wadai ulahan bini ongol

Tiga bulan sudah lewat Anang Gabau kawin dengan Ani Kenjot anak Acil Jablay. Semingguan ne jua sudah Anang Gabau dengan bininya membuka warung nginginuman, barang haja gasan gawian bini sakira gasan mengandali ipuk bini sakira kada minta duit tarus. Sakira tahu rasanya mencari duit.
“Lakasi ding buka warung, kena telandung hari hilang pulang rejaki dipatok ayam,” ujar Anang Gabau menyambati bininya.
“Inggih, pian jua tuh tolongi pang menyusun wadai di muka tuh,” ujar Ani Kenjot, sambil menyarik-nyarik.
Pas Anang lagi haratan menyusun wadai, datang ae Haji Untat pina sambil lewat di muka warung habis dari pasar langsung menyinggahi. “Rami banar leh warung bini ikam ni Nang” ujar Haji Untat datang-datang langsung mambuka pander
 “Lumayan haja ji ae gasan manabali ipuk bini lawan melajari inya begawian,” ujar Anang menyahuti.
“Ikam ba’isi bini maka bisa banar jua malayani tamu nangdatangan, banyak wahini urang mambuka usaha wawarungan, paling-paling dua tiga bulan tutup marga palayanannya kurang mamuas’akan,” ujar Haji Untat langsung minta ulah akan Kupi.
Pas lagi raminya bakisah Haji Untat wan Anang Gabau, datang ae kujuk-kujuk si Ongol pina temanggah-manggah. “Apa jar pina rami banar bakisahan buhan pian nh,” ujar Ongol.
“Kada ae, menggisahi bini Anang Gabau, harat banar wayah ini bisa bejualan lawan be olah wadai sudah,” ujar Haji Untat.
“Ayu ha, buhan ikam bekesahan lagi, aku handak bulik sudah kalo pina dicari acil ikam tatatukaran dari pasar nih,” ujar Haji Untat langsung bukah.
“Esok Nang lah bayar kupi, bahutang dahulu,” ujar Haji Untat tatawa hahahaha..…
“Lancar haja memanderi sekalinya bahutang jua Haji Untat nih…,” garunum Ongol.
Sekalinya Ongol ada kehandak datang kewadah Anang Gabau, melihat kawan pina rami bejualan diwarung Ongol nih handak umpat meandak wadai olahan bininya.
“Apa ikam bawa tu Ongol?” ujar Anang.
“Ya’am aku nih handak umpat meandaki wadai’ah di warung bini ikam,” ujar Ongol pina kada tapi nyaring bepandir.
“Ayuha, andak situ Ongol kada papa,wadai napa garang,” ujar Anang.
“Ini nah, wadai ulahan biniku, pais pisang wan ruti pisang..gagawian bini di rumah timbang-timbang diam haja dirumah”ujar Ongol.
Pas dua hari liwat datang pulang Ongol nih ke warung bini Anang Gabau, kisah handak meambil duit harga wadai nih. Dalam hati Ongol menyambati, “Habis’am wadai olahan bini ku nih di warung Anang,” ujar suara hatinya Ongol neh sambil mengayuh sapida.
“Nang kayapa wadai bini ku masih ada lah,” ujar Ongol
“Ada ae tuh diatas meja, kedida yang meambil pan Ngol,” ujar Anang bepandiri dari dalam rumah.
“Kadida yang payuh kah…?,” ujar Ongol sambil sangkal didalam hati.
“Hau, ikam semalam menyuruh menjualalan kah baya meandak haja…?” ujar Anang.
“Ada ae semalam yang betakon handak menukar, tapi kupadahi wadai bini Ongol jar ku baya betitip ja, lalau ae kedida yang waninya menukar,” ujar Anang.
Sangkal-sangkal hati langsung Ongol mengumpulakan wadai bininya, sambil begarunum dalam hati, “Basi ae wadai bini ku nih kada bulik modal lagi.”
“Sabujurnya banyak nang handak marasani wadai bini ikam tu, tapi aku kada wani manjual, sualnya ikam ba’isukan bapadah umpat ma’andak haja, kada bapadah handak minta jual’akan” ujar Anang Gabau.
“Ikam tu amun kada mengerti batukun,” ujar Ongol. “Sorang gin sama jua bepadah umpat meandak haja, pas tu langsung bukah kukira apakah,” ujar Anang Gabau.
Dari pada bekancangan urat penggulu langsung Ongol bulik membawa wadai olahan bininya. (dc)

Sumber Berita: http://www.radarsampit.net/berita-wadai-ulahan-bini-ongol.html#ixzz3Jz9bVYhF