Sudah semingguan ne Ongol meubah gawian, dulunya jadi anak buahnya
Haji Untat wayah ne bajualan pentol karena menurut si Ongol begawi
nangkaya ini ne kada disuruh-suruh urang karena gawian sorang. “Kaya apa
rami juakah bajual pentol di Kampung Liur neh. Bebuhan kampung kita ne
sedikit ja urangnya,” takon Anang Gabau. “Nangkaya itu am wal ai,
daripada begawi umpat urang mendingan beusaha sorang. Kada uyuh kita,
mun umpat urang aur disuruh-suruh,” sahut Ongol sambil bakipas. “Sama ja
Ngol ai. Ikam begawi nangkaya ini gin disuruh urang jua sana sini,”
ujar Anang Gabau. “Hi-ih pang. Tapi am kada dibentak-bentak urang paan.
Ya kalo,” sahut Ongol. “Sip, nang penting halal. Ya kalo,” ujar Anang
Gabau. “Nah bujur tu wal ai,” sahut Ongol.
Di taman Kampung Liur sebenarnya ada kegiatan nang adiadakan Haji
Untat. Tapi Ongol wan Anang Gabau kada mendangar paan ada kegiatan lomba
bebanyakan memakan pentol. “Hau, kada ketamanlah bebuhan ikam,” takon
Dangdut nang kebelujuran lewat dijembatan pas bedapat bebuhan Ongol
tadi. “Ada acara apa disana Dut,” ujar Anang Gabau. “Lomba bebanyakan
makan pentol wal ai,” sahut Dangdut. “Iyakah, pas banar nah parut lapar.
Kesana ai aku nah,” ujar Anang Gabau.
Handap kisah, nang tetinggal hanya Ongol ja dijembatan tu maklum inya
ne bajualan menunggu kalo pina ada nang menukari jualannya. “Ngalu jua
memikirkan nasib neh. Bajualan gin pina ngalih banar di Kampung Liur
neh. Begawi umpat urang uyuh jua. Begawi sorangan uyuh jua. Nangkaya
nginiam nasib aku neh,” ujar Ongol sambil mehisap roko cap pekat pina
merenungi nasibnya wayah neh.
Merasa kedida nang menukari lalu Ongol menyusul ke taman Kampung
Liur. Tumatan jauh sudah telihat pina rami banar bebuhan kampung
meumpati lomba bebanyakan makan pentol. “Kenapa ikam kada umpat Bau,”
takon Dangdut. “Mun aku umpat neh. Kedida nang kawa mengalahkan tu pang.
Hahaha,” sahut Anang Gabau. “Jelas ai awak ikam ganal, parut ganal.
Jadi isinya bisa seribu pentol tu pang. Hua hahaha,” ujar Dangdut.
Apada, mengangkang ai bedua neh sampai bingung Haji Untat melihat
kelakuan bedua ne tadi.
Tumatan jauh Anang Gabau melihat Ongol lagi memasukan sepeda ontelnya
nang membawa bak jualan. Pina telihat ngalih pang inya neh memasukan
bak jualannya, maklum hanyar ja bajualan. “Itu pentol gratis nang hanyar
datang. Itu sudah ditukari Haji Untat,” kuriak Anang Gabau. Apada,
bebuhan kampung menggelorok mendatangi Ongol, sampai-sampai inya neh
bingung memikirkan. “Asiiikk, banyak nang menukarinya,” ujar Ongol
himung banaran.
Hitungan 10 menit ja pentol nang ada di bak jualan si Ongol tadi
habis tetinggal kuahnya ja. Tapi inya neh bingung kenapa kedida
seikung-ikungpun nang membayarnya. “Kenapa bebuhannya bukah am. Kenapa
kada bayar neh,” garunum Ongol. “Ne pentol gratis kalo Mang,” ujar
kekanakan nang tetinggal seikung. “Hah, ne kada gratis paan,” sahut
Ongol pina habang muha. “Ujar Amang nang gapar alias ganap parut tu
gratis tadi. Makanya ulun handak meminta jua nah,” ujar kekanakan ne
tadi pina lugu banaran sambil menunjuk kearah Anang Gabau.
Apada, tujah am Ongol pas melihat Anang Gabau tadi nang ditunjuk
kekanakan bahwa pentol pun inya gratis. “Hahahaha, tenang ja Ngol, kena
diganti Haji Untat,” ujar Anang Gabau sambil mendatangi jualan si Ongol
tadi. Sementara itu si Ongol sudah kada sadar diri lagi am. Maklum,
pentol nang ada didalam bak diatas sepeda ontelnya tu hitungannya
sekitar 500 biji. “Ne pas kelakuan Anang Gabau am menyuruh kekanakan
memakan pentol si Ongol. Pasti am disambatnya tadi gratis,” ujar Haji
Untat. “Ya am, kelakukan ikam neh menyusahkan kekawalan ja,” ujar Haji
Walet menambahi. “Pian tu baduit jua Ji ai. Yaaaaa, sekali-kali lah
memborong jualan pun kawan ulun neh, hehehe,” sahut Anang Gabau.
Akhirnya, pentol nang gratis tadi dibayari Haji Untat. Apada, pas bangun
dari siupnya himung ai Ongol. “Alhamdulillah,” ujar Ongol sambil
mengucapkan syukur. (fin)
Langganan:
Posting Komentar (Atom)
0 komentar:
Posting Komentar