Hari
semalam buhan Ongol naik pohon rambutan pun Haji Untat nang bebuah labat
banaran. Selain labat buahnya rasa buah rambutannya gin manis
sampai-sampai urang mengira rahatan sidin menanamnya basiram wan banyu
bagula. “Kita putiki ja, kita jual Ngol ai,” bisik Anang Gabau.
“Kena ketahuan sidin nangkaya apa am,” sahut Ongo. “Basembunyi kita
dibawah kolongan rumah sidin biar sidin habut mencari kita, hehehe,”
ujar Anang Gabau pina menyakinkan banaran wan pander. “Okelah kalo
begitu,” sahut Ongol.
Handap kisah, rahatan meambil buah rambutan Haji Untat lagi handak
kebelakang rumah. Karena melihat ada sidin behancap bedua ne masuk
dibawah kolong rumah. “Astagaaa, ada ja nang meambil buah rambutan pun
aku neh. Sungguh terlaaaalu,” ujar sidin sambil membujuri wan tapih nang
telului. “Maka rambutan ne sudah handak habisam. Jangan-jangan buhan
Ongol neh,” garunum sidin sambil mengira-gira siapakah nang ketuju
menaiki rambutan sidin.
Dibawah kolongan rumah, bedua ne hinip kada banyak bunyi paan
walaupun banyak nyamuk disana. “Nyamuuukkk,” ujar Ongol pina gemet
banaran bepander. “Behinip Ngooool,” sahut Anang Gabau. Blak, bunyi
Ongol menapak nyamuk nang hinggap dipipinya. Apada, habang muha Anang
Gabau melihat kelakukan si Ongol.
Rupanya Haji Untat ne tumatan tadi am tahu bahwa bedua ne ada dibawah
kolongan rumah. “Hehehe, aku gawi buhan ikam kena. Tunggu pembalasan
aku laaaah,” garunum sidin sambil menuju kedalam rumah. “Hau kemana
sidin tu wal,” takon Ongol. “Behinip ja. Imbah sidin masuk kedalam rumah
hanyar kita bukahan,” ujar Anang Gabau. “Oke sieeep,” sahut Ongol.
Kada bongol-bongol Haji Untat ah, sidin ne pura-pura ja bejalan
kedalam rumah padahal sidin bediri atas papan. “Sudah kada telihat sidin
wal ai. Mungkin sudah masuk kedalam rumaham kalo,” ujar Ongol. “Harau
bujur Ngol ai, buktinya kada telihat lagi am batis sidin, hehehe. Ayo
kita keluar dari bawah kolongan rumah neh,” ujar Anang Gabau.
Merasa aman, lalu bedua ne keluar tumatan bawah kolongan rumah. Baya
mencongol kepala langsung am dikarung Haji Untat tumatan atas. “Ampun
Jiiiii, ulun kada mencuntan paaan,” kuriak Ongol. “Hua hahahaha,
ketangkap buhan ikam sekarang,” ujar Haji Untat pina semangat banaran.
Apada, kada bekutik ai bedua ne pas ditangkap sidin tadi. “Makanya,
jangan ketuju mencuntan pun urang. Untung pang tecuntan pun aku. Coba
kalo tecuntan pun urang lain bisa dipermak tu pang buhan ikam,” ujar
Haji Untat menasehati buhannya. “Inggih Ji, maaflah,” ujar Ongol pina
supan muha. “Ne Cuma pesan moral ja. Jangan ketuju mencuhut pun urang
lain kalo itu memang lain hak kita. Paham kada buhan ikam,” ujar sidin
menasehati pulang.
Akhirnya, bedua ne bulik membawa supan karena ketahuan mencuntan
rambutan pun Haji Untat. “Ingat tu Ngol. Jangan ketuju mencuntanlah.
Pesan sidin tu Ngol ai,” ujar Anang Gabau. “Cehai, musti muha. Sama ja
tu ah kelakuan,” sahut Ongol sambil garu-garu kepala. (fin)
Langganan:
Posting Komentar (Atom)
0 komentar:
Posting Komentar