nada dering sayang-sayang

Imbah bulik memantat di kebun gatah di subarang bebuhan Ongol ne langsung bedudukan di jembatan sambil menikmati roko cap pekat. Kada berapa lawas lewat ai Haji Untat dengan sepeda ontelnya. “Kerumahlah imbah buhan ikam barokoan,” ujar sidin menyuruh bebuhan Ongol neh. “Asiik, makan kunjui basumap pulang kita Ngolai. Hahaha,” sahut Anang Gabau mengangkang sorangan. “Inggih Ji,” ujar Ongol. Lalu sidin bulik bedahulu mengujak sepeda ontel keluaran tahun 45 ne.
Handap kisah, sesampai dirumah Haji Untat ne bebuhan Ongol langsung ja beduduk dipelataran rumah sidin. “Kita duduk dipelataran rumah ne ja lah. Mun duduk didalam tu sabak kena wan asap roko cap pekat ja. Ya kalo Ngol,” ujar Haji Untat sambil mengeluarkan hape didalam kantong selawarnya. “Inggih Ji,” sahut Ongol. “Behape hanyar sidin coy ai,” bisik Anang Gabau. “Behinip ja coy ai. Mun kedangaran sidin bisa kada keluar kunjui basumap,” ujar Dangdut. “Okey sip coy,” sahut Anang Gabau.
Kada berapa menit tedangar bunyi dihape pun Haji Untat neh. Lalu ai sidin meangkat wan hape tadi. “Iya, hadang dulu lah. Aku lagi ada tamu dirumah neh. Tunggu ja dibatang banyu sana kena ada ja aku kesana. Okey,” ujar sidin bepander lewat hape ne tadi. Bingung bebuhan Ongol melihat kelakukan sesepuh Kampung Liur neh. “Pander wan siapa pian tadi Ji,” takon Ongol. “Tadi bepander wan tukang kelotok Ngol ai. Makanya aku suruh tunggu dibatang banyu,” ujar Haji Untat. “Ooooh,” ujar Ongol pina birai muha.
 Rupanya bebuhannya betiga handak membalas wan Haji Untat nang menyuruh kerumah tadi sekalinya baya menampaikan hape hanyar sidin. “Aku handak meambilkan kunjui basumaplah. Buhan ikam santai ja dulu,” ujar Haji Untat sambil meninggalkan hapenya dilantai pas dihiga duduk Anang Gabau. Menhancap Anang Gabau meubah nada dering dihape sidin. “Lajui, kena ketahuan sidin coy ai,” bisik Ongol. “Sudah tuntungam neh,” sahut Anang Gabau.
Kada berapa menit datang pulang Haji Untat wan bini sidin sambil membawakan kunjui basumap sekeranjang. “Kunjuinya masih panas-panas neh. Tapi kada papa ja mun hakon memakan rahatan panas-panas neh,” ujar sidin. Rupanya bini Haji Untat ne beduduk dihiga sidin. Kada berapa lawas tedangar bunyi dihape. “Hai sayang, diangkat dong. Jangan lawas-lawas kada tahan neh” bunyi nada dering dihape Haji Untat.
Mendangar nada dering besayang-sayangan, langsung am kunjui basumap tadi tu malepak diatas kupiah Haji Untat. “Ooohhh… menukar hape hanyar ne rupanya gasan besayang-sayanglah. Dasar keladi tuha,” ujar bini sidin. Harau kada kawa baungap muntung Haji Untat disumpahi bini. “Anuah, itu nada dering ja. Lainan binian bujuran,” ujar Haji Untat membela diri. “Kalau lainan binian bujuran. Trus bini jadi-jadianlah. Huaaaaaa,” gasak bini sidin.
Harau kacau akhirnya gara-gara kelakuan bebuhan Ongol membalas dendam wan sesepuh Kampung Liur. “Ne pasti gara-gara bebuhan ikam nang mengganti nada dering dihape aku,” ujar sidin sambil menunjuk kearah Ongol. “Mungkin pian ai tadi pas menelpon hapenya kada bebunyi. Tapi sekarang kan sudah bebunyi sekalinya nada dering besayang-sayangan. Ya kalo coy,” sahut Ongol. “Inggih Ji ai, mungkin pian jua kalo nang salah kada ingat mematikan nada dering tadi, hehehe,” ujar Anang Gabau menambahi. “Hi-ih lah, bujur jua, hehehe,” sahut Haji Untat supan sorangan. Padahal, memang disinghaja bebuhan Ongol supaya menyupani sidin. (*/fin)

Sumber Berita: http://www.radarsampit.net/berita-nada-dering-sayangsayangan.html#ixzz3JzCru3I5