kursi jabuk

Hari semalam bebuhan Ongol bulikan tumatan kebun handak menuju kerumah masing-masing. Tapi, pas ditengah jalan inya ne melihat ada buah nang bagelantungan, lalu ai inya handak memakannya. “Rambutan wal,” ujar Ongol sambil menunjuk kearah pohon rambutan. “Sikat Ngol, itu rezeki kita karena rantingnya bajuluran ke luar pagar,” sahut Anang  Gabau. “Yakah, mun disangeti ampunnya ikamlah nang bertanggungjawab,” ujar Ongol. “Putik ja, kena aku memakaninya. Hahahaha,” sahut Anang Gabau. “Busyeeet,” ujar Ongol pina habang muha.
Handap kisah, rupanya imbah memutik rambutan nang bagelantungan diluar pagar lalu ai Ongol beduduk diatas kursi nang memang sudah ada dihiga pagar. “Duduk dulu aaaah, sambil makan rambutan. Mun makan sambil bajalan tu pamali wal ai,” ujar Ongol pina musti banaran. “Yakah Ngol, mun makan sambil bakisah pang apa am hukumnya,” takon Anang Gabau. “Nah iya am, kada paham am wal ai, hehehe,” sahut Ongol pina takurihing sorangan.
Kada berapa menit inya beduduk diatas kursi kayu, tedangar suara kayu patah, bruaaak, kursi nang diduduki Ongol batisnya patah semuanya. Apada, teduduk Ongol sampai kada terasa rambutan dimuntung umpat jua tetagok. “Wakakakak, harau pacah biji neh,” ujar Anang Gabau. “Aduuuuh, bore banar ikam neh. Kada paan pacah bijipun aku neh wal ai,” sahut Ongol pina habang muha.
Rupanya suara kayu patah nang pina nyaring tadi tedangar urang rumah nang ada didalam pagar. Guk, guk, guk. Suara anjing menggonggong. Apada, birai muha bebuhannya pas mendangar ada suara anjing tumatan dalam pagar. “Bukahaaaan,” kuriak Anang Gabau. Apada, behancap jua Ongol bukah kada meingat diri, padang sakit pinggang bakas teduduk tadi diatas kursi jabak bukahnya si Ongol ne paling laju.
Sekalinya didalam pagar tadi tu lainan suara anjing paan, sekalinya suara mainan nang diandak Haji Lului supaya apabila ada nang ketuju menjuhut rambutan sidin suara anjing tu am jadi andalan sidin. “Hehehe, kenapa tipu kalian yaaaa. Masa rambutan urang lagi bebuah dihantup tarus. Kalo bepadah kada papa ja, ne kada bepadah tu nang aku sangkalnya,” ujar sidin pina bemamai sorangan.
Baya sampai dijembatan wadah biasa bebuhannya bedudukan karena kada jadi bulik, napas bebuhannya ne tahengap-hengap jua. “Harau dibongoli kita tadi toeh,” ujar Ongol. “Dibongoli apanya Ngol. Jelas-jelas tadi tu suara anjing hegler nang ilatnya keluar sambil beliuaran. Ujar siapa pulang itu lainan suara anjing,” takon Anang Gabau. “Masalah wal ai, suara anjing tadi tu ada suara kuhuk-kuhuk. Berarti tu suara rekaman anjing lagi menggonggong ja,” sahut Ongol. “Astagaaa, harau memang dibongoli kita tadi lah, hehehe,” ujar Dangdut pina umpat jua hengap-hengap wan pehinakan. (*/fin)

Sumber Berita: http://www.radarsampit.net/berita-kursi-jabuk.html#ixzz3JbpNk3P5