Hari semalam bebuhan Ongol bulikan tumatan gawian memantat, wayah ne
tenyaman pang mun handak begawi kawa ja sampai kekebun pakai motor
karena sudah ada jalan tembusan nang diulahkan Haji Untat. Tapi am
jalannya nangkaya dipehumaan licak banaran. “Kena malam kita bejalanlah
Ngol, aku umpat ikam ja karena motor ne handak dipakai abahku Ngolai,”
kuriak Anang Gabau. “Ayujaaaa,” sahut Ongol umpat jua bakuriak.
Tuntung begawi wan sudah mandi sore, lalu Ongol ne bejalanan sorangan
sambil menunggu kadap sampai kada ingat lagi am wan sembahyang magribnya
aur bejalanan tuam eh. “Tunggu di wadah Amang Bular ja, motor aku andak
di parak pondok ja supaya sidin kada tahu aku datang bawa motor,” ujar
Ongol. “Kada mungkin hilang jua ah banyak ja nang melihat disini eh,”
ujar Ongol pina mantab banaran.
Handap kisah, sekitar 1 jam Ongol ne
bekisahan wan Amang Bular dipelataran rumah sidin sambil barokoan cap
pekat apabila dihadapan Ongol ada kopi tumbuk nang diulahkan sidin.
“Datang mana ikam Ngol, imbah magrib ne sudah baelangam biasanya jam 8
kena am,” takon Amang Bular. “Kelebujuran ja Mang lewat dirumah pian neh
langsung ai singgah, hehehe. Lawas jua kada bedapat wan pian asa
dandaman jua,” ujar Ongol pina meranyau wan pander.
Kada berapa
menit ada urang lewat pakai motor dihadapan buhannya. “Umpat lalulah
Maaang,” ujar nang membawa motor neh. “Ayujaaa, handak kemana ikaaam,”
takon Ongol. “Handak bejalanan ja Mang karena tadi ada nang menyasah
makanya ulun lewat sidin nah,?” ujar nang menunggangi motor ne tadi.
“Yakah, ayuai kalo kaya itu eh lewat ja lah,” ujar Ongol.
Sekitar 2
menit datang bebuhan Anang Gabau wan Dangdut pina telihat hengap-hengap
wan pehinakan. “Ikam tadi ada melihat urang pakai motorlah lewat sini
ne tadi,” takon Anang Gabau. “Sabar wal, sabar jaaaa. Duduk dululaah
sambil barokoan imbah tu hanyar bakisahan kita. Oke,” ujar Ongol. “Ya
okelah kalo begitu,” sahut Anang Gabau wan Dangdut.
Tuntung barokoan
wan minum segelas kopi tumbuk lalu Ongol mulai menakoni wan
kekawalannya ne tadi. “Sebenarnya nangkaya apa gerang ai kisahnya
bebuhan ikam ne bisa menyasahi urang bamotor,” takon Ongol pina musti
banaran. “Kami tadi, melihat urang lagi mengocek stang motor nang ada
diparak pondok pehumaan. Kada berapa menit motor tu langsung ja dibawa
bukah. Berarti tu maling motor kada tahu jua motor siapakah nang
dicuntannya toeh, makanya kami sasah,” ujar Anang Gabau mengisahkan
panjang lebar.
Kada berapa detik tenganga muntung mendangar kisah
Anang Gabau tadi. “Kenapa Ngol tenganga, ada nang salahkah nang ikam
makan tadi,” takon Anang Gabau. “Motor nang ada dibawa maling tadi tu
motor aku walai, aku tadi meandak motor diparak pondok pehumaan tu am,
bruk,” ujar Ongol imbah tu langsung tujah am. Apada, tekajut ai
bebuhannya. Tapi am, Ongol ne sudah tujam karena memikirkan motor tu
pinjam jua tapi bebarangan meandaknya akhirnya dicuntan maling. (*/fin)
Langganan:
Posting Komentar (Atom)
0 komentar:
Posting Komentar