salah kaos tim

Di kampung liur pina rami banaran orang memander akan musim bola ujar. Tambah pulan Haji Untat handak meadakan nonton bola baramian jar di hadapan rumah sidin. Pina rami banaran kisah urang pas liwatan muka rumah Ongol nang habis datang dari rumah Haji Untat.
“Kenapa pina rami nih kisah, ada apa jar di wadah Haji Untat handak bemakanan kah..?” ujar Ongol menagur Utuh Lengkor lawan Anang Gabau pas liwat muka rumahnya.
“Uma…ikam tatinggal kabar kah Ongol? Malam kena Haji Untat meolah nonton bola baramian di rumah sidin,” ujar tuh Lengkor menyahut.
“Ini pang kami hanyar datang rumah sidin nah, menolongi memasang akan layar nang ganal tuh di muka rumah sidin,” ujar Anang Gabau.
“Ikam nih, dari mana kah jar sepuluh sudah hari hanyar aja keluar rumah pina betapih-tapih,” ujar Utuh Lengkor manakoni Ongol pina masih batapih keluar rumah.
“Hanyar bangun guring aku nah. Malam tadi pang begadang di pos ronda takana jaga aku malam tadi,” ujar Ongol.
“Rami berarti lah malam kena wadah Haji Untat orang menonton. Umpat pang jua aku melihat,” ujar Ongol.
“Ayu pang, handak umpat kadida yang menangati jua. Kudangar buhan kampung walet gin datangan jua handak menonton wadah Haji Untat,” sahut Utuh Lengkor.
“Ayu ae lah, Ongol kami handak bulik makan dahulu, malam kena ja lagi kita bedapatan wadah Haji Untat baramian,” ujar Anang Gabau langsung bajalan pulang dengan Utuh Lengkor.
Masuk ae lagi Ongol ka dalam rumah melihat TV sambil menunggu hari malam, talimbas isya hanyar tulak ke wadah Haji Untat sambil bapikir. “Pakai baju apa malam kena lah?” ujar Ongol Bagarunum dalam hati.
Sambil bajalan bulik, Anang Gabau lawan Utuh Lengkor marunding akan baju kaos tim yang handak dipakai malam kena manonton wadah Haji Untat.
“Malam kena nih Brasil lawan Inggris yang main. Ikam mendukung negara mana Nang?” Ujar Utuh Lengkor batakon.
“Aku mendukung Inggris haja, samalam bini ku sudah manukar akan kaos tim Inggris gasan manonton, maka ku pakai itu haja malam kena,” ujar Anang Gabau.
“Aku nih mandukung Brazil haja. Buhannya tuh main bagus banar. Kaina gin aku setumat bajalan ka wadah Acil Jablay handak manukar kaos tim Brasil, kalo pina ada,” ujar Utuh Lengkor.
“Ayuha, malam kena kita bedapat wadah Haji Untat lah. Aku handak guring dulu setumat lawan makan, sakira malam kena kada mengantuk lagi,” ujar Anang Gabau.
“Ayuha, aku bulik dulu lah,” ujar Utuh Lengkor.
Malam sudah hari azan isya liwat sudah, lalu ae Ongol basiap-siap jua dari rumahnya handak ke wadah Haji Untat, mengeluarkan sapidanya.
“Ding, aku handak manonton bola lah wadah Haji Untat. Ayuha Kunci rumah, tapi cabut kaina kuncinya, nyaman aku kawa membuka dari luar,” ujar Ongol memadahi bininya, Galuh Langkar.
“Inggih ayuha. Jam berapa garang pian bulikan? Jangan kada ingat sapida masuk akan lagi kaina ka dalam rumah, kalo pina dicuntan maling,” ujar Galuh Langkar mamadahi Ongol.
Sakira lakas ongol maninjak sapida, sakira lakas sampai wadah Haji Untat. Tapalar pang rami di jalanan orang pina bajalan ke wadah Haji Untat pakai baju warna kuning lawan baju kaos tim warna putih.
“Ongol handak ke mana pina laju banaran jar, baju pina warna habang pulang,” ujar Amang Utuh Kalubut.
“Wadah Haji Untat mang, manonton bola,” ujar Ongol Pina laju.
Pas sampai wadah Haji Untat, bingung ae Ongol, kaos tim orang pina manguning lawan putih, ampun inya sorang warna habang pina menyala. Langsung ae Ongol mendatangi buhan Anang Gabau lawan Utuh Kalubut nang badiri di hadapan rumah Haji Untat.
“Kenapa ikam Ongol salah Kostum malam ini?” ujar Anang Langsung managur sambil takurihing.
“Aku neh kada tahu jar siapa yang main, aku kira tadi Indonesia tadi nang main. Lalu ae aku pakai baju baju warna habang,” ujar Ongol pina supan menyahut.
“Makanya ikam tu Ongol ae, batakun dahulu siapa yang main, jangan pina harat. Indonesia tu balum masuk piala dunia lagi. Kena bila Indonesia masuk piala dunia, kada mungkin kami kada pakai baju warna habang jua, hahaha…” ujar Anang Gabau menyambat langsung tetawa.
Maharit supan Ongol langsung ae bulik pulang ka rumah, apa orang barataan melihati Ongol pakai baju habang pina menyala. Lain daripada yang lain ampun Ongol.

Sumber Berita: http://www.radarsampit.net/berita-salah-kaos-tim.html#ixzz3Ia0ah2ZX