kada baroda

Hari semalam Ongol tulak menaksi tumatan subarang wadah peniniannya menuju ke Kampung Liur, pas malam minggu inya tu kada menyubarang lagi am malahan inya bemalam dirumah Anang Gabau. “Bangun, banguuuuun,” kuriak Anang Gabau. Apada, takelipik ai Ongol pas mendangar ada suara nang membangunkan inya rahatan guring nyaman. “Astagaaaa, kesiangan am aku nah,” ujar Ongol sambil menggosok-gosokan tangannya kemata. “Nyata ai sudah siang Ngol ai. Jam berapa Gerang neh,” takon Anang Gabau. Langsung Ongol melihat jam dinding. “Bah iya am, sudah jam 9-an lah,” sahut Ongol.
Kada mandi wan kada basikat gigi lagi am inya neh langsung menuju wadah bebuhan penaksian duduk. “Kemana ikam tadi Ngol,” takon Dangdut. “Guring wadah Anang Gabau wal ai. Untung pang inya membangunkan tadi, jaka kada dibangunkan bisa sampai sore tupang guringnya, hehehe,” sahut Ongol. “Begadang kalo ikam tadi ditaman,” takon Dangdut pulang. “Mumpung malam minggu wal ai, begadang tu am, hehehe,” sahut Ongol pina seraba salah dapatnya.
Karena siang tu giliran Ongol nang dapat jatah membawa urang kesubarang, lalu ai inya ne siap-siap wan kelotoknya. “Lumayan banyak rezeki ikam hari ne Ngolah,” ujar Anang Gabau nang hanyar datang tadi. “Kaitu am wal ai, kadang-kadang banyak kadang-kadang kedida, hehehe,” sahut Ongol. “Jangan kada ingatlah pas ikam sudah kesubarang tu bawakan rambutan,” pesan Anang Gabau. “Siap ja wal, imbah meantar urang neh aku bebulik pulang. Tenang ja,” ujar Ongol menjanjikan wan kekawalannya.
Bebuhan kampung subarang ne sudah ada am didalam kelotok pun Ongol, inya ne telihat sibuk banaran karena hape bebunyi wan melepas tali belum lagi membunyikan mesin kelotok. “Pina sibuk banar ikam neh Ngol hari ini,” takon Amang Bular. “Ya am Mang ai,” sahut Ongol. “Lakasi am ah, sudah lawas neh mehadangi. Bebila pulang tulaknya,” gasak Amang Bular. “Siap mang,” sahut Ongol sambil melepas tali kelotoknya.
Lalu inya ne mehidupkan mesin kelotoknya, starter pertama kada mau hidup, kedua, ketiga sampai sepuluh kali tetap ai mesin kelotok kada mau hidup. “Nah iya am, minyak kalolah,” ujar Ongol sambil membuka tutup minyak. “Banyak ja tu Ngol ai. Jangan-jangan mesin kelotok ikam ne kada pernah diservis makanya mogok,” ujar Amang Bular pina penyambatan banaran. “Rancak ja diservis Mang ai,” sahut Ongol pina masam muha.
Sudah diperiksa mengenai mesin kelotok ternyata tidak ada kendala, lalu ai Ongol melihat mesin rodanya nang dibawah banyu. Baya melihat harau tekajut inya neh. “Astagaaaa, rodanya tenggelam Mang ai, semalam kada ingat ulun memasaknya wan baut,” ujar Ongol. Mendangar pander Ongol ne tadi harau menggarunum bebuhan Amang Bular nang sudah terlanjut masuk kedalam kelotok si Ongol. “Kami kada mau tahu, pokoknya kami harus sampai ke subarang,” ujar Amang Bular pina wan celeng-celengnya tu am.
Melihat sidin pina menceleng sampai matanya handak keluar apada Ongol lintuk dagu. “Inggih mang, kita bekayuh ja lah kesubarang, hehehe,” ujar Ongol sambil mengayuh kelotok menuju ke subarang. “Hua hahahaha, makanya kelotok tu harus diperhatikan. Jangan Cuma nyamannya ja. Periksa olinya, businya, minyaknya wan rodanya. Kalo semua sudah beres hanyar diturunkan menaksi. Paham kada ikam Ngol,” ujar Amang Bular membari nasehat.
Karena kedida roda mesinya terpaksa mengayuh pakai pengayuh, bianya hitungan 10 menit sampai ke subarang ne handak 1 jam hanyar sampai karena dimaklumi ja pakai pengayuh. Itupun pengayuhnya nang halus tu pulang. Apada, tepaluh atas bawah Ongol dapatnya. “Bujur jar sidin jua, lain kali harus diperiksa sebelum menaksi,” garunum Ongol. (fin)

Sumber Berita: http://www.radarsampit.net/berita-kada-baroda.html#ixzz3JbqKKesa