HARI semalam Ongol bejanjian bedapat wan bebinian di taman Kampung
Liur. Janjiannya ne pas banar waktu yakni malam minggu apada, himung ai
Ongol dapatnya. “Handak kemana Ngol,” takon Anang Gabau pas bedapat wan
bebuhannya nang lagi bedudukan dijembatan. “Biasa wal ai, handak bedapat
cewe ditaman, hua hahahaha,” sahut Dangdut. “Iyalah Ngol, asik ai lah.,
kada bebawaanlah, hehehe,” ujar Anang Gabau. “Umpat kada papa ja wal
ai, tapi jangan mengganggulah,” sahut Ongol.
Lalu bebuhannya tulakan ke taman Kampung Liur naik sepeda ontel
masing-masing. Baya sampai disana bingung jua Ongol ne melihat karena
ditaman banyak banar bebinian nang bujang. “Mana cewe ikam Ngol,” takon
Anang Gabau pina penasaran banaran. “Ya am, bedapat di fesbok ja wal ai.
Lalu bejanjian bedapat ditaman. Aku gin kada kenal jua nangkaya muha
aslinya. Mun di fesbok bengkeng pang,” ujar Ongol menjelaskan panjang
lebar saking lebarnya bibir ja monyong.
Handap kisah, karena kedida bisi nomor hapenya lalu ai betiga ne
bakeliling mencari sicewe tadi. “Rahatan bejanjian tadi ikam takonilah
inya pakai baju apa,” ujar Dangdut. “Amun kada salah inya tadi bepadah
bebaju putih. Masalahnya waktu di fesbok tu kada ingat aku meminta nomor
hapenya eh,” sahut Ongol. “Kalo kaya itu kita bakeliling ai,” ujar
Anang Gabau.
Tunggal ikungan betiga ne belilihat sana sini mencari nang ngarannya
cewe bebaju putih. Ada pang nang bebaju putih tapi sudah belaki. “Nang
itu lainlah Ngol,” takon Anang Gabau. “Lainan wal ai. Itu acil-acil,
hehehe,” sahut Ongol. Apada, mengangkang ai Anang Gabau. “Wakakakakak,
kalo ai memang acil-acil karena foto biasanya di fesbok tu bisa
mengaramput. Bepadah bujang sekalinya janda Kampung Liur. Hahahaha,”
ujar Anang Gabau behimat banaran ketawanya.
Memang nasib mujur pang Ongol neh, rahatan handak menuju ketugu inya
bedapat wan binian nang inya cari. “Nah inya neh urangnya wal ai,” ujar
Ongol pina kehimungan banaran. “Harau bengkeng jua lah. Aku kira tadi
pas-pasan ja, hehehe,” ujar Dangdut. “Ya am, sekalinya bengkeng urangnya
wal ai,” ujar Anang Gabau nganga-nganga wan muntung.
Saking himungnya Ongol ne langsung ja betakon. “Hei cewe. Ngaran aku
Ongol. Ikam kalo nang ada di fesbok tu,” takon Ongol pina mantab
banaran. “Inggih Bang, ngaran ulun Siti Asoy,” sahut binian ne tadi.
“Nyaman didangar ngaran ikam neh, Siti Asoy, hehehe,” ujar Ongol sambil
takurihing sorangan. “Emangnya ngaran ulun ne lagu nyaman didangar,”
sahut Siti Asoy.
Apada, tekajut Ongol pas mendangar sahutan Siti Asoy. “Galak jua
binian seikung neh,” garunum Ongol. “Handak kemana am kita ne bang,”
takon Siti Asoy. “Kita dudukan ditugu itu ja gin. Sambil bakisahan,”
sahut Ongol sambil membawai dudukan ditugu.
Lumayan lawas pang bedua ne bakisahan sampai bemamai Anang Gabau wan
Dangdut. “Kita ne dijadikan ubat nyamuk ja neh. Kaya apa kita unjuki
kembang ke Ongol. Kena Ongol meunjuki kebiniannya,” ujar Dangdut. “Pas
banar wal ai, supaya telihat romantis alias roko makan gratis, hehehe,”
sahut Anang Gabau menuju ke tanaman nang ada dihiga Ongol.
Lalu diputiknya ai bunga terompet. “Supaya romantis Ngol ai. Unjuk
bunga terompet ne gasan biniannya,” ujar Anang Gabau. “Sip wal,” sahut
Ongol sambil meunjuk bunga nang diunjuk Anang Gabau tadi. Karena
mendapat bunga lalu ai Siti Asoy menciumi bunga terompet tadi.
Kada berapa detik harau takuriak Siti Asoy. “Bunga terompet
beduriiii, ada durinya,” ujar Siti Asoy sambil melepakan tangannya ke
pipi Ongol. “Hua hahahaha, kenapa dilempang biniannya Ngol,” takon Anang
Gabau. “Kada tahu jua wal ai,” sahut Ongol. Lalu Anang Gabau memeriksa
bunga terompet tadi. “Hahahaha, ada samut kahanya wal ai. Pantas ai
biniannya takuriak sekalinya diigut kaha dihidung,” ujar Anang Gabau.
Apada, heboh ai ditugu taman Kampung Liur, karena selain dapat
lepakan binian tadi dipipi. Binian itupun bukah meninggalkan si Ongol.
“Ya am, menyesal jua aku membawai kekawalan neh. Sudah kada jadi dapat
pacar malahan dapat lempang biniannya karena meunjuk hidungnya diigut
kaha,” ujar Ongol sambil menapak wan dahinya sorang. (fin)
Langganan:
Posting Komentar (Atom)
0 komentar:
Posting Komentar