LUAR biasa Kampung Liur wayah ini, kada terasa belum
lawas pembangunannya pesat banar pinanya baberapa tahun ini. Pasar
ganal yang modern atawa jua yang rajin disambat "mall" sudah bediri
tegak ditangah-tangah kampung.
Maklum ja ngarannya kampung hanyar kemasukan mall, memang rada-rada
udik warganya ne. Kada takacuali Ongol cs, kaya Anang Gabau, Utuh
Kalumbut, wan jua Haji Untat. Mandangar mall sudah dibuka, orangnya ne
tadi, bejanjian am handak baramian bakakunjangan ke mall kesahnya tadi.
Kaya biasanya warung Acil Jablai masih menjadi wadah nongkrong favorit
orangnya, maklum di situ am yang kawa bahutang.
"Oi..Coi ayo pabila am kita ngemall," ucap Ongol betakun lawan kekawanannya.
"Akai ah..Ongol bahasanya gaul banar, ngemall jarnya, tambuni tu dipatak dihurung samut di Kampung Liur," timpal Utuh Kalumbut.
"Kenapa memang? Kada apa ai mun handak kerenan dikit," ujar Ongol
pina nahap. "Ada rang duit pina harat, membawai," takun Haji Untat.
"Hahaha..kira pian ulun kada baduit ji, kita ne bajalanan ja masuk kada
bayar jua," ujar Ongol.
"Nah kaya ini ja sore ne ja kita sebelum magrib pleseran," usul Anang Gabau. "Oke satuju," ujar yang lain kompak.
Sesuai perjanjian, orangnya tadi bakumpul dimuka langgar. Macam-macam
penampilan. Haji Untat tetap kaya biasa baya baganti bawahan memakai
salawar kain. Utuh Kalumbut memakai baju hem panjang warna putih
bamasukan hingga atas pusat selawarnya kaya orang handak banikahan. Nah
yang pina telain ne Ongol ja bakupiah pakai baju kokoh, bawahannya
batapih.
"Umma kam ngol, handak datang saruan kah ke mall?" ujar Utuh. "Hadeh
meolo kam ne, pada sorang kaya handak banikahan. Aku ne nyaman kada uyuh
kena imbah bulik ne langgsung ka langgar bamagrib kada uyuh baganti,"
balas Ongol.
"Ow bujur jua lah, hayo kita tulak, tapi Anang mana?" takun Haji Untat. "Inya badahuluan jar ji," sahut Ongol.
Handap kisah, sesampai halaman mall ne bingung Ongol Cs ne tadi,
bakarinah mamutar kepala belihat-lihat ne tadi. "Akui ganal jua lah
parkirnya, mana bangunannya tinggi kalah gedung git Haji Walet," ujar
Utuh beucap sambil bajalan masuk ke dalam mall.
Belum jauh masuk, bingung lagi orangnya neh bingung malihat tangga
bejalan. "Nah itu ngarannya eksapator ji," ujar Ongol. "Pina masti muha
menyambat ngarannya ja salah," ujar Utuh. "Hehe," jar Ongol ketawa.
Pas handak naik tangga bajalan tu tadi orangnya ne tadi takajut
malihat ada sandal gaben behantaian di tangga naik batulis Anang sebalah
kiri, sebelah kanannya Gabau. Nah kada lain lagi am sandal Anang Gabau
rupanya ditinggalnya sangka handak naik ka masjid bapacul sandal segala.
Kada lawas ada am yang bakiau dari atas.
"Ngol hayo naik, rami..kasi lajui," ujar Anang Gabau sambil malambai.
"Sandal kam ne kenapa disini," ujar Haji Untat bakuriak. "Haaa..sangka
ulun kada boleh basandal ji," sahut Anang lagi.
Malihat kalakuan orang Ongol ne tadih geleng-geleng kepala ja
pengunjung mall yang lain, mana baantri menunggu orang Ongol kada sing
naikkan. "Kaya apa ni naiknya" jar Utuh bingung. "Pokonya luncat ja,"
sahut Ongol melajari.
Badahuluan ae ah utuh, disusul haji untat, Ongol paling dudi. Kada
disangka sampai ditangah, "prat" jar tapih Ongol tasangkut eskalator.
Kada marasa pang Ongol neh. Sampai akhirnya tapalurut sampai habis,
orang-orang dibawah maka histeris bakuciakan, tunjuk-tunjuk lawan Ongol.
Rupanya Ongol ne baya batapih budas, kada ingat basalawar lagi. Pas
tasangkut eskalator tapih, tepelurut, apa da habis lalu am yang dipakai
dibawah. Uma pas sadar supannya Ongol, sambil bahancap mamutiki lawan
tapih bakurinah manutupi.
Orang haji Untat maka mangatawai Ongol sampai handak mahantupkan
kepala kadinding mangatawakan Ongol. "Astagfirullah Ngol, makanya mun
mejeng tu basalawar ja jangan batapih. Nah kada manyasal lah di tonton
orang hibak, hahaha..." ucap haji Untat kada tahan lagi am menahan
ketawa.
Apa da semenjak kajadian tu Ongol trauma handak ke mall, biar ada
duit baik inya balanja di Pasar Balauran Kampung Liur. Kalo pina
tatilanjang lagi. Sampai menggaring tiga hari Ongol manahan supan
Sumber Berita: http://www.radarsampit.net/berita-si-ongol-ngemall.html#ixzz3IZyF7Neo
Langganan:
Posting Komentar (Atom)
0 komentar:
Posting Komentar