behinip dibawah pohon

Sore tu Kampung Liur telihat pina hirang alias mendung, sementara Ongol ne masih ja memantat wan Anang Gabau di kebun Haji Untat. Handak bulik kerumah gawian beluman tuntung ya terpaksa ai bedua ne meneruskan gawiannya. “Handak hujan Ngol ai,” ujar Anang Gabau. “Ya am, handak bulik gawian beluman tuntung nah,” sahut Ongol. “Ya kalo kaya itu tuntungai gawian kita neh imbah tu hanyar bulikan,” ujar Anang Gabau.
Handap kisah, sekitar 30 menit buhannya menuntungkan gawian tumatan atas langit tedangar suara kilatan. Glederrrr. Crit gledeerrrr. “Waduuuuhh, gusang kita coy ai. Lajui bukaaah,” kuriak Anang Gabau. Harau takelipik Ongol mendangar kuriakan Anang Gabau tadi. “Akuiiii, nyaring pada peter lagi suara ikam ne coy ai. Hi-ih ai kalo kaya itu,” sahut Ongol.
Lalu bedua ne behandap bukahan menuju pohon jambu nang ada dipinggir parit kada jauh wadah buhannya begawi tadi. “Aku kada jadi kesana Ngol ai. Aku kepondok jaaaaa,” ujar Anang Gabau. “Waduuuuh, aku ai menyorangan dibawah pohon ne lah,” garunum Ongol pina sangkal banaran. “Ayujaaa, kada papa ja sorangan yang penting hepi. Okeeee,” sahut Anang Gabau lalu bukah kada tetahu muha lagi am.
Anang Gabau ne telihat lapang am behinak karena kada kehujanan wan kada kena kilatan nang menyambar-nyambar diatas langit. “Mun kaya itu aku kesana jua neh,” ujar Ongol meancang-ancang handak mendatangi Anang Gabau nang sudah duluan ada didalam pondok.
Baya handak bukah tedangar suara halilintar nyaring banaran. Glegaaaarrr. Kada berapa menit guguran buah jambu tumatan atas pas mengguguri kepalanya. “Ampuuuuunnnn, lainan ulun paaan,” kuriak Ongol sambil bukah kada meingat diri lagi am menuju pondok.
Sampai dipondok telihat pucat muha Ongol. “Kenapa pucat muha ikam ne Ngol,” takon Anang Gabau. “Disambar petir wal ai. Untung aku kawa bukah,” sahut Ongol pina musti banaran. Lalu Anang Gabau ne mengangkang behimat. “Wakakakak, ikam tu mun disambar petir tujaham Ngol ai. Ikam ne diguguri buah jampu. Tu be masih ada biji halus dirambut,” ujar Anang Gabau.
Apada, masam ai muha Ongol disambati Anang Gabau. “Ya lah, aku kira tadi disambar petir coy ai,” sahut Ongol. Glegeerrr. Glegeeer, glegeerrr. Suara petir menyambar diatas atap pondok buhannya. Apada, langsung beragapan bedua. “Hahaha, takutan jua ikam coy lah. Buktinya beragapan kita nah,” ujar Ongol. “Busyet,” sahut Anang Gabau.
Handak satu jam hujan membasahi Kampung Liur, rupanya hujan wan petir-petirnya tu tuntung parak isya. Lalu bedua ne bulik ke Kampung Liur membawa kisah pengalaman begawi wan kekawalan lainnya. (*/fin)

Sumber Berita: http://www.radarsampit.net/berita-behinip-di-bawah-pohon.html#ixzz3JzFbPpjI