dikerokot kucing

Hari minggu semalam Ongol ne imbah membasuh sepeda motornya nang hibak licak. Maklum motornya neh semalam dibawanya behayau kekebun Haji Untat nang memang jalannya kada beaspal alias balumpur. Rahatan dalam perjalanan inya ne bedapat wan kekawalannya. “Handak kemana ikam Ngol,” takon Anang Gabau. “Handak kewarung Acil Jablay ja coy ai makan pisang goring. Umpat kesanakah,” ujar Ongol. “Ayoooo, ikam duluan ja lah kena kami menyusul,” sahut Dangdut pina mantab banar wan pander.
Handap kisah, sesuai wan janji betiga ne sudah ada di warung Acil Jablay sambil makan pisang goreng panas-panas. Apada, tepaluh-paluh Ongol memakannya tadi. “Motor ikam tu hanya dibasuhkah Ngol,” takon Anang Gabau. “Hanyar tadi coy ai aku bersihkan. Melining kalo. Hahaha,” sahut Ongol pina nahap banaran. “Pakai kit kalo Ngol,” takon Dangdut menambahi. “Pakai kit coy ai, mun kada pakai kit toeh kada melining kaya itu pang. Hua hahaha,” ujar Ongol sambil mengangkang behimat pina kehimungan.
Kada berapa menit datang Haji Untat, sidin ne naik sepeda ontel ja kewarung Acil Jablay neh. “Uma, uma aaaai, buhan ikam ja nang ada diwarung neh. Kedida nang lain lagi kah,” ujar sidin sambil menjuhut jua wan pisang goreng panas. “Siapa lagi am Ji ai nang meramikan Kampung Liur neh selain buhan kita ne am. Ya kalo Ngol,” ujar Anang Gabau. “Bujru toeh,” sahut Ongol.
Rupanya Haji Untat ne hanyar sadar ja melihat ada sepeda motor melining dihadapan warung Acil Jablay. “Astagaaa, itu motor ikam kah Ngol. Melining banar la,” ujar sidin. Harau beganal baju Ongol ne aur diambung bebuhannya tadi. “Hanyar habis dibasuh tadi Ji ai. Ulun bari kit wan harum-harum,” sahut Ongol pina telihat takurihing sorangan.
Sekalinya, rahatan himung-himungnya ada kucing ganal beluncat duduk di sadel sepeda motor Ongol. Warna kucingnya neh hirang babuntut panjang. “Ngol, ada kucing tu be. Bebaik bebau kena motor ikam. Kan hanyar habis di basuh tadi,” ujar Anang Gabau. “Kada papa wal ai. Itu tandanya bahwa motor pun aku toeh jangankan manusia, kucing gin ketuju beduduk disadelnya toeh. Hua hahahaha,” sahut Ongol pina semakin himung.
Kada berapa menit, kucing hirang ganal babuntut panjang tadi tu telihat lagi mengerokot sadel sepeda motor pun si Ongol tadi. “Kucingnya mengerokot Ngol, bebaik takulayak sadel sepeda motor ikam,” ujar Anang Gabau. Mendangar pander Anang Gabau tadi harau tekajut si Ongol neh. “Nah iya aaaam, kurang ajar banar kucing neh. Habis takulayak am sadel sepeda motor aku naaah,” ujar Ongol pina habang matanya.
Melihat Ongol pina habang matanya harau mengangkang bebuhan Anang Gabau. “Ujar tadi kada papa ja, hua hahahaha sekalinya sadelnya dikerokot kucing. Nyamaaaan. Rasakan,” ujar Anang Gabau. Harau kada banyak bunyi lagi am si Ongol pas melihat sadel sepeda motornya rabit-rabit dicakar kuring hirang ganal babuntut panjang tadi. Haji Untat ne takurihing ja sidin maklum sidin ne kada kawa bepander karena dimuntung bekajal pisang goreng panas-panas sampai tekajul-kujul sidin memakannya. (fin)

Sumber Berita: http://www.radarsampit.net/berita-dikerokot-kucing.html#ixzz3JboKhZxs