ilat sapi

RAHATAN handak baelang kerumah Haji Untat naik sepeda ontel, Ongol ne bedapat wan sidin dalam perjalanan. Pas kebelujuran bedapat langsung ai Haji Untat ne menyusuh inya betetukar makanan. "Handak kemana ikam Ngol," takon sidin. "Handak kerumah pian ai Ji ai karena bebuhan kekawalan ulun sudah disana jar," sahut Ongol. "Nah pas banar Ngol ai, ikam tukarkan wadai ilat sapi lah gasan kita santai dirumah sana, oke," ujar sidin. "Oke Ji," sahut Ongol sambil menerima duit Rp20 ribu.
Rupanya inya ne kada betakon paan menukar wadai ilat sapi tu diwarung mana. "Nah ya am, kada betakonam tadi menukar dimana?," garunum Ongol pas melihat Haji Untat menjoor bulik. "Dari ngarannya ja ilat sapi berarti menukarnya diwadah penyembelihan sapi neh. Ahaaa, aku tahu ja wadahnya," ujar Ongol pina semangat bebanaran. Dan inya ne langsung mengayuh sepeda ontelnya menuju wadah nang sudah ditentukannya tadi.
Handak kisah, sampai dipenyebelihan sapi lalu ai inya betakon. "Ada jual ilat sapi kah Mang," takon Ongol. "Kedida Ngol ai, disini kedida bajual ilat sapi paan. Nang ada cuma tulang sapi hakon kada ikam," sahut Amang Bular. "Yakah Mang," ujar Ongol sambil menjoor bulik wan sambil jua memikirkan dimana pulang nang ada bajual ilat sapi tadi neh.
Cinik Ongol memikirkannya, sampai-sampai inya ne kehabisan akal. "Harau dibongoli Haji Untat aku neh. Asa kedida pang urang bajual ilat sapi. Baumuran hidup memang kada suah memakannya nah," garunum Ongol. "Kalo kaya itu aku bebulik ja wadah sidin memadahi memang kedida urang nang bajual ilat sapi," ujar Ongol sambil menggenjot ontelnya menuju rumah Haji Untat.
Sampai dihadapan rumah sidin, himung kekawalan melihat inya datang. "Asiiik, makan wadai ilat sapi kita hari wal ai," ujar Anang Gabau. Mendangar pander kekawalannya tadi, harau masam muha Ongol. "Waduh wal, ngalih banar mencari wadai ilat sapi. Aku sudah takoni di wadah penyembelihan sapi jar Amang Bular kedida bajual ilat sapi disini neh. Nang ada tulang sapi ja jar sidin tadi," sahut Ongol.
Mendangar kisah si Ongol ne tadi, harau mengangkangan bebuhannya. "Hua hahaha, wadai ilat sapi tu Ngol ai memang kedida bajual disana. Nang ada tu diwarung Acil Jablay ja," ujar Anang Gabau. "Mungkin pendengaran Ongol ne tadi, ilat sapi nang kawa disanga. Ne lainan ilat sapinya Ngol ai. Ne wadai ilat sapi. Wakakakakkk," ujar Dangdut umpat jua ketawa.
Akhirnya menyerah jua Ongol ne aur disambati buhannya. "Yakah, kalo kaya itu tunggu ai aku nukar ke warung Acil Jablay," ujar Ongol. "Jangan kada ingatlah. Wadai ilat sapi, kena pas disana disambatnya tu wadai ilat sapi'i. Itu salah pulang bisa bemamai Acil Jablay mun ditakoni kaya itu. Masalahnya tu ngaran laki sidin. Wakakakk," ujar Anang Gabau menambahi.
Hitungan 10 menit akhirnya datang pulang Ongol membawa pesanan buhannya tadi. "Nah, apa jar aku tadi wal, lainan wadai ilat sapi paan nang ditukarnya. Ne wadai gabeeenn, hahahaha," ujar Anang Gabau. "Habis jar sidin wal ai. Daripada kedida makanan lebih baik aku tukarkan wadai gaben," sahut Ongol membela diri. (fin).

Sumber Berita: http://www.radarsampit.net/berita-ilat-sapi.html#ixzz3JblwUlGC