dikira perampok

Hari semalam Ongol mehadangi bininya nang lagi betetukar di PPM Kampung Liur. Inya ne mehadangi pas dihiga Anang Gabau nang lagi duduk didalam beca. “Mehadangi binikah wal,” takon Anang Gabau. “Ya am, sudah 2 jam mehadangi nah tapi belum datang jua,” sahut Ongol sambil mehisap roko cap pekat. “Nang dibelakang ikam tu siap Ngol,” takon Anang Gabau. Mendangar pander Gabau tadi harau takelipik Ongol. “Iyakaaah,” sahut Ongol pina habang muha sampai takepai roko dimuntung.
Rupanya Ongol ne kada langsung bebalik kebelakang paan melihat bininya nang lagi asik menyimpunan tetukarnya. Kada berapa menit langsung ja inya ne menancap gas sepeda motornya nang memang sudah tumatan tadi dihidupkannya. “Oooiiii, bini tetinggaaaaal,: kuriak Anang Gabau. Tapi Ongol ne kada tetahu muha paan.
Lalu ai Anang Gabau ne menyuruh Amang Bular wan Dangdut mengejar Ongol memadahkan bahwa bini tetinggal dibelakang alias kada ingat dibawa. “Lakasi kejar Ongol tu wal ai, inya kira tadi bininya sudah duduk am dibelakang sepeda motor. Makanya inya dikiyau kada tetahu muha paan,” ujar Anang Gabau menjelaskan wan kekawalannya.
Handap kisah, kecepatan sepeda motor Amang Bular wan Dangdut ne lumayan hitungan 2 menit ja sudah ada dibelakang Ongol sekitar 2 meteran. “Ooooiiii,” kuriak Dangdut. Mendangar ada urang bakuriak dibelakang, harau behimat banar Ongol menggas sepeda motornya. “Jangan-jangan dibelakang rampok,” garunum Ongol pina kada tetahu muha paan alias pengencet.
Kesalahan Amang Bular wan Dangdut ne helem buhannya lensa penutupnya kada dibuka lalu dikira Ongol perampok nang handak mehadang inya. “Jangan ngeebuuuuuuttt. Ngol, bini ikam tetinggal,” kuriak Dangdut sambil menancap gas sepeda motornya. Tapi, Ongol ne tetap kada tetahu muha inya tetap menancap gas sepeda motornya.
Kada berapa menit dihadapan bebuhannya ada lampu habang terpaksa ai Ongol bemandak dulu. Kada berapa menit jua ada am Amang Bular wan Dangdut dihiganya. “Bongol banar ikam neh. Bini ditinggal dibelakang,” ujar Dangdut sambil membuka lensa penutup helem.
Melihat Dangdut wan Amang Bular dihiga harau tekajut Ongol. “Astagaaa, iyakah wal. Bah iya pang. Aku kira tadi nang menyasah aku ne rampok. Makanya kita kebut-kebutan tadi,” ujar Ongol sambil menapak dahi sorang. “Ikam ne bini ditinggal segala. Memangnya kami ne ikam kira tadi perampok nang behimat banar menyasahlah,” ujar Amang Bular.
Akhirnya Ongol bebulik ke PPM Kampung Liur mendatangi bininya nang tetinggal tadi. “Muar banar lun wan pian neh. Bini sorang ditinggal,” ujar bini Ongol nang bengaran Galuh Lintak. Melihat Ongol dimamai bini harau mengangkang bebuhan Anang Gabau. “Hua hahahaha, ya am. Dasar Ongol jua inya neh. Bini sorang ditinggal, untung kedida nang meambilnya,” ujar Anang Gabau. Apada, lintuk ai dagu Ongol imbah dimamai bini wan disambati kekawalannya sorang. (fin)

Sumber Berita: http://www.radarsampit.net/berita-dikira-perampok.html#ixzz3JbqaswFy