ongol keguguran

Salawas batianan anum, bini Ongol panimburuan banar. Apalagi wayah Ongol katahuan ada main wan Acil Irul. Kamana-mana Ongol musti dicurigai, sampai kada kawa bagarak matan rumah. Pabila bulik kantur talambat sadikit haja, muha bininya langsung berot. Apalagi bila sampai tangah malam, bisa berhari-hari sariknya.
Hanyar tadi Ongol disaru Acil Irus basalamatan mahaul arwah lakinya. Undangan diantarakan langsung ka rumah Ongol, kabalujuran nang manarima bininya. Surat undangan itu laluam langsung disimpannya, biar Ongol kada mambaca wan kada baniat tulak saruan. Tapi Ongol tedapat lawan Anang Gabau wayah sambayang ashar di masjid.
“Uiiii... Ngol, adalah ikam manarima undangan Acil Irus, malam ini sidin basalamatan?” ujar Anang.
“Kadida Nang ai. Pasti undangan basaruan itu kada disampaikan biniku. Bila inya nang manarima musti disimpaninya, kada dipadahakannya wan aku,” ujar Ongol.
“Tapi... Walaupun unda kada manarima undangannya, malam ini aku tulak jua,” ujar Ongol pulang.
Malam Ongol mamikirakan nangkaya apa caranya sakira inya kawa kaluar rumah. Lalu inya dapat akal lalu bapadah wan bininya handak ka rumah pambakal, ada urusan panting. Imbah bahadangan sampai batangah jam hanyar takumpulan, lalu tulakan baimbai ka rumah Acil Irus.
“Bubuhan ikam ini bisa banar maatur waktu, wayah urang tuntung mambaca doa wan handak basusurung hanyar datangan. Makanya tugas bubuhan ikam kaina umpat basisimpun wan langsung babasuh piring,” ujar Haji Untat manyindir.
“Kalu di rumah Acil Irus jangankan babasuh piring, bamalampun kami kada kabaratan,” sahut Ongol manimpali panderan Haji Untat. “Ayu silakan makanan, maka saadanya,” ujar Acil Irus.
Karna bubuhannya datang talambat maka tapaksa dudukan parak lawang haja. “Aku katuju haja parak lawang nyaman mambelokkan ka higa,” ujar Ongol sambil manghabiskan dua piring iwak. “Uma ai lakasnya ikam maka Ngol, sudah dua piring iwak hayamnya habis,” ujar Anang.
Imbah tuntung makanan lalu bubuhannya bulikan. Wayah turun tangga karna kadap rupanya si Ongol tajarungkup ka tanah. Bubuhannya galu malihat Ongol tahantak, apalagi imbah malihat matan tapih Ongol kaluaran darah habang.
“Ongol... Ongol kaguguran, darahnya kaluaran tarus,” ujar Anang Gabau sambil maangkat Ongol dan mambuka tapihnya nang mahabang.
“Jangan ribut, nang batianan itu biniku lain unda pank. Mustahil unda lalakian bisa kaguguran,” ujar Ongol sarik.
“Darahnya babau, babau ganyir, pina baminyak dan ada lumbuknya,” ujar Anang mulai curiga.
“Astaga rupanya ikam mambarakat iwak hayam dalam tapih,” ujar Anang langsung manyambati Ongol karna katahuan kabiasaan buruknya bila saruan. (tha)

Sumber Berita: http://www.radarsampit.net/berita-ongol-kaguguran.html#ixzz3JbkWGzt8