selawar dalam hello kitty

TUMATAN habis zuhur warga Kampung Liur sudah pina memadati lapangan. Soalnya bemacam lomba sudah disiapkan gasan memeriahkan kemerdekaan Indonesia. Dari yang balap karung sampai naik batang pinang, pokoknya semua lomba ciri khas Agustusan diadakankan semua. Yang umpat lomba biasanya kada cuma orang dewasa, biasanya kekanakan jua hibak. Apa lagi kaya lomba meambil duit logam di buah limau, meisi banyu, membawa keleker, wan jua makan kerupuk. Mun yang tetuhaannya naik pinang, lawan tarik tambang. Khusus gasan ibu-ibunya lomba balap karung, soalnya rami banar melihat orang acil tu behindik-hindik, apa lagi yang lamak awaknya bisa sampai tejerungkup umpat balap karung, berasa menghibur banar. Handap kesah, yang ngarannya Ongol, kada usah dikisah pasti am umpat jua kada ketinggalan. Nah Ongol lawan kekawalannya kaya Utuh Lengkor, Anang Gabau, wan jua Utuh Kalumbut meatur siasat gasan lomba naik pinang yang handak diumpatinya. Dari hasil kesepakatan buhannya dipilihlah formasi Anang Gabau pondasi bawah, Ongol di atas Anang, dan duo Utuh ne tadi begantian soalnya orangnya bedua ne sama kurusnya. Hadiah di atas pohon pinang ne tadi macam-macam dan pina menggiurkan banar. Ada handuk, tapih, baju, odol sampai ke cawat-cawat belusinan ada semua. Untung kada segala pengguringan ja diandak jadi hadiah. Maklum ja calon Bupati banyak yang menyumbang pinanya, menyari simpati warga. Pas giliran regu orang Ongol handak naik. Bebaya sekali naik sampai Utuh Lengkor tegugur am buhannya, maklum ja batang pinangnya ne tadih licin banar pakai oli digemuki orangnya pulang. Apa da sekali coba awak orangnya seberataan hirang semua, sampai ke muha. Yang ngarannya panjat pinang memang kada dibolehi bebaju, supaya adil lawan peserta yang lain. Sudah berapa kali mencoba gagal tarus orang Ongol ne. "Grup Ongol tinggal sekali kesempatan lagi mencoba. Mun kada kawa jua diganti wan grup yang lain," kuciak Haji Untat ketua panitia kampung Liur. Mendangar ne tadih, semangat am orang Ongol. Masing-masing sudah ada hadiah yang diunting di atas. "Ayo semangat sekali lagi kesempatan kita," ujar Anang Gabau menyemangati kawan-kawan seregunya. Awak sudah kada karuan tampuh hibak banar gemuk. Langkah pertama Anang Gabau yang jadi pondasi sudah mulai memagut lawan batang pinang. Dilanjutkan lawan Ongol menaiki bahu Anang. Pas itu, dibelakang Utuh Kalumbut besiap menaiki Ongol. "Tap" Kada terasa Utuh Kalumbut sudah di bahu Ongol, bediri ae Ongol, bebaya kawa meangkat, habang muha Ongol menahan barat Utuh Kalumbut.Padahal masih ada sikung lagi yang belum naik yaitu Utuh Lengkor. "Aduh handak tehera-hera rasanya," gerunum Ongol dalam hatinya menahan barat Utuh Kalumbut. Tanpa komando lagi, Utuh Lengkor yang menjadi undasnya gasan di puncak akhir beraksi. Benaiknya di bahu Anang Gabau, berhasil. Pas handak menaiki bahu Ongol, pina ngalih banar pinanya, maklum awak Ongol ne paling limut gemuk wan Olinya baya kelihatan gigi ja lagi. Bejajak ai dipinggang Ongol. “Nah, ya am alamat tetilanjang am," jer Ongol. Sekalinya bujur jua ai bebaya tegacak pinggang menggatar lentuhut Ongol, "sur," jer selawar Ongol melunsur telului. Apa da penonton yang hibak mengelilingi nonton panjat pinang ne tadi ketawaan. Bebuhan acil-acil menutup lawan mata, kada sanggup melihat selawar Ongol. Untung ja pang Ongol ne beselawar dalam lagi, tapi am pang selawar dalam jakanya yang polos ini begambar "hello kitty". "Nah..ae abahnya.. hello kitty gambarnya," kuciak salah sikung acil yang pina hapal gawi ketuju banar nonton sinetron basalingkuhan lawan hello kitty. Sumber Berita: http://www.radarsampit.net/berita-selawar-dalam-hello-kitty-.html#ixzz3ICT0gF94