RUPANYA Ongol kada tahan jua hidup sorangan, imbah berapa bulan mengabdi sebagai reporter surat kabar inya melamar pujaan hati yang lawas dipacarinya, Galuh Lintak.
Ngarannya Ongol, supaya meriah acara kawinanya yang digelar tiga hari tiga malam di dua tempat, semua warga Kampung Liur diundangnya.
Imbah acara, Ongol tujah kada kawa begarak, apa handak sekampungan urang besalaman lawannya meucapkan selamat pas resepsi.
Isuknya, Ongol pina sigar. Nyarannya pangantin hanyar, pina kada mau bepisah lalu Ongol lawan Galuh Lintak ni, nang penting jar Ongol bedempetan tarus ja.
Sambil menjalani rumah tangga, Ongol kembali disibukan lawan gawiannya mencari berita, belujuran Ongol ni mendapat tugas liputan.
Suatu hari, Ongol meliput kasus kekerasan dalam rumah tangga (KDRT), kasus Anang Gabau mengerokoti burit Dangdut bininya.
Ongol sibuk sana kemari meumpati kasusnya, mulai memintai keterangan polisi, pelaku Anang lawan korban Dangdut sampai urang Kampung Liur nang tahu kisahnya diwawancarai Ongol.
Singkat kisah, sewalas meumpati kasus ini, Ongol nang baisi kebiasan buruk (suka lirik binian) rupanya tagoda lawan kebungasan Dangdut. Ongol sampai kada ingat lawan bini di rumah, tiap bejalan Ongol bepadah lawan bininya liputan.
“Liputan apa pian bang, pina sibuk banar ulun lihat berapa hari ini, tulak sungsung bulik subuh,” takon Lintak.
“Kasus ganal ding ai, Anang Gabau mengerokoti bininya sampai luka, Anang dilaporkan Dangdut ke polisi. Anangnya sudah ditangkap polisi am,” jawab Ongol.
Mendangar itu, Lintak menyadari gawian lakinya sebagai wartawan. Ngarannya Ongol mumpung lagi sendiri jar, sudah kanal lawan Dangdut, sekalinya menjalin hubungan diam-diam.
Mun kada bemotor, Ongol membawa Dangdut bejalan pakai mubilnya kijang kotak. Setiap tatamu urang kampung, Ongol bepadah lagi membantu menyelesaikan kasus Dangdut lawan Anang Gabau jar.
“Uuuii Ngol, kemana kam haur menjinting bini urang,” ujar H Untat betakon lawan Ongol nang kabalujuran lewat di hadapan rumah sidin.
“Iya am na Ji, kasian Dangdut ni jadi korban KDRT,” sahut Ongol pina takurinyum.
Rupanya, Galuh Lintak mulai curiga dengan gerak gerik Ongol. Kenapa lah, limbah kawin dua sampai lima hari, Ongol damdaman tarus pina handak lakas bulik ja.
Suatu hari Lintak minta Ongol meantarnya nukar wadai di pasar. Sambil menunggu Ongol baganti baju, Lintak langsung masuk mobil.
Kada seberapa, Lintak curiga melihat warna habang di bawah jok tengah. Imbah di tariknya, sekalinya cawat warna habang ada gambar kambang mawar.
“Bang, ni kain apa, ulun dapat di bawah jok mobil pian. Pinanya cawat ni bang,” takon Lintak.
Mandangar tamuan bininya, takujut Ongol, ”kalo cawat ampun ikam ding tatinggal dalam mobil pas kita bejalanan ke pantai semalam,” jawab Ongol sekenanya.
“Kedida ai ulun baisi cawat warna habang, ada gambar mawarnya lagi,” sahut Lintak lagi sambil curiga lawan Ongol.
Nah iya am jar Ongol, bisa ketahuan ni cawat Dangdut tetinggal dalam mobil, Ongol pina batunduk sambil mencari alasan gasan menjawab nyaman bininya kada curiga.
“Pian jangan macam-macam bang lah, kalo pian ketahuan membawa binian dalam mobil. Kena ulun padahkan lawan abang lun (H Walet),” ancam Lintak.
Mandangar ancaman bininya, Ongol lalu menjawab, “nah iya am ding ai rusak am, tu barang bukti (cawat) nang abang dapat di barak Anang. Abang ni lagi menyelidiki kasus perselingkuhan Anang Gabau, bininya (Dangdut) handak melaporkan Anang selingkuh lawan Acil Kelilu,” jar Ongol bealasan. (fm)

Sumber Berita: http://www.radarsampit.net/berita-cawat-habang.html#ixzz3IZsjYTOS