Sungsung tu pina rami dirumah Haji Untat karena kedatangan tamu istimewa
dari Kampung Layat. Merasa penasaran datang ai Ongol ne wan Anang Gabau
handak melihat langsung siapa gerang tamu sesepuh Kampung Liur neh.
“Astagaaaa, Haji Walet coy ai,” bisik Ongol. “Pas banar coy ai kita
bedapat sidin. Siapa tahu dapat kecipran duitnya. Hehehe,” sahut Anang
Gabau. “Kecipratan liurnya kalolah, hahaha,” ujar Ongol. “Bujur coy ai.
Tapi liur walet. Hahahaha,” sahut Anang Gabau. Apada, madam ai Ongol
mendangarnya. “Hi-ihlah, hehehe,” ujar Ongol.
Rupanya kedatangan
Ongol ne dihadang-hadang Haji Untat am karena ada nang bisa disuruh ke
warung. “Nah pas banaran ikam datang Ngol ai,” ujar Haji Untat. Apada,
himung ai Ongol neh mendangarnya karena ini disanjung sesepuh Kampung
Liur. “Tolong ja Ngol ai tukarkan gula wan sirup. Kebelujuran itu habis
nah,” ujar Haji Untat menambahi. Apada, masam ai muha Ongol. “Inggih Ji.
Busyet, aku kira tadi meapakah, eh sekalinya menyuruh kewarung,”
garunum Ongol.
Handap kisah, tuntung menukar gula wan sirup sesuai
pesanan Haji Untat lalu Ongol disuruh meulahkan minuman gasan tamu
terhormat sidin. “Sekalian ulahkanlah, kena ada ja gasan ikam Ngol ai,”
ujar Haji Untat. “Asiieeek,” sahut Ongol pina telihat semangat
bebanaran. “Cagaran kawa nukar roko cap pekat neh, hehehe,” ujar Ongol
kehimungan.
Kada berapa menit datang pesanan Haji Untat ne tadi
yakni minuman sirup. Tapi, anehnya sirup ne telihat bisa bebusa. “Hau,
minuman apa ne Ngol pina telihat banyak busanya,” takon Haji Untat. “Ya
sirup tadi tu am. Sesuai wan pesanan pian jua tadi eh,” sahut Ongol.
Mandam Haji Untat melihat sirup bebusa banyak. Lalu sidin menyuruh
Ongol meminum sedikit sirup ulahannya inya tadi. “Minum dulu Ngol.
Bujurkah kada itu sirup atau sabun tetapasan. Masalahnya sama eh
warnanya wan sabun tetapasan,” ujar Haji Untat. Lalu Ongol meminumnya.
“hueeeek, rasa sabun Ji ai,” ujar Ongol sambil meluwak keluar.
Melihat Ongol temuak-muak harau mengangkang bebuhannya. “Hahahaha, apa
jar aku tadi. Tu sabun tetapasan nang ikam tukar Ngol ai. Hati-hati
wayah ne mun handak betetukar, bebaik tetukar sabun tetapasan karena
warnanya handak sama dengan sirup. Tapi beda botolnya ja pang,” ujar
Haji Untat. Harau habang muha Ongol imbah meminum banyu sabun tetapasan.
“Memang tesalah tukar Ji ai, lun kada ingat eh,” ujar Ongol. Akhirnya,
tamu Haji Untat nang haus bebulik kada jadi haus karena aur mengangkang
ja mengetawai si Ongol nang teminum banyu tetapasan. (*/fin)
Langganan:
Posting Komentar (Atom)
0 komentar:
Posting Komentar