seribu ciuman



GAWIAN memekat di kampung Liur sudah kada kawa lagi diandalkan.  Musababnya nang tukang tukari kerida lagi. Maklum harga pekat sudah jatuh banaran. Dengan barat hati, buhan Ongol tapaksa merantau ke kota untuk mencari gawian hanyar. Sudah satangah tahun Ongol wan Anang Gabau begawi di toko material encek Kelolong.
Satiap bulan anum buhannya bakirim duit gajih gasan kaluarga di kampung Liur. Tapi, lantaran encek Kelolong baisian bini banyak, tokonya mendadak bangkrut. Buhan Ongol kena imbasnya dan tekena PHK. Encek Kelolong kada kawa lagi menggajih pegawainya tamasuk Ongol wan Anang Gabau.
Dua bulan imbah kada saling gawian Ongol wan Anang Gabau masih kawa haja bakirim duit karna dapat duit pasangun matan bakas wadahnya bagawi itu. Tapi imbah handak parak bulan katiga bubuhannya cinik mamikirakan duit nang mana nang handak dikirim ka anak- bini.
“Nangkaya apa Ngol? Sabarataan parusahaan sudah kita masuki tapi mulai ampih bagawi sampai wayah ini kada saling dapatan jua,” ujar Anang Gabau wayah badudukan mangupi di warung Acil Siti.
“Basabar wan baikhtiar haja  Gabau ai, sabab aku jua kabingungan, bulan dudi ini kada ada nang kawa dikirimakan lagi,” ujar Ongol.
“Nangkaya apa kalu kita bulik kampung haja? Karna sasakit-sakitnya hidup di Kampung masih ada haja kaluarga atawa karabat nang kawa dimintai tulung,” ujar Gabau.
“Supan Bau ai. Mambari supan supan banar apabila kita tabulik pulang ka kampung,” ujar Ongol.
Akhirnya, pas awal bulan tapaksa Ongol bakirim surat gasan bininya Siti Asoy handak mamadahakan bahwa inya bulan ini kada kawa mangirimi duit.
“Ading sayang.. Maapakan kaka bulan ini kada kawa mangirimi duit gasan kaparluan di rumah. Mudahan ading kawa mamakluminya, kaka hanya bisa mangirimi saribu ciuman haja…,” ujar isi surat  Ongol.
Dihadang-hadang sampai saminggu hanyar datang surat balasan matan bininya di kampung.
“Ngol… ui  Ngol, ini nah ikam dapat kiriman surat matan bini ikam,” ujar Gabau sambil manjulung lalu Ongol mambukanya bagamat.
“Napa kesahnya Ngol? Ada habar napa di kampung?” ujar Gabau.
“Kaka Ongol tarsayang… Tarima kasih sudah mangirimi saribu ciuman. Karna ulun harus batatukar wan babayar macam-macam gasan kaparluan di rumah dan pian cuma mangirimi saribu ciuman, maka ulun handak malapurakan pangaluaran kaluarga. Tukang minyak hakun dibayar wan tiga ciuman satiap manukar salitar, tukang listrik hakun dibayar wan limabalas ciuman satiap tanggal sapuluh. Hutang lawan Haji Untat hakun dibayar bacicil satiap harinya wan lima kali ciuman. Cuma Utuh Lengkor ampun rumah nang kita siwa kada hakun dibayar wan ciuman, sidin handaknya dibayar wan nang lain, tapaksa ulun bari haja,” ujar surat balasan bininya.
“Bau…ui Gabau, tulungi ingkuti aku, panjanakku asa raum. Kapalaku asa baputar-putar!” ujar Ongol kukuciak mangiyau Gabau.

Sumber Berita: http://www.radarsampit.net/berita-seribu-ciuman.html#ixzz3GxW01Cfl