Handak
parak pemilihan Kepala Desa di Kampung Liur nih, Pak Camat meminta
bebuhan anak mudanya bajaga setiap malam di Pos ronda nyaman kampung
aman jar sidin, supaya maling takutan jua supaya kadida bang handak
bekalahian jua jar antar pendukung calon Kades.
Mendangar kayaitu laluai Haji Untat sebagai ketua RT meolahkan gasan
buhan Ongol nih Jadwal bajaga malam sakira rami dikumpulkan akan sidin
setiap malam buhan babujangannya betiga setiap malam, pas takana malam
jumahat yang jaga ronda Ongol,Garbus,Anang Gabau,Haji Walet, lawan Julak
Gundul.
“han pas kalo kami be lima takana jaga malam jumahat pulang,” ujar
Ongol pas melihat jadwal jaga nang diolah Haji Untat. “pian pebila jaga
ji..?,” Ujar Ongol Batakun. “aku hari Selasa malam Arba haja ngol ae
sakira kada kana jadwal dirumah, hahaha………..,” ujar Haji Untat tetawa.
Asa sangkal ada jua dalam hati Ongol bisa banar Haji Untat neh meolah
jadwal ujarnya bagarunum dalam hati, dua minggu lagi nih Anang Gabau
handak bekawinan dengan anak Acil Jablay nang hanyar tuntung sekolah
pasti rami banar kampung nih banyak orang dari kampung sebalah handak
datangan.
“tanggal berapa ikam kawin Nang,”ujar Ongol Batakun dengan Anang
Gabau, “dua minggu lagi Ahad yang akan datang, ini pang kami sambil
besiap-siap jua lagi gasan kawinan meolah panggung gasan buhan kampung
liur bedangdutan,” Ujar Anang Gabau.
Pas bajaga malam jumahat di Pos ronda buhanya rami banar manakoni
Anang Gabau apa haja lagi yang handak disiapi gasan kawinannya, “Ikam
sudah besiap gasan wadah memasak segala lah Nang,” ujar Garbus betakon.
Inya kebiasaan pang bila bekawinan di Kampung Liur bemasakan Nasinya
pasti buhan lakian beramian didapur meolah atang wadah memasak nasi.
“baluman lagi kena haja jar pas empat hari handak kawinan hanya
beolah ujar mintuha ku,”ujar Anang. “ayuha kena bila ada yang handak
ditolongi kuyau kami lah Nang, sakiranya pakah yang kawa menolong
kawan,”Ujar Ongol dengan Garbus.
Pas Ahad kawinan Anang Garbus banyak banar yang datang dari kampung
Walet subarang Kampung Liur mendatangi kawinannya soalnya buhan Acil
Jablay ne asalnya dari Kampung Walet pindah kekampung Liur bediam
pulang, “Rami banar lah Kawinan Anang Gabau,” ujar Ongol bepadah lawan
Garbus soalnya buhannya bedua disuruh jaga manyusun parkir oleh Haji
Untat.
Lewat sudah dua bulan kawinan Anang Gabau, minggu-minggu sebelum
kawin Anang Gabau rajin aja turun bejaga di Pos ronda dengan buhan Ongol
dengan Garbus kenapakah imbah kawin lalu tejarang sebulan paling kawa
turun sekali Anang Gabau. Pas malam jumahat jaga ada ae Haji Untat
datang ke pos membawa wadai gasan buhannya jaga.
“kenapa nih be ampat haja mana Anang Gabau,”ujar Haji Untat. “tahu ji
kedida lagi sampai jam 11 telihat urangnya, garing kalo,”Ujar Ongol
menyahuti. “selawas habis kawin Anang Gabau garing tarus bepadah makanya
kada kawan turun, lihat haja kena kada berapa lawas lagi Bininya tu
yang garing, awak bininya langsung pina
belamak,hahahahahahaha……………………”Ujar Garbus langsung tetawa.
“pina hapal ikam Bus ae, sorang balum kawin lagi, hahahaha”ujar Haji Untat tetawa jua.
Lalu ae Ongol menyahut “ulun kena bilanya sudah kawin ampih sudah
bejaga Pos garing haja ulun tarus nyaman bini lakas lamak,hahahaha…”ujar
Ongol tetawa umpat mehuluti jua, apa ada se’posan tetawa haja mehuluti
Anang Garbus.(dc)
Langganan:
Posting Komentar (Atom)
0 komentar:
Posting Komentar