bakpao halus

mbah bulik begawi memantat di kebun sore tu bebuhan Ongol bulikan menyubarang menuju Kampung Liur. Sudah jadi kebiasaan bebuhannya mun tuntung begawi tu kada langsung bulik kerumah melainkan singgah dulu di jembatan wadah biasa nongkrongan. “Lakas bulik kedida nang digawi jua dirumah neh. Mending dudukan dijembatan ja,” ujar Anang Gabau. “Sip tu wal ai. Apalagi malam ne malam minggu kedida bisi pacar ne paksa ai joblo dulu nah. Hehehe,” sahut Dangdut. “Mun handak bebini tu harus beniat coy ai. Mana hakon ah binian melamar ikam mun becari gin kada hakon. Hahaha,” ujar Ongol pina musti banaran menyambati kekawalannya sorang.
Waktu terus besasar parak magrib, cacing diparut mulai bagendang didalam parut Anang Gabau neh. “Cacing lagi menelpon coy ai. Artinya disuruh makan bakpao am neh. Hehehe,” ujar Anang Gabau. “Mun handak makan bakpao tu coy ai bebagi wan kawan neh,” sahut Ongol. “Nah pas banaran wal ai. Ikam ja nang menukarnyalah di warung Acil Jablay,” ujar Anang Gabau sambil meunjuk duit sepuluh ribu. “Oke sip,” sahut Ongol pina semangat bebanaran.
Handap kisah, tulaklah si Ongol ne bejalan batis karena jarak antara jembatan wan warung kada tapi jauh paan. “Hau, ikam umpat aku kah coy,” takon Ongol. “Ya am, biaram Gabau sorangan disana. Aku handak melihat bakpao ulahan Acil Jablay ne ai,” sahut Dangdut. “Okelah kalo begitu coy ai. Tapi, ikam kena nang membawanya ke jembatanlah. Imbah menukar bakpao tu aku handak menukar roko cap pekat,” ujar Ongol. “Sip,” sahut Dangdut.
Sekalinya Ongol ne licik jua urangnya, inya nang disuruh Anang Gabau menukar bakpao malahan Dangdut nang disuruhnya. “Licik, aku nang disuruh,” ujar Dangdut pina sangkal banaran. “Tenang ja coy. Duitnya tu sepuluh ribu artinya dapat 10 buting bakpao. Ya kalo,” ujar Ongol. “Aku ne handak menukar roko cap pekat ja disana,” ujar Ongol pulang. “Yak ah,” sahut Dangdut.
Kada berapa menit imbah menukar bakpao di warung Acil Jablay datanglah si Ongol ne sambil baroko cap pekat. “Sudah ditukarlah coy,” takon Ongol. “Sudah Coy ai. Tenang ja sesuai dengan apa jar ikam tadi,” sahut Dangdut. “Mantab. Tapi, aku handak menukar bakpao nang itu nah. Seribuan ja kalo harganya. Hehehe,” ujar Ongol sambil mendatangi Acil Jablay.
Merasa ada Ongol nang datang handak menukar bakpao, behancap sidin menakoni. “Nukar nang mana Ngol,” takon Acil Jablay. “Nang ganal tu Cil ai. Handak lun makan langsung ja masalahnya ne pakai duit ulun sorang eh,” ujar Ongol. Lalu bakpao nang ganal tu diunjuk sidin. “Nah, jangan beutanglah,” ancam Acil Jablay. “Inggih Cil,” sahut Ongol sambil menungap bakpao ganal. “Nyaman Cil ai. Terasa banar kacangnya. Hehehe,” ujar Ongol pina kehimungan banaran.
Bakpao nang dimakan tadi tu sudah handak habis. Nganga-nganga Acil Jablay ne melihat kelakukan Ongol nang pina nahap banaran makan bakpao ulahan sidin. “Seribu ja kalo Cil harganya,” takon Ongol. Habang muha Acil Jablay. “Muha ikam ah. Tu harganya lima ribu Ngolai,” ujar sidin pina menyumpah. Harau mengangkang Dangdut melihat sidin menyumpah. “Hahahaha, rasaiiiin. Makan tu bakpao,” ujar Dangdut.
Harau masam muha Ongol pas disumpahi Acil Jablay. “Sesuai dengan perjanjian tadi. Kada boleh bautang. Mun bautang hukumannya membersihkan rumah aku selama semingguan,” ujar sidin tanpa kompromi lagiam. Melihat kondisi kada memungkinkan langsung bukah am Dangdut ne mendatangi Anang Gabau. “Ongol dihukum Acil Jablay karena kada membayar bakpao. Dikira inya bakpao ganal tu harganya seribuan ja. Sekalinya lima ribuan. Hahahaha,” ujar Dangdut bakisah wan Anang Gabau. Apada, sama-sama mengangkang ai bebuhannya melihat kelakukan si Ongol tadi. (*/fin)

Sumber Berita: http://www.radarsampit.net/berita-bakpao-halus.html#ixzz3JzCPDyO0