main diwarnet

Imbah sembahyang magrib bebuhan Ongol ne bacungkungan di jembatan sambil barokoan cap pekat. Kedida lagi am nang digawi bebuhan warga Kampung Liur selain bedudukan santai karena siangnya sudah begawi behimat, ada nang memantat ada jua nang memagat pekat. “Kemana kita ne lah. Hinip malam Jumat neh,” takon Ongol. “Lebih baik kita main internet di warnet pun Haji Untat ja kah,” sahut Anang Gabau. “Wuih, sip coy. Kita kesana yooo,” ujar Dangdut membawai bebuhannya.
Handap kisah, bebuhannya ne memilih wadah gasan bainternetan paling bunju sana supaya kada ketahuan wan kekawalan nang lainnya. “Dibunju sana ja Coy. Kawa jua kita melihat nang ehem, ehem toeh. Hehehe,” ujar Ongol. “Waduuuh lah, pikiran galau jua Ongol neh. Kita disuruhnya melihat urang nang batilanjang tu am. Dasar jua otak ikam Ngol, Ngol. Besamut kalo,” sahut Anang Gabau pina sarek banaran. Apada, hinip ai Ongol imbah disareki kekawalannya tadi.
Buhannya ne menyewa main di warnet ne Cuma setengah jam maklum duit bebuhan belum tanggal anum ne lagi pas-pasan. “Apa nang kita lihat ne lah. Aku kada paham nah,” ujar Ongol. “Ketik ja Ngol pemandangan. Kita handak melihat pemandangan alam Kampung Liur,” sahut Anang Gabau. “Astah, mana ada ah Kampung Liur ne masuk internet. Ne kampong coy ai. Hahahaha,” ujar Dangdut. “Siapa tahu ah,” sahut Anang Gabau pina supan muha.
Rahatan handak membuka situs pemandangan, blup, lampu pajah mendadak. Harau kipuh bebuhannya. “Busyeeet, lagi asik-asiknya pajah pulang lampu kita neh. “Oooiii, kemana buhan ikam coy. Aku kada melihat nah,” kuriak Ongol. Sekalinya Anang Gabau wan Dangdut ne behancap bukah bagemet pas pajah lampu tadi. Lalu tetinggal Ongol ja sorangan.
Hinip Ongol neh sorangan didalam ruangan warnet. Kada berapa menit ada suara batis urang nang bejalan. “Bore ikam neh. Kawan ditinggal sorangan. Takutan coy ai. Handak aku ludahi ja ah. Maok banaran ikam neh,” ujar Ongol pina bemamai-mamai sorangan. Rupanya inya ne kada tahu paan siapa nang dipanderinya tadi. Tapi, nang dipanderinya tadi ne gin hinip jua alias sama-sama kada melihat.
Kada berapa menyala am lampu di warnet Haji Untat neh. Pas menyala, harau tekajut Ongol ne pas melihat siapa nang ada dihadapannya wan aur disumpahinya behimat. “Astagaaaaa, piankah Ji,” ujar Ongol pina pucat muha. “Ayoam ludahi, jar ikam tadi handak meludahi muha aku neh. Bebila am,” sahut Haji Untat pina habang muha.
Harau seraba salah akhirnya Ongol neh pas melihat nang dihadapannya tu sesepuh Kampung Liur mana disumpahi behimat banaran. “Lun kira tadi Ji ai buhan Anang Gabau wan Dangdut. Eh, sekalinya pian lah. Hehehe,” ujar Ongol pina supan muha. “Maok ikam neh. Makanya jangan sembarang bemamai-mamailah. Lihati dulu sebelum menyumpahi urang. Aku gin kada melihat jua tadi, kacamata aku tetinggal didalam wadah bebuhan ikam main internet neh,” sahut Haji Untat. “Astagaaaa, jaka tahu tadi langsung bukah ja ulun. Pian kada melihat jua alias rabun. Hahahaha,” ujar Ongol behancap bukah tumatan dalam warnet bukah kada meingat diri takutan kalo pina ditampar sidin gara-gara mehulut-hulut sesepuh Kampung Liur. (fin)

Sumber Berita: http://www.radarsampit.net/berita-main-di-warnet.html#ixzz3JzHUl8r9