kacamata beembun

AKHIRNYA nyaman jua penjanak Ongol, maklum sudah mengukur kacamata diwadah Ibus Jabrik walau sempat tesalah pakai tapi kada masalah nang penting bekacamata. “Ada nang beda kawan kita hari walai,” tagur Dangdut. “Iyaam, meumpati model Afgan kawan seikung ne,” ujar Utuh Lengkor menambahi. “Daripada ja tu, umpat tenar maklum wayah ini nang kada rusak matanya gin handak jua bekacamata biar telihat keren,” ujar Dangdut pina mehulu banar lawan Ongol. Tapi Ongol ne kerenyem-kerenyem ja muntungnya. “Tesarah buhan ikam ja wal menyambati kaya apakah nang penting aku penjanak nyaman,” ujar Ongol didalam hati. Rahatan menyambati Ongol, datangai Anang Gabau. “Datang mana ikam wal,” takon Dangdut. “Datang wadah Haji Untat meminjam sepeda motor handak kewarung Acil Jablay,” sahut Anang Gabau. “Handak beapa ikam kesana,” takon Dangdut pulang. “Menukar roko cap pekat,” sahut Anang Gabau sambil membawai Ongol. “Ikam dangani aku kewarung Acil Jablay. Tapi, ikam nang menyetirnyalah,” ujar Anang Gabau. “Okelah kalo begitu,” sahut Ongol. Handap kisah, dalam perjalanan handak bebulik harinya pina kelihatan hirang banar. “Nah hikamai, cagaran behujan kita bulik ne,” ujar Anang Gabau. “Kada papa paan, nang penting selamatkan roko dulu amun baju, selawar lawan awak ne biaram basah,” ujar Ongol. “Harau bujur jar ikam Ngolai, amun baju, selawar  lawan awak ne kada ja dikaringkan amun roko basah harau membuang tupang,” sahut Anang Gabau. Ditengah perjalanan, hujan turun sangat derasnya sehingga ngalih banar melihat jalan apalagi hujannya kaya hujan ditawak lawan batu. “Akai, hujan ne walai hujan batu sakit banar awak dihantamnya nah,’ ujar Ongol. “Beranai ja ikam Ngolai, fokus dihadapan ja,” suruh Gabau. “Bujur japang, tapi, hujan ne nah,” ujar Ongol sambil memusut-musut awak lantaran kesakitan dihantam hujan deras tadi. Rupanya hujan ne semakin deras banar, pas berada disimpang tiga kenapakah kacamata Ongol ne beembun, lalu ngalih melihat jalan. “Hau, hau, hau, hau, ne belokkah atau lurus,” takon Ongol. “Lurus kalo Ngol,” sahut Anang Gabau kada melihat lagiam jalan dihadapan alias asal sambat. Merasa sama-sama kada melihat jalan tadi, lalu ai Ongol mengambil jalan lurus dengan kecepatan tinggi. “Astaga, salah Ngoooooool, belok kiri,” kuriak Anang Gabau. Kada berapa menit tedangar suara, bruaaaar, kretek tek. Sekalinya bedua ne merojok parit. Ongol teserudup kepadang sabat, Anang Gabau tetajak dilumpur. Beuntung japang ada Haji Nahap lewat pakai mobil butut sidin. “Hau, siapa nang merojok parit disana tu,” garunum sidin. Pas ada dilokasi harau tekajut sidin. “Astaga, kenapa buhan ikam merojok parit ne,” takon sidin. “Anuah Ji, kacamata ulun ne pang baembun takena hujan lalu ngalih melihat jalan,” padah Ongol. Mendangar kisah Ongol tadi, harau mengangkang Haji Nahap. “Amun ikam ngalih melihat jalan tu Ngolai, ganti Anang Gabau nang menyetir sepeda motor. Akhirnya masuk parit buhan ikam, hua hahahaha,” ujar Haji Nahap pina kada tetahu paan lawan muha. “Jakanya menolongi, ne menyambati. Dasar Haji Nahap, Nahap, Nahap,” garunum Ongol sambil mencabut Anang Gabau nang tetajak dilumpur tadi. Roko cap pekat hancur gara-gara basah lawan masuk lumpur. (fin)

Sumber Berita: http://www.radarsampit.net/berita-kacamata-beembun.html#ixzz3JzBWilsD