TUMATAN halus, Ongol banyak dilajari kuitannya soal ilmu agama. Pesan
yang paling diingatnya adalah jangan kada suah mandiriakan sembahyang
lima waktu. Kada salah apa nang diamanti kuitannya, mulai bujang sampai
bebini lawan Aluh Lintah, sembahyang si Ongol lancar.
Dan nang paling rancak digawinya adalah sembahyang bejamaah di
masigit Kampung Liur. Bubuhan nang lain Anang Gabau, Utuh Kalubut, Utuh
Lengkor wan Haji Untat umpatan jua.
Nah, sadikit aneh subuh kamarian bubuhan Ongol, Anang Gabau, Utuh
Kalubut, wan Utuh Lengkor kada talihat di masigit. Subuh itu harinya
dingin banaran karna bakas hujan semalaman. Padahal buhannya ne sudah
banjian besebuh bejamaah, biarpun hari hujan lababt, tatap tulakan.
Sampai orang qamat, waktu sembahyang sudah parak balum ada jua
bubuhannya kalihatan. Tapi imbah tuntung sembahyang sampai salam lalu
bubaran, hanya Anang Gabau wan Utuh Lengkor nang kalihatan.
“Kukira ikam kada ka masigit, mulai tadi kada kalihatan,” ujar Utuh Lengkor
“Talalu-lalu banar ikam Kor ai kalu sampai kada malihat awakku nang ganal ini,” sahut Anang Gabau.
“Di mana ikam duduk?” ujar Utuh Lengkor.
“Aku datang talambat Kor ai maka aku duduk di barisan saf paling balakang,” ujar Anang Gabau.
“Kalu saf paling balakang itu adalah safnya bibinian,” ujar Utuh Lengkor sambil tatawa.
“Kalu aku talambat kada napa-napa karna masih sawat haja umpat
bajamaah, tapi kawal kita si Ongol itu sampai tuntung salam kada
kalihatan batang hidungnya,” ujar Anang Gabau.
“Kawal kita nang saikung itu sudah kabiasaan katuju sembahyang
mang-qada,” ujar Utuh Lengkor, sambil manunjuk Ongol mancungkung duduk
di gardu.
“Kanapa maka talambat Ngol, padahal kita sudah bajanji biarpun hujan labat tatap ka masigit,” ujar Anang Gabau.
“Mungkin kanyamanan guring melengkor karna hari dingin-dingin,” ujar Utuh Lengkor.
“Sakali-sakali uzur bulih haja kalu karna bahalangan sebab kawa haja diqada,” ujar Ongol.
“Ayu lakasi baudhu lalu sembayang, masih sawat haja waktunya kaina kami hadangi ikam di warung Acil Jablay,” ujar Anang Gabau.
Wayah Ongol manguliat handak badiri, kadangaran bininya bakiyauan :
“Ui abahnyaaa ... abahnyaaa ... lakasi bulik,” ujar suara bini Ongol
nyaring banar. “Nah Ngol ikam dikiyau pulang,” ujar Anang Gabau.
“Abahnya lakasi bulik,” ujar suara bininya lalu kada lawas bininya mancungul datang ka gardu.
“Kanapa maka abahnya disuruh bulik, Ongol handak baudhu,” ujar Anang Gabau.
“Baudhu napa? Inya kubawai bulik karna handak kusuruh mandi,” sahut Ongol.
“Biar balum mandi bulih haja baudhu dan sembahyang,” ujar Utuh Lengkor mambilaakan Palui.
“Kada bulih baudhu apalagi dibawa sembahyang Gabau ai, karenaaa ...
karna aku balum mandi. Maklumlah malam tadi tapakai,” ujar Ongol pina
supan kasisipuan. “Naahhh ... katahuan Imbah ba...,” ujar Utuh Lengkor
wan Anang Gabau mangalakak tatawaan.
Langganan:
Posting Komentar (Atom)
0 komentar:
Posting Komentar