HARI semalam, Ongol wan Dangdut duduk di jembatan sambil baroko cap
pekat. Sambil menunggu magrib, bedua ne telihat pina santai banaran.
Rupanya, imbah begawi bulik sore tu beluman mandi. Tumatan jauh telihat
ada Anang Gabau naik sepeda motor handak lewat jembatan. “Itu ada Gabau
handak kemari. Umpat inyakah bulik,” takon Ongol. “Atur ja, mun inya
hakon jua ah membawai karena kita ne bedua eh. Bekajal tu pang,” sahut
Dangdut.
Kada berapa menit datang am Anang Gabau, sekalinya dibelakang jok
motornya lagi membawa minyak solar gasan mehidupkan genset dirumah. “Pas
banar nah. Umpatlah bulik,” ujar Ongol. “Nangkaya kawa membawai buhan
ikam. Sasak nah,” sahut Anang Gabau. “Kawa ja wal, aku duduk dihadapan
parak stang motor. Dangdut dibelakang ikam, bantu pang kawan neh sanja
am mun bulik bejalan batis,” ujar Ongol pina membari maras banaran. “Ya
udah ai kalo begitu,” ujar Anang Gabau.
Handap kisah, sesuai wan rencana semula Ongol duduk dihadapan Anang
Gabau parak stang motor sementara Dangdut dibelakang Gabau bekajal wan
teng beisi minyak solar. “Kada papa lah Ngol,” takon Anang Gabau. “Kada
papa wal ai, batis ku pakai sandal jua, hehehe,” sahut Ongol pina
takurihing soranga. “Bebaik hangit, mesinnya panas Ngol ai. Olinya sudah
parak setahun neh kada diganti,” ujar Anang Gabau menjelaskan. “Tenang
ja. Semua bisa diatasi, hehehe,” ujar Ongol pina musti muha.
Perjalanan bebuhannya ne lumayan jauh, maklum nang membuat terasa
lawas jalannya nang beluwang-luwang sampai handak tejungkang bebuhannya.
“Kada papa lah Ngol,” takon Anang Gabau pulang. “Kada papa wal ai, kada
hangit pang sandal pun aku neh,” sahut Ongol. “Mun merasa panas jangan
takuriak lah,” ujar Dangdut menambahi. “Harit sorang, tiwas inya
ditakoni kada tetahu jua,” ujar Anang Gabau.
Apada nang dikhawatirkan bebuhannya kada kenyataan.
“Puaanaaaaaaaassss,” kuriak Ongol pina habang muha. Apada, behancap ai
Gabau merem sepeda motornya. “Hahahahaha, sandal japit pun Ongol
gusang,” ujar Dangdut ketawa melihat sandal beasap. “Wakakakakak,
makanya jar aku tadi. Mesinnya sepeda motor pun aku neh lakas banar
mesinnya panas maklum sudah lawas olinya kada diganti. Masih kada
percaya ja ikam,” ujar Anang Gabau.
Sekalinya, sandal pun Ongol ne lunyut takena panas. Pas dilihat-lihat
sekalinya sandalnya plastik karena sandal nang dipakai Ongol ne khusus
gasan dirumah kada khusus gasan dibawa keluar. “Mohon maaf lahir dan
batin ai Ngol ai. Hari sudah sanja paksa ai ikam sorang bulik bejalan.
Kada mungkin jua ikam hakon umpat lagi karena memang kedida wadah
beduduk,” ujar Anang Gabau. Apada, sudah meharit batis kepanasan,
ditinggal buhannya pulang ditengah padang sapi. “Kemana aku mengadu mun
nangkaya ini am nasib. Batis habang menjajak mesin panas. Ditinggal
buhannya pulang,” garunum Ongol sambil menapak wan dahinya sorang. Lalu
ai bulik bejalanan. (fin)
Langganan:
Posting Komentar (Atom)
0 komentar:
Posting Komentar