Pinamelihat bebuhan peacilan banyak
memakai kerudung lalu bini Ongol ne handak juga meumpatinya. Rupanya
inya ne supan handak menukar kerudung di pasar PPM Kampung Liur, lalu
menyuruh lakinya menukarkan. Pesan bini Ongol neh carikan kerudung
warna hirang supaya bisa dipadukan wan baju apa ja karena warna hirang
warna netral. “Yang hiranglah,” ujar Galuh Lintak bepesan wan lakinya.
“Hi-ih, hirang sabukuankah atau hiran sedikit, ada putih-putihnya
nangkaya tahi cacak tu,” sahut Ongol. “Hirang sabukuan, titik,” ujar
Galuh Lintak pina bemamai-mamai.
Handap kisah, kada berapa lawas sampai jua Ongol kewadah
tujuan. Lirik sana sini mencari nang ngarannya kerudung tadi. “Yang
manakah nang ngarannya kerudung neh,” ujar Ongol pina telihat bingung
sorangan pas ada dipasar khusus bejual kain. “Kadakah nang itu tu,” ujar
Ongol sambil menuju kearah bebinian nang pina asik bekipas.
Japai sana, japai sini, rupanya nang beduduk bekipas tadi
langsung mendatangi Ongol. “Murah ja tu Bang ai,” ujar benian tadi
ternyata ngarannya Siti Asoy. “Kalo murah tu berapa,” takon Ongol. “Kada
sampai seratus ribu bang ai, gasan piankah atau gasan bini pian,” sahut
Siti Asoy. “Gasan bini ah, masa gasan ikam,” ujar Ongol pina tamam ja
lawan pander. “Kalo ai gasan ulun, hehehe,” sahut Siti Asoy pina telihat
lanji dihadapan Ongol. Sekalinya inya ne janda anak 2 ikung.
Rupanya Ongol ne rahatan menukar tadi, kada betakon paan.
Apakah itu kerudung atau jilbab nang penting menutupi kepala. “Nukar
warna hirang tu am,” ujar Ongol kada betawar lagiam. “Harganya seratus
ribu Bang ai,” sahut Siti Asoy. “Kada papa ja, asal bini senang,” ujar
Ongol pina mantab banar lawan pander. Lalu dibungkusai nang ditukar
tadi.
Lalu Ongol pina telihat semangat bebanaran maklum bisa
menukarkan kerudung gasan bini tersayang. Bebaya sampai didalam rumah
langsung ai menampaikan kerudung tu tadi. “Astah, ne jilbab Bang ai,
lainan kerudung,” ujar Galuh Lintak bina berot muha. Apada, masam muha
Ongol pas mendangar nang ditukarnya tadi tu tesalah. “Iyakah, nah iyaam.
Kada tahu aku tu nang ngarannya kerudung lawan nang ngarannya jilbab.
Waduhlah,” ujar Ongol pina geleng-geleng kepala. Kada berapa menit harau
behancap bebulik mendapati penjual kerudung tu tadi. Tapi sialnya, inya
ne handak mehurupkan kerudung sudah kesorean kebelujuran sore tu PPM
Kampung Liur tutup. Paksa ai isuk. Tapi sialnya lagi, Siti Asoy tulak
keluar kota semingguan handak menukar barang gasan menambahi isi
tokonya. Mau kada mau ai mehadangi semingguan. Galuh Lintak ne pina
telihat masam muha, apada, harau semingguan jua Ongol kada dapat jatah.
“Ya am, ngangguram,” ujar Ongol memicik kepalanya. (fin)
0 komentar:
Posting Komentar