MALAM itu
Ongol mendatang selamatan memperingati Isra Miraj wadah Haji Untat.
Kenapa kah cuacanya malam tu pina kada basahabat. Beberapa hari ini
hujan tarus maka saban hujan mati lampu pulang.
Padahal malam tu Haji Untat maundang Ustad dari luar Kampung Liur
gasan mambari pencerahan warga kampung Liur, maklum ja warga kampung
Liur ne banyak yang begawi keluar kampung di Sawitan. Sekali-sekali
harus diberi siraman rohani gasan buhannya yang turunan dari sawit malam
tu.
Handap kisah walaupun padang hujan merimis tapi banyak ja rupanya
yang datang wadah Haji Untat. Di muara pagar ne ada am Ongol mehaga tamu
mempersilakan masuk seikung pada seikung sambil bapayung.
" Silakan masuk mang," ujar Ongol lawan tamu ne tadi. Ongol ini ne
tadi memang pendahulunya datang soalnya inya merangkap jadi panitia
disuruh Haji Untat.
Rupanya biar padang hujan merimis, guntur ram-rum, dan listrik hidup
mati hidup acara wadah Haji Untat ne bajalan lancar ja pinanya. Sampai
tuntung acara hujan masih ja rintik-rintik sampai rumah haji Untat
kosong kaya itu-itu ja hari pinanya.
Habis mendangani Haji Untat keuyuhan banar am pinanya Ongol ne tadi.
Lantaran keuyuhan ne tadi teguring rupanya Ongol tadi, habis bekisahan
pas acara. Kada tega membanguni, Haji Untat membiarkan Ongol bemalam di
rumahnya.
Hayal banaran Ongol guring, biar seumpama dikibit gin kada harapan bangun pinanya.
Sampuk Subuh sekalinya Ongol ne masih guring jua kada sing bangunan.
"Ngol.. bangun Ngol, basubuh," ucap Haji Untat membanguni Ongol.
"Waduh.. uyuh nya membanguni Ongol ne, biaram kena bangun sorangan
ja inya," gerunum Haji Untat sambil meninggalkan Ongol tulak ke langgar
yang ada di Kampung Liur.
Di kejauhan tedangar sayup-sayup suara si Dangdut mengumandangkan
azan subuh pina meandu-andu. Kada lawas ditinggal Haji Untat, Ongol
tebangun mendengar azan subuh tu tadi, lalu Ongol bekurinah bangunan
betempungas lalu menyusul Haji Untat ke langgar.
Sesampai di pelataran langgar belum sampat Ongol memacul sandal keluar Haji Untat.
"Astaga Ngol, api kompor di rumah tadi kada bemati Ngol, aku tadi menjarang banyu," ujar Haji Untat.
Mendangar apa jar Haji Untat, Ongol kadanya tetahu malah cuek ja inya
sambil memacul sandal handak naik ke langgar, kelihatan masih ngantuk
pinanya matanya ja pina rangun-rangun dipaksanya bajalan.
Melihat kelakuan Ongol kada memperdulikan pandernya, Haji Untat ne
tadi meradang dan tambah sanget. "Ngol api di rumah tadi kada bepajah,"
ulang Haji Untat sambil menggatik bahu si Ongol.
Sangkal dikuriak-riaki Haji Untat, Ongol lalu menjawab, "tenang ja
ji..ulun gin tadi kada ingat memati keran ledeng tadi," sahut Ongol
Santai. Pikirnya tadi aman am neh biar tabakar rumah Haji Untat tapi
banyu ledeng balimbakan kada bakal habis jua rumahnya.
"Astaga Ongol..." ucap Haji Untat lagi. Apa da Haji Untat tambah
liwar sangkalnya lawan Ongol, kada tahu ai lagi , bukah-bukah ai Haji
Untat sampai handak tajarungkup menuju rumahnya takutan api di rumahnya
manjalung.
Sepeninggal Haji Untat, si Ongol kada langsung masuk ke langgar malah
bekelubut lagi di teras langgar. Datang Anang Gabau membanguni, "Ngol
ayo kasi sudah komat nah," gawil Anang Gabau. "Ayu ja," jar Ongol.
Limbah tu datang lagi Haji Untat ne tadi, masih sangkal rupanya
dengan Ongol kada tetahu am Haji Untat langsung masuk ke langgar ja
sembahyang subuh bajamah. Tuntung sembahyang. "Ngol tumben aku kada
melihat kam bajamaah tadi," tagur Dangdut.
"Hau maka aku tadi bajamaah jua, kada malihat kah kam, aku ne di saf
paling belakang," ujar Ongol sambil mengucak mata. "Haaa...haa..." ujar
orang kekawalan Ongol tetawa serempak.
"Ngol..Ngol..makanya mun basubuh tu lajui bewudhu, kalau bisa mandi jangan baya betempungas ja," sambut Anang Gabau.
"Kam tu sembahyang di saf Bebinian Ngol ae, kita ne baya sesaf ja lakiannya" timpal Haji Untat lagi.
Apa da supan Ongol gara-gara ngantuk kelakuan kada karuan tampuh, sembahyang di saf bebinian. (oes)
Langganan:
Posting Komentar (Atom)
0 komentar:
Posting Komentar