tujah dijamban

SUNGSUNG Ongol bejalanan mengelilingi Kampung Liur sambil olahraga. Maklum handak semingguan ne aur begawi memantat di kebun jadi aur terasa katur-katur lalu dibawa beolahraga.
Pina nahap japang Ongol ne rahatan keliling kampung sambil membawa sebotol minuman dingin diandak dipinggang amun haus tinggal mencabutnya. Nah rahatan kehausan handak meminum banyu tadi nang tinggal sedikit tu tedangar suara menggeluruk didalam parit. “Akaiyah, sakit banar parut nah, kenapa bisa kaya ini ne,” garunum Ongol sambil meingkuti parut. Rahatan merintih kesakitan lewatai Anang Gabau pakai sepeda ontel. “Kenapa Ngol, pina meharit banar,”
takon Gabau. “Kada tahu walai, kada biasanya sungsung kaya ini ne sakit parut,” sahut Ongol pina telihat belipatlipat muhanya menahan kesakitan. Merasa kasihan lalu Anang Gabau menawarkan diri. “Umpata aku ja ikam kerumah, siapa tahu ikam Cuma keuyuhan ja keliling kampung tumatan sungsung tadi,” ujar Anang Gabau. “Tapi, kawa jalan juakah sepeda tu pasalnya nang bebuat diatasnya tu orangnya ganal-ganal,” sahut Ongol pina menyindar banar. “Tenang ja, sepeda ontel ampun ku ne Ngolai, sudah lewat uji laboratorium jadi kada masalah paan,” ujar Anang Gabau menjelaskan pina tamam ja lawan muha. Handap kisah, kada berapa lawas sampai jua buhannya ketempat tujuan. Anang Gabau ne langsung memasukan sepeda ontelnya kedalam garasi. “Masuk Ngol, kaya ini am rumah, sabak lawan mainan anak ja,” ujar Anang Gabau. “Oke kawan, terimakasih,” sahut Ongol. “Hau, masuk kedalam pang diluar tu kada nyaman,” ujar Gabau. “Disini ja walai, nyaman anginnya,” sahut Ongol. “Astagaaaa, amun didalam kawa jua kita mengopingopi,” gasak Gabau. “Okelah kalo begitu,” sahut Ongol sambil melepas sepatu. Kada berapa menit datang kopi hirang nang disurung bini Anang Gabau. “Kopi pahit ja Ngolai, gasan penghagat awak sungsung ne,” ujar Gabau. “Kada sakit parutlah wal,” takon Ongol. “Amun aku sudah biasa am meminum kopi, tahuam amun ikamlah,” ujar Gabau. “Sama ja walai, dirumah gin kopi tuam dihantup,” sahut Ongol. Setelah meminum kopi ulahan bini Anang Gabau tadi, kenapakah Ongol ne pina masam muhanya. “Hau, kenapa pulang muha ikam tu Ngol pina telihat meharit banar,” takon Gabau. “Sakit banar walai parut ku nah, rasanya handak beol,” sahut Ongol. “Iyakah, lajui ikam kebelakang sana, lajui kena takeluar disini,” suruh Gabau. Merasa diperbolehkan harau behancap Ongol menuju belakang rumah. Pina telihat tegagas-gagas banar pang Ongol ne. bruak, grudak, bunyi lawang jamban ditutup pina gancang banar. “Akui, nyaringnya menutup lawang jamban tu. Kehandakan banar keluarnya tu,” garunum Anang Gabau. Habis berbatang-batang roko cap pekat tapi Ongol ne kada mencongol jua. “Hau, lawas banar didalam jamban kawan ne, keluar batukah pina lawas banar,” ujar Anang Gabau. Sekitar 2 jaman mehadangi Ongol keluar jamban tapi tetap kedida kabarnya jua. Merasa penasaran datangai Anang Gabau. “Jangan-jangan inya ne siup didalam jamban pina lawas banar,” ujar Anang Gabau sambil menuju kejamban wadah Ongol besembunyi membuang hajat ganal. Tok, tok, tok, Anang Gabau mengetok. Tapi tetap kedida jawaban. “Ngol, Ngol, Ngol, masih didalam jamban jakah,” tagur Gabau. Tapi tetapai kedida jawaban. Tambah penasaran lalu Anang Gabau mendobrak lawang jamban. Bebaya tebuka harau tekajut Gabau. “Astaga, Ongol tujaaaaaah,” kuriak Anang Gabau. Mendangar kuriakan nang kaya petir harau bedatangan buhan Kampung Liur. “Ada apa, kenapa,” takon Dangdut. “Ongol tujah didalam jamban,” padah Anang Gabau. Lalu Ongol diangkat tumatan jamban menuju kedalam rumah. Setelah diberikan pertolongan pada pasen tujah. Kada berapa menit sadar jua akhirnya. “Kenapa ikam bisa tujah didalam jamban tu Ngol,” takon Anang Gabau. “Nangkaya kada tujah, amun sesapu haduk disangkutkan dibelakang lawang. Pas rahatan handak menutup gancang maklum handak takeluar itu tu, sesapu mehantam aku. Lalu kada ingat lagiam,” kisah Ongol. Mendangar penjelasan Ongol tadi harau mengangkang behimat buhan kampung. “Ayolah, sesapu haduk ja kawa mentujahkan orang, hebat-hebat, hua hahahahaha,” ujar Dangdut pina tamam muha. “Itu baru sapu haduk, bagaimana kalo sapu jagat bisa dua hari dua malam kada bangun-bangun,” ujar Anang Gabau menambahi. Harau masam muha Ongol disambati kekawalan. Kelimbahan bulik membawa muha supan. (fin)

Sumber Berita: http://www.radarsampit.net/berita-tujah-di-jamban.html#ixzz3JzEIknU8