jurda 13

SUNGSUNG tu Ongol tulak ke taman Kampung Liur handak beolahraga wan kekawalannya. Baju kaos nang dipakainya betulisan jurda 13. Pina telihat himung banar Ongol ne memakai baju kaos hirang nang ada tulisannya karena jurda 13 adalah pemain bola terkenal di Kampung Liur.
Sudah dua putaran Ongol neh bakeliling taman Kampung Liur sampai tepaluh-paluh bajunya. “Wooiihh, mantab baju kaos kita neh,” takon Haji Untat pas bebuhannya bedapat dibawah pohon. “Dibari Jurda semalam Ji ai. Hebat kalolah, hehehe,” sahut Ongol pina himung sambil takurihing sorangan.
Handap kisah, tuntung bakisahan dibawah pohon imbah beolahraga lalu bebuhannya bulikan kerumah masing-masing. Dalam perjalanan bulik Ongol ne duduk pulang diwarung Acil Jablay. “Halo Jurda,” tagur Acil Jablay sambil meangkat tangan. “Halo juaaaa, hehehe,” ujar Ongol kehimungan.
Lalu Acil Jablay ne menakoni Ongol. “Jadi juragan wayah ne lah,” ujar Acil Jablay sambil haur menyusun pisang goreng. “Juragan apaan ciiil ai, masih nang dahulu jaaaa,” sahut Ongol sambil menyulum wan pisang goreng sebuting. “Aku dangar sudah jadi juragan ikam ne Ngol ai,” takon sidin pulang.
Harau penasaran banaran Ongol ne karena selalu ja disambat jadi juragan. Padahal inya ne masih ja jad kuli gatah wan pekat nang setiap hari tulak ke kebun pun Haji Untat. “Juragan apa ah Cil,” takon Ongol. “Tu be nang ada tulisan dibelakang baju kaos ikam. Tu kepanjangan Juragan Janda 13 kalo,” ujar Acil Jablay.
Mendangar pander sidin tadi harau habang muha Ongol. “Busyeet, pantas ai rahatan di taman tadi ada jua nang mengiyau ulun ne juragan. Eh sekalinya, jurda 13 ne juragan janda. Ya am, singkatan nang diplesetkan ya nang ngini am,” ujar Ongol pina meraju. “Kada papa ja ikam meraju nang penting pisang goreng nang ikam wajib dibayar. Okey,” ujar Acil Jablay pina tegas banaran. “Inggih Cil,” sahut Ongol betambah masam muhanya sambil bulik kada tetahu muha. (*/fin)

Sumber Berita: http://www.radarsampit.net/berita-jurda-13.html#ixzz3Jz9LwhPz