tetaksir bini dukun

Liburan sekulah Ongol ni  liburan ka Kampung Liur. Lalu ae tadapat lawan Anang Gabau. “Hau Ngol, maapa di sini, ikam,” ujar Anang Gabau.
“Kada ae nang, handak baliburan aku nah, lawas kada melihat urang kampung, uyuh jua di Kota. Tuhuk sudah, apalagi di Jakarta ,” ujar Ongol.
Batakon ae kesahnya Anang dengan Ongol. “Ngol, banyak bengkeng kalo binian di Jakarta tu amun malihat di Tivi tu nah,”  ujar Anang.
“Wakuiii naang, kada mudah. Banyak binian di Jakarta, tapi kada menyamai anak  Acil Jablay pang nang,” ujar Ongol pina masang muha supan.
Lalau ae  handap kesahnya Ongol ni pina baniatan handak mamacari anak Acil Jablay. “Nang, kawani akau malam minggu ke warung Acil Jablay lah, biasanya ada anaknya di situ,” ujar Ongol mambawai.
“Oke Ngol, siaap aja aku mangawani ikam, asal cocok ongkosnya ja. Hehehehehe…” ujar Anang.
Tulak ae kesahnya buhanya malam minggu. Ongol pina bagaya babaju  atasnya warna habang muda, selawarnya warna kuning lawan sepatu dragon, tambah pulang gayanya  mambawa motor merek Taro yang kenalpot alahan pada masin buhan pandulangan amas,  sekira hirang muha yang di balakang gawi asapnya.
Sampai warung tu, bedua ni pina hebat merayu anak Acil Jablay. Sampai talarut malam, sekalinya Ongol ni ditolak binian kesahnya. Bulik ae lawan perasaan asa di kerokot bidawang hati.
Baisukan lagi, sangkal karena cintanya di tolak ulih sa’urang bibinian anak Acil Jablay, balalu tulak ka dukun utuh lengkor ae Ongol neh.
“Permisi mbah, kawa kah pian mambantu ulun?” ujar  Ongol.
“Kawa, mambantu apa?”  ujar Utuh menyahuti.
“Anu mbahai, cinta ulun ditolak bibian. Jadi ulun minta bantuan wan pian supaya bibinian tu jatuh cinta wan ulun,” ujar Ongol pina mambari maras muha.
“Ooo.. Bisa.. Bisa.. Tapi ada ininy (sambil mangipik talunjuk lawan ibu jari). Amun  masalah itu ada, masalah ikam yakin beres,” ujar Utuh Lengkor
“Tenang haja mbahai.. Barapa kah ulun tabusi ja. Ulun sudah siapkan kabun kunjui dua hektar pakai mamabayari pian ni,” ucap ongol pina Baagak.
“Anu Ngol ..Fotonya ada lah, yang pina tabagus jua lah,” ujar Dukun Utuh.
“Ini fotonya nah, yang babaju  habang dengan gincu pina kaya Lombok masak ni,” ujar Ongol sambil mambuka Hp.
Imbah malihat foto nang di tampay akan, mata dukun Utuh Lengkor  langsung manciling sampai sama kaya mata kodok. “Ikam bulih haja maminta aku manggawi supaya bibinian jatuh cinta wan ikam, tapi jangan binian nang ada di foto ne,” ujar Dukun Lengkor sambil basarek.
“Ae, kanapa mbah? Ulun sayang banar wan inya, tapi inya kada  handak ” ujar Ongol mangarasi.
“Ngine biniku Ngol ae. Biniku, tahulah biniku. Apa kahandak ikam? Bisa bulik ngaran ikam ni, kada tahu bini urang segala macam. Ini anak Acil Jabalay Mintuha ku. Hanyar seminggu kami bakawinan,” ujar Utuh Lengkor makin nyaring suaranya neh.
Lalu malihat pina kaya itu, mengacincing bukah Ongol sampai tatinggal motornya

Sumber Berita: http://www.radarsampit.net/berita-tetaksir--bini-dukun-.html#ixzz3IZtF2eLe