hari raya si ongol

MALAM hari raya rami banar di Kampung Liur. Nang ngarannya manusia hibak di jalan-jalan, sampai ke pasar-pasar balimbakan bakajal menyambut hari raya. Masyarakat Kampung Liur tepisah jadi dua, yang behimat belanja ke pasar gasan keperluaan hari raya, wan jua yang bakaliling bajalanan bakendaraan mun istilah anak mudanya tu konvoi. Mun yang ngarannya di jalan ne tadi macam-macam tu pang kelakuan manusianya. Ada yang ngebut-ngebutan pakai knalpot blong sing nyaringan tu, belelatupan, sampai yang bakajal umpat pikap bakaliling kampung. Tapi kaya apa pun jua kelakuan buhannya, telapas dari itu, ngarannya sudah tradisi tetap ae digawi buhannya. Termasuk jua pemuda budiman Kampung Liur, siapa pemuda budiman Kampung Liur? Siapa lagi am selain Ongol yang terkenal lawan kelakuan lucu wan dungil-dungilnya. Malam tu Ongol semangat banar, himung becampur sedih rasanya hati Ongol mendangar suara takbiran di mana-mana, tapi himung jua bisuknya bahari raya, apa sudah menukar baju hanyar. Imbah membayarkan fitrah wadah Haji Untat, Ongol bahancap mencari tumpangan gasan bakaliling kampung. Di kejauhan Ongol melihat orang rami naikan ke pikap betutup, bahancap ae Ongol naik kada baizin-izin lagi am. "Ui tunggu..," ujar Ongol bakuciak sambil malingkangkan batis ke atas pikap. Pas naik, "astaga.. kan een ikau mandai si titun Ngol," ujar mang Udin, maksudnya tu meapa kam naik ke sini ngol. Maklum ja yang ngarannya mang Udin ne memang totok lawan bahasa Sampitnya yang kada bisa lapas. "Waduh, tesalah masuk ulun mang, ulun ne handak umpat konvoi takbiran," sahut Ongol supan. "Haaa...dasar kia ikau tun ngol, ikei tun handak meagah behas fitrah hayun uluh tun (dasar jua kam ne, kami ne handak meantar baras fitrah orang)," ujar mang Udin. Apa da Ongol handak tetangis, pikap maka sudah jalan, gandah-gandah Ongol lawan pikap. "Pir turun kan ulun pir," ujar Ongol sambil mengandah mobil minta turunkan lawan supir. Untungnya supir ne tadi mendangar geraungan Ongol, pas kebelujuran belum tapi jauh jua bejalan. Turun ae ngol ne tadih, sambil gerunum-gerunum sorangan kada jelas. Pas turun kada lawas dari arah belakang ada am pikap lain, babunyi gerunta-geruntung lawan speker-spekernya betakbiran. Di atas pikap ada am Anang Gabau, Utuh Lengkor, lawan kekawalan lainnya. "Hayo Ngol naik, umpat kami," kuciak Anang. Melihat tu sumringah Ongol himung inya, naik ae langsung, bebaya naik langsung disuruh orang mencatok dauh (beduk) di atas pikap ne tadi sambil bejalan. Semangat banar Ongol mencatok dauh, maklum bahari waktu SMA Ongol ne pernah jadi penabuh drum di band sekolahnya, ngaran bandnya tu Kelamband. Handap kisah, kada alang-alang orangnya bekeliling kampung ne tadih sampai sampuk setengah dua subuh. Apa Lagi Ongol yang tukang catok dauh ne pasti am keuyuhan, lawan latih-latihnya awak basingkalan. "Aduh imbah hari raya handak baurut ja neh, wan acil Jablai," gerunum Ongol sambil menguap. Ngarannya orang keuyuhan ah lah, jelas ae mengantuk berat ditambah lagi sampai setangah dua. Imbah tuntung bekaliling umpat pikap tadih, kada tahan lalu Ongol, langsung ja inya bulik ke rumah. Sesampai di rumah, "aduh sudah jam dua setumat lagi subuh, harus guring satumat barang," jar Ongol sambil melabuh kepala ke bantal. Handap kisah," kring..kring..kring," jer bunyi jam weker di higa Ongol babunyi, kada lawas imbah tu di sahut bunyi azan di masjid. "Umma sudah subuh kah,” jer Ongol sambil mangucak mata. "Astaga kadanya subuh ini, pina rami orang," ujar Ongol bapander sorangan sambil manilik tumatan horden lelongkang rumahnya. Penasaran keluar ae Ongol sambil betapih-tapih ja. "Ummma ae...behari raya ke mana kam ngol seharian kedida muncul di kampung. Maaf lahir batin dulu nah kita," ujar Utuh Lengkor sambil maulur tangan bemaafan lawan Ongol. Binggung Ongol balum sempat bepander apa-apa inya, baya basalaman dengan Utuh ja. "Ini ne subuh am kalo wal?" takun Ongol. "Subuh apa kah, kada ngol ae ini ne magrib am," jawab Utuh. Apa da lapah awak Ongol lamah lantuhutnya, rupanya seharian orang bahari raya inya malah guring ja seharian gaweannya. Handak siup rasa awak Ongol mendangar sudah Magrib. Apa da Ongol rasa kada sempat behari raya ae. Rupanya jam wekernya tadi tu bebunyi masih belum teubah dari kebiasaanya pas bulan puasa. Maklum biasanya mun puasa Ongol guring seharian, sampuk buka puasa hanyar bangun. Sekalinya ini pang dampaknya kebiasaan buruk waktu bulan puasa masih tebawa sampai hari raya. ( Sumber Berita: http://www.radarsampit.net/berita-hari-raya-.html#ixzz3ICTccw3V