temakan tahi kucing

BERAPA Minggu ni, warga Kampung Liur merasa waswas meninggalkan rumah dalam keadaan kosong. Karana sudah sepuluh labih rumah dibobol pelaku pencurian.
H Untat sebagai kepala Kampung Liur mengeluarkan pengumuman bergiliran jaga malam di poskamling di tiga RT. Kebelujuran Ongol, Anang Gabau, Utuh Lengkor, Utuh Kalubut mendapat tugas bajaga di pos RT 001.
Malam tu, sambil bajagaan urang baampat meisi waktu main domino lawan makan buah tiwadak limbah memutik di higa pos jaga. “Ni sudah malam ke berapa lah kita bejagaan,” takon Ongol lawan bubuhannya.
“Sudah malam ke lima Ngol ai, kada terasa lah kita bejagaan. Tapi selawas kita bajagaan pina kedida tedangar ada rumah nang dibobol maling lah,” sahut Anang Gabau.
Kada seberapa datang H Untat naik motor tuha, mulai dari jauh buhan Ongol sudah mendangar suara nyaring motor H Untat. “Uuuiii, pina santai banar lah urang kam ni, kada pakai duit lo lah main domino tu,” jar H Untat sambil menyenderkan motor sidin di higa puhun tiwadak.
Limbah memarkir motor, H Untat umpat duduk di pos sambil bakisahan lawan buhan Ongol. Jar H Untat, berapa malam ni sidin pina kada kawa guring, khawatir lawan keamanan kampung.
“Dua malam lalu, giliran rumah H Tono di RT 003 nang di bobol maling, rumah sidin kosong ditinggal tulak umrah,” kisah H Untat lawan bubuhan Ongol.
“Astah lah, apa jua nang hilang Ji, bebaik TV lawan kulkas sidin di hangkut maling,” takon Utuh Kalubut.
“Iih But ai, selain TV lawan kulkas, selawar hendep pun H Tono gin dihangkut maling jua. Makanya kita behati-hati ai, bila ada urang nang mencurigakan takoni tujuannya datang ke kampung kita,” pesan H Untat sambil takurihing.
Kada terasa, buhan Ongol hayal bakisahan sampai tangah malam. Sambil minum kopi, buhannya mengipungi buah tiwadak nang diputik Utuh Lengkor di puhun tiwadak sebelah pos.
“Akui lah, apa ja urang kam bantas ni, buah tidawak ja lingis. Maka tadi Acil Jablay ku suruh meantar wadai gasan urang kam,” jar H Untat melihat talam lingis kedida wadai nang tesisa.
“Inggih Ji ai, haur bemakanan ja buhannya ni. Limbah ronda begantian, sampai di pos langsung manungap wadai, apa da kada terasa wadai setalam lingis,” sahut Ongol.
Rupanya, malam tu parut H Untat menggelorok lapar jua. Sidin lalu mengumpuli biji tiwadak ke dalam talam, imbah tu memaraki api bakaran kayu di muka pos nang dihidupi Ongol pas buhannya bajagaan.
“Mang Haji, meapa pian tu pina beparak lawan api,” takon Gabau.
“Kada ai, aku handak mambanam biji tiwadak ni ai, sayang kada temakan dibanam ja nyaman jua dikipungi,” jar H Untat sambil menimbai 10 biji tiwadak ke bara api.
Limbah tu, buhan Ongol kada tetahu lawan H Untat nang sibuk me bolak balik mambanam biji tiwadak. Urang Ongol gin sibuk bemain domino jua.
Kada seberapa, H Untat mengiau Lengkor minta ambilkan talam. Lalu sidin mengikih abu mengumpuli biji tiwadak dibuat sidin dalam talam.
Sudah tu, sidin duduk ke pos sambil meandak talam. “Na, dah masak am biji tiwadaknya, baik di banam kawa jua dimakan biji tiwadak ni,” jar H Untat.
Sambil duduk, H Untat membagi rata biji tiwadak hangit gasan buhan Ongol. Limbah tu sidin takajut, jar sidin tadi baya mambanam 10 biji ja, kanapa imbah di hitung jadi 11 biji.
“Na sudah ku bagi rata gasan kita belima, dua biji sorang, tapi kanapa belabihan sebiji lah, maka aku tadi baya membanan 10 biji ja, ni malah jadi 11 biji,” jar H Untat bingung.
Kada seberapa, Ongol menyahut ,”syukur ai ji, tu rajaki pian nang mambanam biji tiwadak segala, kalo pian kada ingat memang mambanam 11 biji,” jar Ongol sambil diiyakan buhan Gabau, Lengkor lawan Kalubut.
“iih lo Ngol lah, kita syukuri ja rajaki pemberian Allah SWT ni, kalo aku salah hitung tadi lah membanam 11 biji, ta hitung 10 biji ja,” ujar H Untat.
“Gih Ji, ujar kada buleh meambil rajaki urang, karana pian nang paling tuha pian ja nang tiga biji nya, buhan ulun ni dua biji gin sudah cukup am,” terang Gabau.
Sambil bakisahan, Ongol, Gabau, Lengkor, Kalubut mengipungi biji tiwadak nang di banam H Untat. “Lumayan gasan mangaramputi parut lah, biji tiwadak ja kawa dimakan,” jar Ongol.
Buhan Ongol beempat makan biji tiwadak sambil bemain domino. Kada seberapa muha H Untat berubah habang limbah memakan biji tiwadak nang di banam sidin.
“Kenapa lah, dua biji ku makan nyaman ja rasanya, tapi pas nang sebijinya pina kada nyaman lawan kedida bau tiwadak,” gerunum H Untat.
“Kenapa pian Ji, pina habang muha pian. Bebaik pian tamakan biji tiwadak babanam tadi,” takon Gabau.
“Bisa ai lah aku dedaraman lawan biji tiwadak, iya am dua biji kumakan nyaman ja, pas sebijinya pina lain rasanya,” jar H Untat bingung.
Nah, iya am ji, bebaik pas pian mengikih di abu api tadi tekaut tahi kucing. Tadi tu ada tahi kucing pas Ongol menyucul kayu, bisa kada tebuangnya. “Mauk jua Ongol ni, kada dikikihnya dulu, langsung menyucul kayu ja,” sarek Gabau.
Merasa penasaran lawan Gabau, H Untat lawan muha merangot langsung mengikih abu bakaran kayu, sidin takajut limbah dikikih ada empat buting bulat-bulat hangit nang kaya biji tiwadak.
Kada seberapa datang Gabau melihat H Untat mengikih abu, “na iya am lo, tahi kucing tadi kada di buang Ongol, inya langsung menyucul kayu ja tadi ji ai,” jar Gabau.
Apa da,  mendangar tu hamuk H Untat lawan Ongol, menyumpah sidin, “bungul banar kanakan saikung ni kada bepadah ditumpukan api tu ada tahi kucing,” sarek H Untat.
Harau, sekalinya H Untat tamakan dua biji tiwadak dan sebiji tahi kucing hangit nang persis kaya biji tiwadak jua.
“Maaf ji lah, ulun kada ingat di situ ada tahi kucing, pian pang pina kada tetahu langsung membanam biji tiwadak di situ,” jar Ongol bukah kada belurung bulik kerumahnya.

Sumber Berita: http://www.radarsampit.net/berita-tamakan-tahi-kucing.html#ixzz3IZwJReq9