showroom mobil

Hari semalam Ongol disuruh Haji Untat mencarikan mobil bakas di Kampung Layat. Sidin menyuruh inya ne karena sidin handak menukar menambahi nang ada. "Ikam ke Kampung Layat lah, carikan mobil bakas aku handak tukari karena di kampung kita ne sudah kedida lagiam nang bajual mobil bekas. Nang ada hanya mobil bakar dibakar," ujar Haji Untat. "Siap Ji, siap ja lun kesana asal ada upahnya, hehehe," sahut Ongol. "Nang penting ada mobilnya Ngolai. Masalah ongkos kesana aku jamin," ujar sidin. "Sip," sahut Ongol.
Tulaklah Ongol wan Anang Gabau menuju Kampung Layat naik sepeda motor. Motor nang dibawa buhannya gin motor pinjaman jua pun Amang Bular. "Jangan kada ingat Ngolai, membulikannya bensinnya harus full," pesan sidin sebelum bebuhan Ongol membawanya. "Oke Mang, tenang ja pian, hehehe," sahut Ongol pina tamam ja wan muha.
Handap kisah, sekitar 2 jam bebuhan Ongol ne sampai jua ke Kampung Layat. Sampai disana bedua ne kada langsung paan mencari urang bajual mobil bakas alias showroom mobil. "Kena ja kita ke showroom mobil tu. Minuman dulu kita wal," ujar Ongol sambil memarkir motor pas dihadapan warung Acil Kelilu. "Astagaaaa, ikamkah Ngol. Lawas banar kada kesini," ujar sidin.
"Ya am Cil ai, kesini ne handak mencari urang bajual mobil bakas, tahulah pian Cil," takon Ongol. "Tahu banar, tapi minum dulu hanyar aku padahkan," ujar sidin.
Tuntung minuman lalu bedua ne menakoni pulang nang tadi. "Dimana Cil wadahnya," takon Ongol. "Ikam lewat dijalan sanalah, belok kekiri lurus pas disimpang tiga tu ada rumah ganal.
isitu aku rancak melihat banyak mobil. Kada tahu jua apakah itu mobil bakas atau kada. Nang aku disituam wadahnya," sahut sidin pina tahengap-hengap pahinakan pander karena pandernya kada bepagat-pagat.
Sesuai wan nang dipadahkan sidin tadi, lalu bedua ne siap-siap handak menuju lokasi. "Terimakasih Cil laaah, lun kesana aaaaam," ujar Ongol. "Hi-ih, hati-hatilaaah. Jangan kada ingat baelang pulang kewarung Acil neh," sahut sidin sambil melambai-lambaikan tangan. "Inggih," kuriak Ongol karena sudah jauh am eh.
Kada berapa menit sampai jua bedua ne wadah nang ditunjuk Acil Kelilu. "Harau bujur jar sidin wal ai, bujur-bujur banyak mobil disini neh. Maka harat-harat pulang warnanya," ujar Ongol. "Ayoam kita masuk balilihat dulu nang mana tebagus nyaman kita langsung telpon Haji Untat," ujar Anang Gabau. "Ayoooo," sahut Ongol.
Rahatan handak masuk kehalaman rumah, datang ai penjaga rumah. "Ada apa wal, ada nang dapat dibantukah," takon Utuh Lengkor. "Anu ah wal, handak belilihat mobil ne pang. Handak menukar ah," ujar Ongol. Mendangar pander Ongol tadi harau habang muha Utuh Lengkor. "Maaf wal ai, ne rumah sesepuh Kampung Layat. Lainan showroom mobil paan," sahut Utuh Lengkor.
Apada, masam muha Ongol wan Anang Gabau. "Astagaaaa, iyalaaah. Aku kita tadi showroom mobil wal ai," ujar Ongol pina supan muha. "Memang dilihat tumatan jauh mirip wan showroom mobil karena banyak mobil eh," sahut Utuh Lengkor. "Kalo kaya itu wal ai. Mohon maaf lahir dan batin ai lah. Salah alamat tadi," ujar Ongol.
Akhirnya Ongol wan Anang Gabau bulik membawa muha masam. "Harau dibongoli Acil Kelilu. Pas ai wan ngaran sidin, Acil Kelilu alias peacilan ketuju mengelilu," ujar Anang Gabau. "Hahahaha, pengalaman wal ai," sahut Ongol. Akhirnya bedua ne babulik ke Kampung Liur melaporkan pengalaman nang langka. "Hua hahahaha, bujur langka pengalaman bebuhan ikam neh. Rumah sesepuh kampung dikira showroom mobil," ujar sidin umpat ketawa jua pas mendangar kisah si Ongol neh. (*/fin).

Sumber Berita: http://www.radarsampit.net/berita-showroom-mobil.html#ixzz3Jbp85SXW