil barokoan cap pekat. Kada berapa datang pulang Haji Untat membawakan nang baikat-ikat dibahu inya itu. “Nah ini bawa bulik lah. Sudah aku bagi am seikat-ikat,” ujar sidin. Melihat nang baikat-ikat tadi, menyupah Ongol neh. “Nang ngini Ji ai humbut pekat. Jar pian tadi kami dapat HP kenapa humbut pekat neh,” ujar Ongol pina panas hatinya melihat kelakukan sesepuh Kampung Liur neh.
Dengan sabar Haji Untat menyahuti apa nang ditakoni si Ongol ne tadi. “Kada salah jar ikam tu Ngol ai. Ne memang humbut pekat. Artinya kalau disingkat menjadi HP alias humbut pekat,” ujar sidin. Langsung habang muha Ongol mendangar sahutan sidin tadi. “Harau dibongoli sidin,” ujar Ongol geleng-geleng kepala. “Sesuai wan janji aku tadi sore. Ya sudah ai bawa ai HP ne masing-masinglah,” ujar sidin. Apada, rahatan masam-masam muha tu am bebuhan Ongol menggendong humbut pekat masing-masing dibahunya. (*/fin)

Sumber Berita: http://www.radarsampit.net/berita-dapat-hp.html#ixzz3JzItZAVB

dapat hp

Sore tu Haji Untat mendatangi bebuhan Ongol nang lagi asik bedudukan di jembatan karena memang jadwalnya kedida nang begawinya maklum hari libur nasional. Kedatangan sesepuh Kampung Liur tu menyarui bebuhannya bada magrib kerumah sidin. “Bada magriblah kerumah ku,” ujar sidin. “Okey Ji,” sahut Ongol pina semangat bebanaran. “Nang hadir dapat HP seikung-ikung,” ujar sidin sambil meninggalkan bebuhannya nang masih bedudukan dijembatan.
Karena dijanjikan cagaran dibari HP oleh sesepuh Kampung Liur apada bebuhannya baya habis berdoa di masjid Jami Kampung Liur langsung bukah menuju kerumah Haji Untat. Binggung Haji Walet melihat kelakukan bebuhan Ongol neh.
Hitungan menit ja sampai am bebuhan Ongol kerumah Haji Untat nang memang jaraknya kada jauh tumatan masjid Jami Kampung Liur. “Ooohh, baselamatan coy ai. Apa maksud sidin ne lah,” takon Ongol pina bingung sorangan. “Mungkin tuntung baselamatan ne kalo Ngol kita dapat HP sesuai wan janji sidin tadi sore,” ujar Anang Gabau. “Mungkin ai, kita tunggu ai kena,” sahut Ongol.
Handap kisah, tuntung doa selamat diteruskan wan makanan, imbah kanyang lalu bebuhan kampung ne bulikan kerumah masing-masing. Tapi, bebuhan Ongol ne baluman bulik jua karena handak menagih janji nang pernah diucapkan sesepuh Kampung Liur. “Mana janji pian tadi sore tadi Ji,” takon Ongol pina penasaran banaran. “Sabar ja tu lagi diikatkan dibelakang. Hadanglah,” sahut Haji Untat.
Menunggu ai bebuhannya sambil barokoan cap pekat. Kada berapa datang pulang Haji Untat membawakan nang baikat-ikat dibahu inya itu. “Nah ini bawa bulik lah. Sudah aku bagi am seikat-ikat,” ujar sidin. Melihat nang baikat-ikat tadi, menyupah Ongol neh. “Nang ngini Ji ai humbut pekat. Jar pian tadi kami dapat HP kenapa humbut pekat neh,” ujar Ongol pina panas hatinya melihat kelakukan sesepuh Kampung Liur neh.
Dengan sabar Haji Untat menyahuti apa nang ditakoni si Ongol ne tadi. “Kada salah jar ikam tu Ngol ai. Ne memang humbut pekat. Artinya kalau disingkat menjadi HP alias humbut pekat,” ujar sidin. Langsung habang muha Ongol mendangar sahutan sidin tadi. “Harau dibongoli sidin,” ujar Ongol geleng-geleng kepala. “Sesuai wan janji aku tadi sore. Ya sudah ai bawa ai HP ne masing-masinglah,” ujar sidin. Apada, rahatan masam-masam muha tu am bebuhan Ongol menggendong humbut pekat masing-masing dibahunya. (*/fin)

Sumber Berita: http://www.radarsampit.net/berita-dapat-hp.html#ixzz3JzItZAVB

lawang bungkas

HARI semalam Ongol meninggalkan rumahnya bejalan supaya aman inya ne mengunci lawangnya. Imbah tu langsung ai bejalan mendatangi bebuhan Anang Gabau nang sudah mehadangi di jembatan sambil berorokoan cap pekat. Rahatan berokoan tedangar suara mengeluap dibayu. “Hah, apa nang gugur tu Ngol tumatan kantong ikam,” takon Gabau. “Paling duit selawian,” sahut Ongol pina kada tetahu paan maklum roko cap pekat tinggal sedikit lagi jadi pina ngalih bebanaran membuangnya. “Kada barang berhargalah Ngol,” takon Dangdut.

 “Kada beisi barang berharga paan coy,” sahut Ongol tetap ja pina tamam lawan muha.

Handap kisah, lawas bekisahan sampai habis roko sebungkus cap pekat lalu bebuhan bulikan. “Kita singgah kerumah Ongol ja yu,” ujar Dangdut. “Nah, sip walai. Kawa jua kita berabahan satumat dipelataran rumahnya tu,” sahut Gabau pina semangat bebanaran.

Lalu betiga ne bulik menuju kerumah si Ongol. Bebaya sampai kerumah pina telihat habut Ongol ne. “Hau, mananya kunci rumah ne,” ujar Ongol pina kipuh banaran gagap sana gagap sini lawan kantung selawar. “Nah hikamai, kadakah nang gugur dijembatan tadi,” sahut Gabau sambil berabaham pas sampai dirumah Ongol. “Kemungkinan tu,” ujar Ongol pina kipuh banaran memikirkan anak kunci tadi.

Lalu Gabau mencoba menggutak engsel kunci lawang. Blutak gutak tak tak. “Harau memang bekunci Ngolai,” ujar Gabau pina pasrah. Kada berapa menit Ongol pulang mencoba menggutak engsel kunci. Blutak gutak tak tak.. prak. “Nah hikamai, patah am,” ujar Ongol pina masam muha melihat engsel kunci lawang ampun inya patah. “Bah iya pang, camuham,” ujar Dangdut umpat jua menyambati.

Apada, mau kada mauai meambil jalan pintas. “Ambil linggis, bongkar ja lawangnya tu,” ujar Gabau. Harau mandam Ongol mendangar cagaran dirusak lawang rumah. “Cagaran kada bekunci am rumah ne lah,” ujar Ongol tesandar didinding pelataran rumah. “Mau kada mauai, daripada ikam guring dipelataran rumah ne,” sahut Gabau.

Harau hitungan menit lawang nang tekunci tadi habis dibongkar Gabau lawan Dangdut. “Hau, apa ne ah. Kayanya kunci rumah neh,” ujar Gabau pas melihat ada anak kunci gugur tumatan atas lawang. “Nah hikamai, ne anak kunci cadangannya. Aduhlah, kenapa aku kada tepikir kesitu tadilah. Nah iya am,” ujar Ongol sambil meingkuti kepala. Apada, masam ai muha Ongol. Harau mau kada mau ai semalaman kada karuan guring, mun lawang kada bekunci karena dibungkas paksa, terpaksa ai jadi jamal alias jaga malam. “Iya am, nasib-nasib,” ujar Ongol pina menggarunum. Bebuhan Gabau lawan Dangdut ne bulikam pas sudah membungkas lawang Ongol nang tekunci tadi. (fin)

Sumber Berita: http://www.radarsampit.net/berita-lawang-bungkas.html#ixzz3JzHzGAja