Hari semalam Ongol disuruh Haji Untat meambilkan tetukuran sidin di
pasar Kampung Liur pakai sepeda motor keluaran tahun 80-an tapi tengki
minyaknya sudah dimodif kawa meisi 10 liter lebih sedikit. Karena
disuruh bulang balik lalu sidin meunjuki duit gasan menukar bensin di
SPBU. “Ne duit gasan nukar bensin, upahnya kena jalah,” ujar Haji Untat
sambil meunjuki duit dua puluh ribuan. “Inggih Ji,” sahut Ongol.
Sudah menerima duit dua puluh ribuan apada himung ai Ongol neh lalu
semangat begawinya. “Nah kaya itu pang Ngol, semangaaat,” ujar Haji
Untat pina meambung banaran. “Belum tapi semangat banar ne Ji ai. Kalo
pina pian kada ingat kena membayar upah ulun neh. Karena pian tu
urangnya pada peingatan. Ya kalo Ji, hehehe,” sahut Ongol. “Busyeet,
ingat ja kalolaaah,” ujar sidin membela diri.
Handap kisah, sekalinya bensin didalam tangki motor tuha pun Haji
Untat ne memang sudah handak habis karena sudah handak semingguan ne
kada dipakai sidin. “Handak habis Ji ai, tukarkan dulu lah bensinnya,”
ujar Ongol. “Hi-ih, jangan lawas lah,” sahut sidin sambil membari pesan.
“Ok Jiii,” ujar Ongol.
Kada berapa menit sampai jua Ongol ke SPBU Kampung Liur nang memang
jaraknya wan rumah Haji Untat kada tapi jauh alias Cuma 150 meter. “Akui
banyaknya ai nang antri menukar bensin neh. Sampai jam berapa juakah
aku ne hanyar sampai kesana tu lah,” ujar Ongol menggarunum didalam
hati. “Maka pesan sidin tadi jangan lawas-lawas lah. Nah iya am,” ujar
Ongol pina camuh bepikir.
Rupanya kenapakah mata Ongol ne melihat ada pengisian nang kosong di
sebelah hulu. “Astagaaaaa, disana kosong nah. Lebih baik aku kesana
jaaaaa,” ujar Ongol pina telihat kehimungan sambil menggas sepeda motor
tuha nang ditungganginya tadi.
Lalu pelayan ne betakon. “Berapa liter bang,” takon Utuh Lengkor.
“Isi ful teng ja,” sahut Ongol pina semangat bebanaran. Nang antri di
hilir ne cagangan melihati si Ongol nang mengisi minyak ful teng tadi.
“Apa buhannya tu cangang-cangang. Ada nang anehkah,” ujar Ongol pina
menggarum sorangan.
Hitungan menit minyak sudah hibak didalam tengki motor tuha keluaran
tahun 80-an. “Berapa coy,” takon Ongol. “Seratus sepuluh ribu bang,”
ujar Utuh Lengkor. Mendangar pander Utuh Lengkor tadi harau habang muha
ikam. “Hau, emangnya berapa gerang harganya seliter neh,” takon Ongol
pina penasaran banaran. “Sebelas ribu bang,” ujar Utuh Lengkor.
Mandam Ongol ne memikirkan harga minyak nang larang tadi. “Biasanya
enam setengah ja coy ai,” ujar Ongol mengarasi. “Nang ngini ne lainanya
bensin paan bang ai. Ne pertamax,” ujar Utuh Lengkor.
Mendangar pander Utuh Lengkor tadi harau masam muha Ongol.
“Astagaaaa, telasah wadah aku ne tadi. Pantasa ai kada tapi hakonnya
bebuhannya kesini. Sekalinya pertamax,” ujar Ongol. Apada, mengikik ai
bebuhan Anang Gabau wan Dangdut nang umpat antrian bensin di sebelah
hilir tadi. Paksa ai menjuhut duit didompet gasan membayari pertamax
tadi karena duit nang diunjuki Haji Untat kada mayu gasan menukar
pertamax 10 liter. (*/fin)
Langganan:
Posting Komentar (Atom)
0 komentar:
Posting Komentar