Asap knalpot

Hari semalam Ongol wan kekawalannya sore tu bedudukan dijembatan sambil barokoan cap pekat. Tumatan jauh ada Haji Untat handak mendapati bebuhannya membari kabar baik neh. "Duit gajih buhan ikam ambil dirumahlah. Sudah aku siapkanam mulai sungsung tadi," ujar sidin kemudian meninggalkan buhannya. "Inggih Ji," sahut Ongol pina kehimungan banaran.
Mendangar duit gajihan sudah keluar lalu betiga ne behancak bulik kerumah masing-masing meambil motor. "Kita beimbai ja, kumpul dijembatan ne am laaah," ujar Ongol. "Ayujaaa," sahut Anang Gabau pina kada meingat diri jua bulik karena dalam pikiran cagaran cair tu pang.
Handap kisah, sesuai wan rencana betiga ne saling batetungguan di jembatan. "Kemana Ongol neh tumatan tadi kada mencongol," takon Anang Gabau. "Lagi bahera wal ai. Aku tadi betakon wan anaknya nang lagi bemainan dipelataran rumah," sahut Dangdut. "Bah iya pang, belambatam kita tulaknya neh," garunum Anang Gabau.
Kada berapa menit mencongolam Ongol tumatan jauh. "Ooouuuiii, beimbaaaai," kuriak Ongol tumatan kejauhan. "Hi-iiiihh, lajui am. Sudah jam berapa ne kesorean kenaaa," sahut Anang Gabau umpat jua bakuriak. "Maok jua Ongol neh, sudah dihadangi bakuriak pulang," garunum Dangdut. "Sabar ja wal, mun kedida inya ne kada rami Kampung Liur," ujar Anang Gabau mencoba menenangkan pikiran kawannya neh.
Akhirnya betiga ne tulakan menuju kerumah Haji Untat. Pertama buhannya melewati simpang tiga lalu belok kekiri imbah tu lurus pas lurus belok lagi kekiri. Lurus pulang, simpang 3 babelok kekanan dikit belok lagi. "Maklum ja jalan kampung banyak kelokannya, hehehe," ujar Anang Gabau.
Sekalinya betiga ne belum jua sampai kerumah bos pekat ne malahan singgah dibawah pohon rumbia. "Santai dululaah, barokoan dululaaah," ujar Ongol sambil melikit rokonya pas dihiga mobil nang ada dibawah pohon rumbia. "Oouii, kalo pina meledak melikit roko toeh. Tu parak bensin," tagur Anang Gabau. "Kada papa ja wal ai masih jauh nah," sahut Ongol.
Kada berapa menit imbah inya melikit roko cap pekat pas handak mehisap. Mobil nang ada dihiga ne hidup. Brem, brem, breeemmm.. Asap keluar tumatan knalpot nang ganal tu pas dihadapan Ongol ne am. Pas kebelujuran corong knalpotnya dihiga wadah Ongol beduduk diatas motornya sorang.  Apada, hirang muha Ongol. "Wakakakak, muha Ongol balatat," ujar Anang Gabau.
Sementara itu, mobil nang mengeluarkan asap hirang sudah bukaham kada tetahu lagiam wan si Ongol nang takena latatnya tadi. "Kurang ajar banaran. Menggas kada bepadah. Awas ikamlah," ujar Ongol pina bemamai sorangan. "Makanya Ngolai lihat dulu posisi knalpot mobil pun urang toeh. Jangan bebarangan ja beduduk. Jangan salah urang paan salah ikam dong kenapa hakon beduduk pas dihiga knalpot nang corongnya dihiga," ujar Anang Gabau menjelaskan panjang lebar.
Apada, benyem ai Ongol dijelaskan kekawalannya. Lalu betiga ne tetap berangkat menuju kerumah Haji Untat handak meabil duit gajihan. Sekalinya sial jua betiga ne baya sampai kerumah sidin lawang rumah bakunci. Pas dihadapan lawang tu ada tulisan 'mohon maaf, urang rumahnya lagi bakunjangan' ujar tulisan tadi. Apada, masam ai muha buhannya. "Jaka tahu tadi kada singgah paan," garunum Ongol. "Ya am, memang sial ikam umpat kami ne Ngolai, hahahaha," ujar Anang Gabau. Apada, merangut ai muha Ongol disambati buhannya. (fin)

Sumber Berita: http://www.radarsampit.net/berita-asap-knalpot.html#ixzz3JblkRstY