Lantai Dasar

HARI semalam Ongol wan Anang Gabau dibawai Haji Untat tulak keluar kota, balilihat keadaan diperkotaan. Maklum, bedua ne kada suah melihat kota diluar Kampung Liur. “Asa kada handak bulik Ji ai pas melihat kota tu nangkaya ini asiknya,” ujar Ongol. “itu menurut ikam Ngolai, tukang pendanaan ne nah nang bangkak membayari ikam bedua,” sahut Haji Untat sambil geleng-geleng kepala. “Harau bujur Ji ai, sori Ji lah,” sahut Ongol.
Lalu betiga ne mendatangi gedung pencakar langit karena tinggi gedungnya memang tinggi banaran sampai tetungak kepala Ongol melihatinya tumatan bawah. “Kada tebayangkan kalu baluncat tumatan atas gedung neh,” ujar Ongol. “Handak bunuh dirikah Ngol pina behayal baluncat tumatan atas gedung,” takon Anang Gabau. “Kada paan, handak hidup ja aku, hehehe,” sahut Ongol sambil takurihing sorangan.
Handap kisah, rupanya Ongol wan Anang Gabau ne baniat handak naik keatas gedung karena merasa kada pernah kesana. “Ji, nangkaya bisa naik keatas sana lah. Kayanya rami pang diatas sana Ji ai, hehehe,” takon Ongol. “Buhan ikam naik lift tu nah. Picik angka 12 maka buhan ikam naik paling atas sana am,” ujar sidin. “Okey Ji, terimakasih buhan ulun handak keatas dulu nah,” sahut Ongol pina kehimungan banaran. “Ya, diatas sini ja handak menukar cawat karena tadi kada ingat membawanya didalam tas,” ujar sidin.
Sesuai wan rencana lalu bedua ne naik keatas naik lift, pas didalam lift ada binian bujang umpat didalamnya. “Ehem, handak kemana ikam Ding,” takon Ongol pina musti banaran. “Handak keatas ai, Mang ai,” sahut binian bujang baju habang ne tadi. Apada, habang muha Ongol dikiyau Amang. “Aku ne bujangan Ding ai. Ikam kiyau amang kada terima aku,” ujar Ongol pina mengarasi. “Yak ah, ulun sudah belaki mang ai. Jangan pian kiyau ading paan,” sahut binian ne tadi. Apada, birai muha Ongol gara-gara kecakahan banaran. “Hua hahahaaaaa, kena batunya ikam Ngol ai. Makanya mun handak betaken tu jangan sembarangan dikota ganal neh. Umpati aturan, jangan sok tau,” ujar Anang Gabau. Apada, hinip ai Ongol.
Kada berapa menit sampai jua bedua ne keatas sesuai wan keinginan semula. “Kedida bedanya paan dibawahkah atawa diatas neh. Sama ja wal ai. Cuma nang membedakannya tingginya ja pang lah,” ujar Ongol. “Bujur tu Ngol ai. Cuma nyaman diatas ne kawa melihat urang nang dibawah. Paham ja kalo ikam,” ujar Anang Gabau. “Kalau nang itu paham ja pang. Terus. Kita turun ne jam berapa bebaik ditinggalkan Haji Untat bisa kada kawa bulik kekampung kita neh,” takon Ongol. “Ayo kita turun pulang,” ujar Anang Gabau.
Lalu bedua ne masuk lagi kedalam lift, tapi didalam lift bedua binggung handak memicik angka berapa. “Nomor berapa am neh. Kada paham aku nah,” takon Ongol. “Kalau lantai dasar tu Ngol ai pastiam nomor satu. Paham ja kalo ikam,” sahut Anang Gabau. “Paham ja wal ai, hehehe,” ujar Ongol sambil memicik nomor satu nang ada dibawah nomor tiga.
Sambil bakisahan bedua ne didalam lift kada terasa lawang tu tabuka. Baya tebuka harau tekajut Ongol melihat diluar lift banyak motor wan mobil. “Astagaaaa, kita masuk kebengkel ne Ngolai,” ujar Anang Gabau. “Ya am, aku gin bingung jua nah. Kenapa lantai satu ne bengkel motor wan mobil. Coba telpon Haji Untat,” suruh Anang Gabau. “Hapenya kedida bapulsa wal ai, Cuma kawa main game ja neh,” ujar Ongol.
Apada, akhirnya bedua ne betakon wan tukang parkir disitu. “Keluar tumatan sini ne picik nomor berapalah/,” takon Ongol. “Buhan pian ne tesalah picik kalo tadi. Pastiam tapicik nomor satu. Kalau nomor satu tu lantai dasar. Mun handak keluar picik nomor tiga,” ujar tukang parkir. Apada, geleng-geleng kepala Ongol pas mendapat penjelasan dari tukang parkir tadi. “Rupanya tesalah picik tadilah, hehehe,” sahut Ongol pina takurihing sorangan.
Akhirnya, bedua ne naik lagi dan memicik nomor 3 dan imbah keluar bedapat am wan Haji  Untat. “Sekalinya ulun bedua ne Ji ai tadi masuk kelantai dasar atau lantai bengkel motor wan mobil. Maksud ulun tu wadah parkiran motor wan mobil. Tadi tu tapicik nomor satu, pas itu dipadahi wan tukang parkir mun handak keluar naik lift picik nomor tiga. Makanya buhan ulun bisa bedapat wan pian neh,” ujar Ongol mengisahi tentang pengalamannya tesalah picik nomor tadi.
Sekalinya, Haji Untat neh malah ketawa mengangkang sorangan pas mendangar kisah si Ongol tadi. “Hua hahahaha, tukang parkir nang buhan ikam panderi tu tadi aku coy ai. Buhan ikam tadi kada melihat eh karena kadap kalooo. Buhan ikam naik pakai lift aku gin sudah naik duluan am naik pakai lift sebutingnya,” ujar sidin menjelaskan panjang lebar. Apada, mengangkangai betiga sama-sama mendapatkan pengalaman berharga tulak keluar Kampung Liur. (fin).

Sumber Berita: http://www.radarsampit.net/berita-lantai-dasar.html#ixzz3JblH9Wnv