bekelahi dgn pramugari

Tiga orang dari kampung liur, Ongol, Haji Untat lawan Anang Gabau dibawa study banding ke Jakarta dalam malihat kota ganal disuruh pambakalnnya. Dibiayai samuaan dari wadah guring sampai bamakanan segala. Basungsungan batiga ni sudah mulai berencana  am mangesah tulaknya.
“Ngol, ikam suah lah naik pesawat, aku ni kada pernah lalu pang merasai pesawat terabang tu. Ujar urang, amun kita ni kada yakin, baik kada usah haja,” ujar Haji Untat betakon.
“Ayu ja ji tenang ja pian apa ngalihnya amun naik pesawat tu. Kena kita tu asal banyak batakun haja, kena pian lihat biniannya bengkeng-bengkeng semuaan naik peasawat tu,” ujar Ongol.
“Bujur, jar ikam ngol. Aku semalam pas tulak bepesawat gin nyaman ja aku baroko-roko di pesawat tu,” ujar Anang Gabau pina nahap, padahal malihat pesawat gin kada suah.
“Bah, nyaman ngarannnya amun kaya itu kita. Ayuu ja, isuk kita tulakan. Ada ja aku baju gambar presiden pas pemilihan semalam itu am ku pakai, biar urang Jakarta tahu kalo aku ni tim suksesnya. Ya kalo Ngol, bujur kada Bau,” ujar Haji untat.
Handap kisah, tulak ae batiga ni kesahnya ke bandara  dengan gaya masing-masing. Ongol ni pakai kacamata hirang, kemeja panjang tangan kancing baju babuka sampai ke parut. Amun Anang Gabau kacamata hirang sebelahnya ja, selawar levis pina mangantat, tapi batisannya malebar sekira setengah meter lawan sepatu tinggi sekitar 10 centi. Lain lagi amun Haji Untat, baju gambar presiden, pakai tapih sarung bakupiah bakacamata sambil baruku.
“Segah banar gaya kita ni lah, kalo ikam ni Ngol, kaya James Bun, bintang filem bekelahi tu nah. Amun Anang Gabau ni nang kaya buhan penyanyi India, sayang kacamatanya kadida kaca sebelahnya,” ujar Haji Untat.
“Baaah, bujur ujar pian ji ae. Amun pian memang top hari ini. Baanum 20 tahun pian. Amun malihat dari higa ni kaya pengusaha tambang, kalo dari belakang kaya pengusaha minyak, amun dari hadapan pian persis kaya pasukan tahan kabuk buhan Timur Tengah sana,” ujar Ongol sambil katawa taliur-liur kaya liur walet.
Handap kesah,  masuk bandara am kesahnya buhannya betiga pina masang muha nahap, dicangangi buhan penumpang jua kesahnya, tapi pina kada wani managur jua pang. “Nah, datang am pesawat, siap-siap kita. Kena aku duduk parak supirnya ja Ngol ae,” ujar Haji Untat.
”Wesss, itu mantap ji ae. Kami di belakang ja kalo pina bakesahan lawan pramugarinya tu,” ujar Ongol sambil melap lawan rambut, soalnya karing kada pakai minyak.
Naik ae kesahnya buhannya ke pesawat. “Oiii ibu pramugari, aku  mau duduk di parak sopir pesawat  ja, soalnya saya handak jua malihat orang manyupirnya. Kaya apa?” ujar Haji Untat tapuntal tapalilit babahasa Indonesia.
“Maaf bapak, untuk kursi sudah ditentukan sebelumnya, jadi dengan hormat tempat sesuai dengan itu,” ujar pramugari neh ka Haji Untat.
“Bohhhh, kaya apa  kesahnya ibu pramugari. Saya naik pesawat ini bayar, pambakal mambayar,  tidak melihatkah baju ampun aku ni gambar presiden. Siapa kawa malawan aku, malawan presiden juga dia,” ujar Haji Untat sambil basarek.
Lalu pina datang pintarnya Ongol lawan Gabau, ”Sudah am ji, umpati ja ujar buhannya, jangan dilawan. Lihati kaya di filem tu nah, mengalah ja. Kena buhannya tahu haja bahwa kita ni tamu presiden,” ujar Ongol sambil mebawai duduk.
“Nah kita duduk betatai tiga sini am lah, nyaman kada bajauhan,” ujar Anang Gabau.
Lalu baduduk am betiga ni kesahnya, lalu datang am arahan dari pramugari menyuruh maikat lawan sabuk pengaman. Mendangar kaya itu, pina baubah am muha buhannya batiga ni. “Bohhhh, babaik kita ni Ngol tahu buhannya tamu presiden, lalu am diikat buhannya di kursi, kena diculik kita ni,”  ujar Haji Untat.
“Hiih ji, bujur jua. Jangan kita umpati paan ujar buhannya tu, kalo pina diculik minta ditabusi, kadeda duit kita manabusinya,” ujar ongol manangguh.
Malihat kaya itu didatangi pramugari ae. ”Silahkan bapak pasang sabuknya biar aman,” ujarnya.
“Boooh, kenapa kami dibuat seperti ini. Jadi tidak enak penerbangannya. Kami ini bayar, jangan macam-macam urang ikam, kalo kami batajun dari pesawat ni kena,” ujar Haji Untat lawan bahasanya sorang.
“Iih ibu pramugari, kami ni tamu kehormatan, jangan pina macam-macam,  manyuruh segala maikat awak kami,” ujar Ongol.
Melihat pina batingkah, badiam ae kesahnya pramugari ni sambil bukah ke belakang. “Nah kalo Ji, kada wani jua buhannya dengan kita ni. Hanyar tahunya, soalnya pian pang babaju partai gambar presiden tu, tahu am buhannya dengan kita ni orang terhormat jua,” ujar Ongol sambil katawa.
Malihat pina lawas masih mendarat, Haji Untat ni masam liur handak maruku. Lalu ae mangaluarkan lawan tambaku merek Sandapang Balanda. Rupanya sudah maisap lawan ruku. Pas nyaman-nyamannya, datang pramugari lain lagi.
“Maaf bapak, untuk sementara ketika dalam posisi penerbangan tidak diperkenankan untuk merokok,” ujar pramugari managur.
“Hauuu, ibu pramugari, serba tidak boleh. Tidak enak ini penerbangannya, kalo pina kucucul pesawat ni kena, biar urang ikam tahu,” ujar Haji Untat. Melihat kaya itu, Anang Gabau pina datang lagi pintarnya manyuruh Haji Untat lawan Ongol ni mengalah ja.
Lalu am, pesawatnya mandarat am. Pas handak kaluar, disenyumi lagi lawan pramugari tu  buhannya batiga. “Jangan pina senyum-senyum, kada enak penerbangannya,” ujar Ongol  sambil basasarek.
Melihat kaya itu rupanya buhan pramugari ni pina takurihing ja dalam hati manyambat, manusia abad berapakah yang naik pesawat hari ini, paling langka dicari.

Sumber Berita: http://www.radarsampit.net/berita-bekelahi-dengan-pramugari.html#ixzz3IZwnRnp1