mencalon pamabakal

Di Kampung Liur kesahnya ni handak pemilihan Pambakal, yang dicalonkan ada 3 calon kuat; Haji Untat, Anang Gabau, dan Acil Jablay. Lalau am parak pemilihan kesahnya 3 calon ni kaluyuran tarus satiap hari di Kampung Liur tu, pertama Haji Untat mandatangi rumah Ongol ni.
“Ngol, aku ni  mancalon nah jadi pambakal, ikam mandukung aku kalo kena, ayu ja tenang ja amun aku tapilih kena pokonya harga gatah tu naik tarus tu pang,” ujar Haji Untat katika batamu Ongol di rumahnya.
“Tenang haja pian Ji ae, aku ni pasti am mamilih pian apaam lagi calon yang kuat  selain pian yang lain kada harapan baya pander budas masam liur bakesah,” ujar Ongol sambil baruku tambaku sek.
“Nah kaya itu pank Ngol, amun dengan ikam percaya ja aku, ni nah aku julungi ikam duit selawi ribu lawan sabungkus tambaku Jawa,” ujar Haji Untat sambil merayu Ongol.
“Akui Ji ni lain money politic lah kada wani aku kalo kena ditangkap pulisi,” ujar Ongol  pura-pura.
“Hayoo ja ini ucapan terima kasih pakai ikam mangawali aku bakesah ni nah, kada maksud apa-apa , yang panting isuk ingat coblos aku,” ujar  Haji untat pas handak bulik jua.
Lalu limbah itu datang pulang ni kesahnya Anang Gabau samba mabawa karesek hirang. “Ouiii Ngol, ni aku calon Pambakal handak baelang nah,” ujar Gabau di hadapan pintu. “ Hau ada calon pambakal lah, masuk ja ke dalam,” sahut Ongol.
“Aku ni handak bapander dengan ikam Ngol, aku ni kan mancalon Pambakal, amun aku tapilih kena aku handak maulah patung orang mamantat gatah di tangah kampung ni soalnya itu am yang jadi gawian kita,” ujar Anang Gabau.
“Nah bujur itu nang ae salut aku lawan ikam baisi ide kaya itu, tenang ja aku mandukung ikam, asal ada ongkos mancublus haja kawa nukar 1 kampil baras,” ujar Ongol ni.
“Hayu ni nah aku julung ikam duit lah asal isuk ingati coblos Anang Gabau yang gambarnya pakai kacamata hirang kaya blek sarden tu,” kata Anang Gabau meyuruh Ongol.
Lalu tarakhir datang jua Acil jablay. “Ngol apa gawian ni kada tulak maunjun kah, pina mangupi lawan baruku ja gawian,” ujar Acil Jablay dengan penampilan alay selawar mangantat kaya mambungkus batang nangka.
“Kada pan Cil ae manunggu serangan fajar dari calon pambakal ni nah, amun kedida serangan fajar serangan magrib, lawan serangan subuh isuk,” ujar Ongol sambil takurihing.
“Kada usah segala subuh Ngol  ni nah aku handak manyuruh ikam mamilih aku ja isuk, ada ja pakai duit rokok lawan kupi ikam, amun aku tapilih kena tenang haja buhan ikam kita baorkesan 7 hari 7 malam kada ampih,” ujar Acil Jablay.
“Hau bujur Cil ini am calon yang pina kahandak masyarakat, apa yang ada ni  kampung kita ni hinip lalu kaya pulau lepeh,” ujar Ongol.
Singkat cerita pas hari pemilihan Ongol ni mamilih jua akhirnya lalu pas kaluar dari TPS datang haji Untat. “Mamilih siapa ikam ngol?” tanya Haji Untat. “Tenang ja Ji kita ni pilih situ am sudah,” ujar Ongol.
“Nah sip amun kaya itu ngaranya,” ujar untat. Pas bajalan lagi Ongol di cegat Anang Gabau. “Ngol pilih yang mana ikam tadi,” tanya Anang Gabau. “Pilih yang bakacamata sing ganal kaya burit blek sarden tu,” sahut Ongol. “Mantap Ongol nih, kada sia-sia mambari ikam sekampil baras,” ujar Anang.
Lalau pas terakhir di cegat lawan Acil Jablay. “Ngol ikam ni sudah mengeramputlah  bepada lawan Untat memilihnya, makaya itu jua lawan Anang ikam pilih jua, lalu ikam bepadah kena memilih aku  yang mana bujur ni,”  ujar Acil Jablay sambil handak mamangkung.
“Hau bujur aku ni kadida yang mengeramput orang pian pang, tadi pas aku disuruh mencoblos 3 calon tu ku coblos semuaan ae, apa 3 calon semua kujanjikan memilihnya apa yang salah cil, pian gin ulun pilih jua kan kada mengeramput kalo,” ujar ongol sambil takurihing.
Lalu am mandangar panderan ongol 3 calon pambakal ni sangkal hati rasa dikarokot bidawang ae, di bunguli ongol sekalinya

Sumber Berita: http://www.radarsampit.net/berita-mancalon-pambakal-.html#ixzz3IZsK8pv5