PINA rami banar buhan Kampung Liur menghadiri acara
dangdutan yang diadakan oleh Haji Untat, Haji Lului dan Haji Nahap di
alunalun. Ada beberapa mobil tangki disiapkan oleh 3 kandidat gasan
menyiram buhan kampung nang kepanasan maklum acara dangdutan diadakan
tengah hari apalagi langit cerah banaran. Hentakan irama dangdut nang
menghentak membuat Ongol lawan kekawalannya kada meingat diri lagiam.
“Begoyang tu walai jangan tapi besenggolan kena bekelahian tu,” tagur
Anang Gabau. “Tenang ja walai, kampung kita ne kada kaya kampung lain
sedikit begepak ja bekelahi,” sahut Dangdut pina meayakayak banar lawan
burit. “Bujur tu walai,” sahut Ongol nang ada dihiga. Semakin larut
buhan Kampung Liur dengan jogetan sampai tepaluh-paluh. “Banyu,
banyuuuuu,” kuriak Ongol. Mendangar kuriakan penonton nang asik bejoget.
Bruaaaaaarr, banyu tumatan tangki nang ada dibelakang panggung langsung
disemprotkan ke buhan kampung nang lagi asik bejoget. “Kuraaaaaang,”
kuriak Dangdut pulang. Handap kisah, pina jimus banar buhan Ongol ne
maklum tiga tangki banyu dikerahkan gasan membahasi nang kepanasan.
“Kenapa bebau yulah,” takon Ongol sambil mencium-cium bajunya nang
basah. “Tahu ikam, baju ikamai kalo nang bebau,” sahut Anang Gabau kada
tetahu paan lawan muha. Rupanya selain Ongol, Utuh Lengkor lawan Dangdut
gin merasa ada beda jua lawan baju basah buhannya. “Ikam ada mencium
bau nang kada nyamanlah,” takon Utuh Lengkor. “Iih walai, bau apa ne
lah,” ujar Dangdut. “Pina masam masam. Kadakah bau banyu sungai Kampung
liur karena selawasan ini ne banyu kita sudah mulai tercemar industri,”
ujar Utuh Lengkor. “Mungkin,” sahut Dangdut pina bingung. Merasa
penasaran lalu buhannya betakon lawan Ongol. “Ikam pang wal, baju ikam
tu bebau jua lah,” takon Dangdut. “Bau jua pang, tapi kada tahu bau apa
ne,” sahut Ongol. “Amun kada salah tu walai, bau banyu sungai Kampung
Liur. Khan, selawas ini ne banyu kita sudah mulai tercemar industri,”
padah Utuh Lengkor. Mendangar pander Utuh Lengkor tadi harau tekajut
Ongol. “Astagaaaa, itu mengandung mercuri walai,” ujar Ongol sambil
bukah behimat kerumah handak bebilas lawan banyu leding. Melihat
kelakuan Ongol bukah kada bepadah harau bingung. “Amun buhan ikam kada
meumpati Ongol tu, awak buhan ikam bisa mengelupas. Tahu kada ikam,
banyu nang aku siram tadi tu banyu sungai Kampung Liur,” padah Utuh
Kalubut. Mendangar pander Utuh Kalubut nang jadi koodinator penyiraman
banyu harau memprapas jua Utuh Lengkor lawan Dangdut bukah behimat.
“Siaallaaaaaaann, banyu mercuri,” ujar Dangdut bukah kada meingat diri.
Sekalinya banyu nang disiramkan gasan penonton acara dangdutan di
alun-alun Kampung Liur banyu sungai Kampung Liur dikira buhannya banyu
leding. Apada behimat banar mandi dirumah membilas dengan banyu bersih
amun takutan cagaran mengelupas kulit. Tapi ini hanya cerita nang ada di
Kampung Liur dan bukan untuk menyindir siapa-siapa karena ini hanya
cerita fiktif warga agar terhibur. Cerita ini juga sipatnya membangun.
Langganan:
Posting Komentar (Atom)
0 komentar:
Posting Komentar