benyamuk dan besamut

Sudah berapa minggu ni buhan Ongol bemalam di ladang, banyak memang sangu buhannya mulai baras, iwak karing, sampai mie bungkus.
Kebelujuran Ongol sepondok dengan anaknya Utuh Lantui, Anang Gabau wan Utuh Lengkor. Urangnya ni menjaga kabun kalo diganggu binatang liar.
Siangnya, Utuh Lantui lawan Anang Gabau limbah memanen rambutan sing banyakan ada pang sekitar lima karung gabang.
Malamnya, sambil bakisah urang empat ni kahayalan sampai habis rambutan dua karung. Saking mengantuknya, Anang Gabau lawan Utuh Lengkor kada ingat lagiam bebasuh tangan wan muntung habis makan rambutan tu.
Rupanya malam tu benyamuk banar, buhannya nang guring dalam kelambu tangganggu banar wan nyamuk, sing bekuliaran. Kelambu kada mampan mehadang nyamuk magin menjadi-jadi masukan.
Ongol, Lantui, Gabau wan Lengkor pusing meurusi nyamuk ja malam tu. “Kenapa pina benyamuk banar malam ni Ngol lah,” ujar Gabau.
“Iih benyamuk banar, kalo sore tadi limbah hujan, nyamuk keluaran limbah bataduh,” sahut Ongol.
Urang beempat ni sibuk banar meusir nyamuk, Gabau mencucul rumput lawan ranting-ranting, kalo Ongol seawakan be lapai minyak gas, Lantui melapai seawakan lawan bawang putih, sadangkan Lengkor bakalubut pakai tapih.
“Pina ganas banar nyamuk ni Bau ai, aku sudah seawakan belapai pakai minyak gas, nyamuk masih ada ja nang menyangat, sampai ka burit-burit disangatnya,” jar Ongol.
Singkat carita, Ongol lawan Gabau pusing banar semalaman meurus nyamuk ja. “Kaipa yu Ngol meurus nyamuk ne, pina menjadi-jadi lalu nyamuk ni,” takon Gabau.
Rupanya, mulai tadi Ongol bepikir kaya apa meusir nyamuk. “Kaya ini ja, kita buka ja kelambu ni biar ja nyamuknya masukan, limbah itu kita keluaran,” jar Ongol.
Limbah dibuka Ongol, handak seribu lima ratusan nyamuk masuk ke dalam kelambu. “Lajui, langsung tutup kelambunya Bau, nyaman takurung nyamuknya,” pinta Ongol.
“Nah bujur jar kam Ngol ai, masuk semua nyamuknya kedida lagi bekuliaran di luar ni, takurung dalam kelambu nyamuknya,” sahut Gabau.
Malam itu, urang beempat ni hayal beguringan di luar kelambu oleh kedida lagi nyamuk am.
Isuknya, Ongol takajut melihat muha Gabau wan Lengkor dan langsung membanguni buhanya bedua. “Bau uuii, Kor, uuii bangunan, sudah tarang hari ni,” jar Ongol sambil mengarak-garak awak Gabau wan Lengkor.
“Bau, kam lawan Lengkor ne aneh jua lah, baya guring semalam ja langsung tumbuh sengot lawan janggut,” jar Ongol.
Mendangar itu, Gabau wan Lengkor keheranan apa nang di kisah Ongol ni lah. “Apa grang jar kam tu Ngol,” sahut Gabau bingung.
“Coba kam becermin di banyu tu, sengot lawan janggut buhan kam tumbuhan tu, lakas banar tumbuhnya,” suruh Ongol.
Karena penasaran, Gabau langsung turun dari pondok bejalan ke parit handak becermin. “Bongol jua Ongol ni, lain sengot ni,” jar Gabau wan Lengkor sarek-sarek lawan Ongol.
Rupanya, nang hirang-hirang di bibir atas lawan dagu Gabau wan Lengkor tu, samut hirang bekumpul lah. “Iiih bisa ai tu bibir wan dagu buhan kam dihurungi samut, apa malam tadi buhan kam kekada bebasuh imbah makan rambutan,” jar Ongol.
“Nah iya am, kita mehindari nyamuk sampai guring di luar kelambu, malah kita malah dihurungi samut hirang,” gerunum Gabau wan Lengkor sambil membasuh muha pakai banyu parit. (fm)

Sumber Berita: http://www.radarsampit.net/berita-benyamuk-dan-besamut.html#ixzz3JzAQsY5w