umpan buaya

HARI semalam bebuhan Kampung Liur meadakan acara simah buaya supaya buaya nang ada disungai Kampung Liur tu kada mengganggu karena saking laparnya banyak jamban nang rusak karena handak menerkam urang didalamnya. "Pian Ji lah nanf jadi pawangnya," ujar Haji Lului. "Bah, ikam ja nang cocok jadi pawangnya Ji ai," sahut sidin. "Kada Ji ai, nang cocok tu pian tu am karena pian tu sesepuh Kampung buaya. ets, maksud ulun tu sesepuh Kampung Liur, hehehe," ujar Haji Lului mengayai sidin. Apada, habang muha Haji Untat pas disambati tadi.
Handap kisah, segala urusan gasan mengadakan acara simah buaya tu sudah disiapkan bebuhan kampung termasuk 7 wadai belainan jenisnya. "Semua sudah Ji ai, tergantung pian ja ne," ujar Haji Lului. "Aku siap tumatan semalam am. Ayo kita mulai," sahut Haji Untat.
Pina telihat komat kamit muntung sidin membacakan doa, kada tahu doa nang manakah nang dibacakan sidin sampai bingung Ongol memikirkannya. "Pina komat kamit munrung sidin. Apa juakah nang dibaca sidin tu lah," takon Ongol pina bingung sorangan. "Amun kada paham tu beranai ja Ngol ai. Itu sidin lagi membacakan doa mengiyau buaya. Biasanya sidin tu komat kamit lagi bepander wan buaya," ujar Anang Gabau menjelaskan panjang lebar. "Iyalah wal," sahut Ongol.
Saking penasarannya lalu Ongol neh mendatangi sidin dan duduk dihiga sidin. "Timbai nang ada dihiga aku neh," ujar sidin. Mendangar pander sidon tadi harau pucat muha Ongol. "Hau, kenapa ulun Ji nang cagaran ditimbai jadi umpan buaya," ujar Ongol membela diri.
Apada, mengangkangan bebuhan Kampung Liur pas melihat muha Ongol pucat. "Lainan ikam paan Ngol ai nang ditimbai kebanyu tu. Tapi, sesajen nang ada diga ikam tu nah," ujar Anang Gabau. Akhirnya kawa jua Ongol bernapas panjang karena nang dimaksud Haji Untat tadi lainan inya paan nang ditimbai. "Syukuram," ujar Ongol sambil mengelus dada.
Memang kesalahan Ongol jua pang sidin rahatan bebacan inya asa dihiga pina telihat musti banaran. "Lain kali Ngol ai, jangan pina musti paan. Untung pang sidin tadi langsung meingkut ikam. Seandainya langsung diingkut sidin bisa bujuran jadi umpan buaya ikam. Hahaha," ujar Anang Gabau menyambati Ongol. "Maaf wal, kada tahu aku eh tadi," ujar Ongol sambil tetunduk dagu. (*/fin)

Sumber Berita: http://www.radarsampit.net/berita-umpan-buaya.html#ixzz3Jbph7i4c